Արագածը հաջորդ տարի պայքարելու է ԲԽ-ի ուղեգիր նվաճելու համար. Արա Նիգոյան

Մայիսի 30-ին կվերսկսվի նաև Ֆուտբոլի Հայաստանի Առաջին խմբի առաջնությունը:

Նորաստեղծ «Արագածը» առաջնությունը կվերսկվի նոր մարզչի գլխավորությամբ՝ ի դեմս Արա Նիգոյանի: Թիմի նորանշանակ մարզիչը  ArmSport.am-ի հետ զրույցում խոսել է առաջիկա ծրագրերի մասին:

-Ինչպե՞ս ստացաք «Արագածը» գլխավորելու առաջարկը:  

-Հավաքականից հեռանալուց հետո աշխատանք չունեի: Առաջին խմբի մի քանի թիմերից առաջարկներ եղան, բայց չեմ ցանկացել աշխատել: Զանգ ստացա «Արագածից», քննարկում ունեցա ակումբի նախագահի հետ և պայմանագիր ստորագրեցինք մինչև մրցաշրջանի ավարտը:

— Ինչպե՞ս եք նախապատրաստվում առաջնությանը:

-Ես նոր եմ ծանոթանում ակումբին: Հիմա մարզվում եմ 11 ֆուտբոլիստի հետ, որից 10-ը տեղացի են, մեկը արտասահմանցի, որը չէր հեռացել Հայաստանից: Մյուս լեգիոներները նոր են վերադարձել Հայաստան և պետք է մնան 14-օրյա կարանտինում: Թիմն ընդունելուց սպասում էի, որ լեգիոներները շուտ կմիանան, բայց նրանց վերադարձն ուշացավ և կանգնեցինք փաստի առաջ: Մենք երկու շաբաթ է՝ ինչ մարզվում ենք: Առաջիկա խաղին նախապատրաստվում ենք 11 ֆուտբոլիստով. պետք է խաղանք առանց փոխարինման: Ուզենք, թե չուզենք, իրավունք էլ չունենք այլ ֆուտբոլիստ հայտավորելու: Ես ղեկավարությանը խնդրեցի, որ եթե հնարավոր է ֆեդերացիան ընդառաջի, և մի քանի ֆուտբոլիստի ընդգրկենք մեր թիմ, բայց դա իրատեսական չէ, քանի որ տրանսֆերային պատուհանը հիմա փակ է: Պետք է աշխատենք այնպես անել, որ առանց վնասվածքի մոտենանք առաջիկա խաղին, հակառակ դեպքում՝ ստիպված կլինենք խաղալ 11-ից էլ քիչ ֆուտբոլիստով: Ես լեգիոներներին չեմ ճանաչում, պետք է թիմը հավաքվի որպեսզի տեսնենք: Իրականում շատ դժվար է լինելու: Սա ինձ համար մարզչական փորձություն է, որից պետք է պատվով դուրս գալ:  

-Ի՞նչ զրույց եք ունեցել ակումբի ղեկավարության հետ, ի՞նչ խնդիր է դրված թիմի առջև:

-Ես ակումբի ղեկավարների հետ զրույց եմ ունեցել հեռախոսով: Ակումբի նախագահի պահանջը եղել է այն, որ այս մրցաշրջանում թիմը լավ հանդես գա, որպեսզի հաջորդ տարի պայքարի Բարձրագույն խմբի համար: Իմ պայմանագիրը նախատեսված է մինչև այս մրցաշրջանի ավարտը, իսկ նոր մրցաշրջանի համար կքննարկենք և կհասկանանք: Իմ ցանկությունն այն է, որ ամեն ինչի մեջ լրջություն տեսնեմ՝ ինձանից սկսած: Առաջին հերթին ես մեծ ցանկություն ունեմ, որ հույսներս ավելի շատ կապենք հայ ֆուտբոլիստների հետ: Իրականում տուժում է մեր հայկական ֆուտբոլը:

-Ինչպե՞ս է անդրադարձել ակումբի վրա կորնավիրուսի համավարակը: Կա՞ն ֆինանսական խնդիրներ:

-Ես սովորաբար ֆուտբոլիստների ֆինանսական հարցերի մեջ չեմ խառնվում: Այսօր մարզիչներ կան, որ ագենտություն են անում: Մարզիչը պետք է մնա իր տեղում: Այսօր ամբողջ աշխարհում էլ խնդիրներ կան: Ակումբում խնդիր որպես այդպիսին՝ չկա:

-Ի՞նչպես կգնահատեք առաջին խմբի առաջնության որակը:

-Թիմեր կան, որ հավանում եմ՝ «Վանը», «Լոկոմոտիվը», «Վեստ Արմենիան», ԲԿՄԱ-ն: Ինձ դուր է գալիս հատկապես ԲԿՄԱ-ն, որ բանակային տղաները հնարավորություն ունեն պահպանել մարզավիճակն ու բանակից հետո նույնպես շարունակեն մնալ ֆուտբոլում: Թիմն էլ որակով է ու չի զիջում մյուսներին:

—Արդարացվա՞ծ էր միանգամից այսքան թիմերի ավելացումն Առաջին խմբում:

-Իհարկե, լավ է, որ այսքան թիմեր կան, բայց մնում է, որ թիմերը լուրջ լինեն, ոչ թե մի քանի ամիս գոյատևեն և հետո փակվեն: Ինչքան շատ թիմեր լինեն, այդքան մրցակցությունն ուժեղ կլինի:

—  Առաջին խմբի առաջնությունը լի է սկանդալներով: Ի՞նչ կասեք այս մասին:

-Ես եթե տեսնեմ մի բան, որը ոչ ֆուտբոլային է, կհեռանամ այդ վայրից: Շատ բաներ կան, որ լսում ենք, տեսնում ենք: Չի կարելի աչքերը փակել ոչ ֆուտբոլային իրավիճակների վրա:

 -Ունե՞ք մանկապատանեկան թիմեր և կ՞ան տղաներ, որոնք մոտ ապագայում կկարողանան համալրել թիմի կազմը:

-Մենք չունենք մանկապատանեկան թիմեր: Դա ամենացավոտ հարցն է:  Հիմա ունենք շուրջ 10 լեգիոներ: Ակումբի ղեկավարությունը նշել է, որ ցանկություն կա, որ թիմի խաղը կայունանա, իսկ հաջորդ տարի արդեն թիմը կպայքարի ԲԽ-ի համար: Ապագայի համար դեռ շուտ է ինչ-որ բան խոսել: Այսօր ամենակարևորը ֆուտբոլիստի որակն է: Դրա համար պետք է շատ ֆուտբոլիստներ լինեն, ընտրության լավ հնարավորություն ունենաս, որպեսզի ընտրես լավագույններին:

Երվանդ ՀԱԿՈԲՅԱՆ