Օրեր առաջ ՀՖՖ-ն բոլոր ակումբներից կարծիք հարցրեց այս առաջնության ձևաչափը փոփոխելու վերաբերյալ: Այսօր սեփական տեսակետը ներկայացնելու վերջին օրն է: Վեցնյակի թիմերը, բացի «Ալաշկերտից», իրենց պաշտոնական դեմ տեսակետը հայտնել են հայտարարությամբ և Аrmsport-ի հետ զրույցում: «Արարատ-Արմենիան», «Ուրարտուն», «Նոան», «Արարատը», Գանձասար-Կապանն» ու «Փյունիկը» ձևաչափի փոփոխության վերաբերյալ իրենց տեսակետը հայտնել են Armsport-ի հետ զրույցում:
«Փյունիկն», «Ուրարտուն» ու «Գանձասար-Կապանը», այո, կողմ են ձևաչափի փոփոխությանը: «Ալաշկերտն» իր պաշտոնական տեսակետը հանրայնորեն չի հայտնել: Այս պահի դրությամբ առաջնության ձևաչափի փոփոխմանը դեմ է քվեարկել 5 ակումբ, 3-ը կողմ են, իսկ մի ակումբ դեռ չի բարձրաձայնել: Եթե որոշումը կայացվի՝ հաշվի առնելով միայն ակումբների կարծիքը, պարզ է դառնում, որ թիմերը կշարունակեն խաղալ նույն ձևաչափով:
Սկսենք Սկզբից. Ինչու՞ որոշվեց փոփոխել առաջնության ձևաչափը
Ֆուտբոլի Հայաստանի Բարձրագույն խմբի այս տարվա առաջնությունը որոշվեց անցկացնել նոր ձևաչափով: Նախ ՀՖՖ-ն բոլոր թիմերից կարծիք հարցրեց նոր ձևաչափի վերաբերյալ ու վերջնարդյունքում որոշում կայացրեց ինչ-որ տեղ «փորձարարական» առաջնություն կազմակերպել: Ի սկզբանե, ոչ մի թիմ կտրականապես դեմ չարտահայտվեց նոր ձևաչափին: Սա նշանակում է, որ բոլորն էլ գիտակցում էին, որ հնարավոր է իրենք չհայտնվեն լավագույն վեցնյակում: Սա նշանակում է, որ բոլորին էլ ամբողջապես կամ ինչ-որ չափով ձեռնտու էր նոր ձևաչափը:
ՀՖՖ-ն որոշեց քննարկել և փոփոխել ձևաչափը՝ թիմերին անչափ խիտ գրաֆիկից ազատելու և Բարձրագույն խմբից դուրս մնալու համար պայքար ձևավորելու համար: Նոր ձևաչափով հնարավոր եղավ կազմել ավելի քիչ խաղերով խաղացանկ, քանի որ գաղտնիք չէ, որ թիմերն աընդհատ դժգոհում էին խիտ խաղացանկ ունենալուց:
Տեսակետներ՝ հիմնավորված.
Ձմեռային դադարի ընթացքում Առաջին Ալիքի հետ զրույցում ՀՖՖ նախագահ Արմեն Մելիքբեկյանը հայտնեց, որ չեն պատրաստվում փոխել այս առաջնության ձևաչափը, իսկ մյուս առաջնության մասով դեռ պետք է քննարկում լիներ: Նման խոսակցություն էր բացվել, քանի որ արդեն գրեթե պարզ էին վեցնյակից դուրս մնացած թիմերի անունները. թիմերն էին սկսել բարձրաձայնել: Այդ ժամանակ ՀՖՖ նախագահը չէր էլ պատկերացնում, որ կորոնավիրուսը նման կերպ կարող է ապակայունացնել հայկական ֆուտբոլը և կարիք կլինի քննարկել նաև այս առաջնության ընթացիկ ձևաչափը: Բնականաբար, այս տարբերակը ձեռնտու է վեցնյակից դուրս մնացած «Գանձասար-Կապանին», «Փյունիկին» ու «Ուրարտուին»: Հենց այս թիմերի համար առաջնության մնացած հատվածն այլևս ոչ մի նշանակություն չունի, քանի որ խաղասեղանին ոչինիչ դրված չէ: Armsport-ի հետ զրույցում «Շիրակի» Գլխավոր մարզիչ Վարդան Բիչախչյանը հայտնեց իր տեսակետը՝ նշելով, որ ճիշտ չէ առաջնության միջնամասից խոսել ձևաչափի փոփոխման մասին: Եվ, իրոք, թիմերն արդար պայքարի արդյունքում իրենց ապահովագրել են վեցնյակից դուրս մնալուց: Իսկ ընդհանուր ձևաչափի վերաբերյալ Բիչախչյանի կարծիքն այն է, որ 10 թիմով ճիշտ չէ նման ձևաչափով խաղալ, բայց դրա համար բարձրաձայնելու ժամանակ ու տեղ կա՝ մինչ այս առաջնության մեկնարկը կամ դրանից հետո: Ըստ նրա, նման ձևաչափով կարելի է խաղալ, եթե ունենայինք գոնե 12 թիմ: Այդ դեպքում, առաջնության երկրորդ հատվածում թիմերը հավասար քանակությամբ խաղեր կխաղային, իսկ հիմա վեցնյակի թիմերն ավելի շատ խաղեր ունեն անցկացնելու, քան մնացածը 3-ը:
Պայքարի՝ նաև ոչ սպորտային կողմը.
Բնականաբար, ՀՖՖ-ի հարցմանը վեցնյակում գտնվող թիմերը պետք է դեմ արտահայտվեին, և ոչ-ոք նրանց մեղադրելու իրավունք չունի, քանի որ սա նրանց վաստակն է: Մեղադրանքի սլաքներ պետք չէ ուղղել նաև ձևաչափի փոփոխմանը կողմ թիմերին։ Իսկ ինչու՞ պետք է կողմ չլինեն: Կա հնարավորություն սրբագրելու բացթողումները, գուցե նաև՝ բեկում մտցնելու առաջնության ընթացքի մեջ։ Բացի այն, որ արդեն հնչեցված կողմ և դեմ կարծիքներից պարզ է դառնում, որ առաջնության ձևաչափի փոփոխման շանսերը էականորեն նվազել են, նաև կա հարցի մեծ ֆինանսական կողմը։ Այստեղ խաղասեղանին դրված են մեծ գումարներ, որոնք թիմերը կարող են ստանալ՝ նվաճելով ՉԼ կամ ԵԼ ուղեգիր: Իսկ այդ պայքարից վեցնյակի թիմերը դուրս են թողել 3 թիմի: Ու բացառված չէ, որ ձևաչափի փոփոխման դեպքում նույն «Փյունիկը» կամ «Ուրարտուն» չեն խառնվի մրցանակային պայքարի: Մեկ անգամ չէ, որ անհաջող մեկնարկից հետո, առաջնության վերջին հատվածում կերպարանափոխված թիմեր ենք տեսել:
«Պրոֆեսիոնալ լիգա» ունենալու կարևորությունը.
Հայտնի է նաև, որ քննարկվում է «Պրոֆեսինալ Լիգա» ստեղծելու գաղափարը, և այս պարագայում եթե հիմա ունենայինք «Պրոֆեսիոնալ լիգա», ազատված կլինեինք այս խնդրից: «Պրոֆեսիոնալ լիգայում» որոշումը կայացվելու էր միայն թիմերի քննարկման արդյունքում, և ոչ-ոք չէր կարող մեղքը բարդել երկրի գլխավոր ֆուտբոլային կառույցի վրա՝ ձևաչափի վերաբերյալ փոփոխություններ անելու համար:
Ինչու՞ թիմերը չբարձրաձայնեցին առաջնության մեկնարկից առաջ.
Առաջնության մեկնարկից առաջ բոլորի համար կար ընդգծված 2 առաջատար. «Արարատ-Արմենիա» և «Փյունիկ»: Ինչու՞ այս 2 թիմերը: Պատասխանը պարզ է. 2-ն էլ մինչ առաջնության մեկնարկը հաջող ելույթ ունեցան Եվրոգավաթներում ու ապացուցեցին իրենց բարձր կարգը: Հավանաբար, դա գիտակցում էր նաև «Փյունիկը» և ամենավատ երազում նույնիսկ չէր կարող պատկերացնել, որ չի հայտնվի լավագույն վեցնյակում: Ի սկզբանե, վեցնյակում հայտնվելու լավ շանսեր ուներ նաև «Ուրարտուն»: Հերթական անգամ ապացուցվեց, որ Հայաստանի առաջնությունում խաղալը խաղ ու պար չէ: Ինչքան էլ թիմը բարձրակարգ լինի, ամեն դեպքում, դժվար է ադապտացվել Հայաստանի առաջնությանն ու ապացուցել բարձր կարգը: «Արարատ-Արմենիան» նախորդ տարի փայլուն ելույթ ունեցավ ԵԼ-ում, մոտ էր խմբային փուլ դուրս գալուն, սակայն ինչ-որ բան չհերիքեց: Ինչևէ, առաջնությունը մեկնարկեց նոր ձևաչափով ու հենց սկզբից ծավալվեց գերհետաքրքիր պայքար…այնպես, ինչպես երբևէ: Երևանի «Արարատը» հաճելիորեն զարմացրեց, «Շիրակը» ինչպես միշտ բոլորի ահ ու սարսափն է, «Լոռին» նոր մարզչի ղեկավարությամբ ստաբիլ ֆուտբոլ է խաղում, «Գանձասար-Կապանը» միավորներ բաժանողի դերում չէ, «Ալաշկերտը» կրկին պայքարի բովում է, «Նոան» նոր նախագծերով փորձում է հայկական ֆուտբոլի բարձունքին հասնել: «Արարատ-Ամենիան» ու «Փյունիկը» առաջնության մեկնարկում խնդիրներ ունեցան, որից հետո գործող չեմպիոնը ոտքի կանգնեց, իսկ «Փյունիկը» շարունակեց գահավիժումը: Անակնկալիների շարքին դասվեց նաև «Ուրարտուն»: Ունենալով նման ենթակառուցվածքներ ու հնարավորություններ, թիմն այս պահին նախավերջին՝ 8-րդ տեղում է:
Այս ամենը համադրելով հասկանում ենք, որ եթե ՀՖՖ-ն նման առաջարկով է դիմում ակումբներին, ուրեմն կան հիմնավորված պատճառներ: Գործկոմի առաջիկա նիստի ժամանակ, ամենայն հավանականությամբ, այս հարցի վերաբերյալ վերջնական որոշում կկայացվի:
Արմեն Գարամյան
