Երևանի քաղաքապետարանի սպորտի և երիտասարդության հարցերի բաժնի ղեկավար Լևոն Ջուլֆալակյանը խոստովանում է՝ չի զղջում հունահռոմեական ոճի ըմբշամարտի Հայաստանի հավաքականի գլխավոր մարզչի պաշտոնից հեռանալու համար: Այս մասին 55-ամյա մասնագետը հայտնել է ArmSport-ի թղթակցի հետ զրույցում.
«Չեմ զղջում, որովհետև արդեն մանրամասնորեն ներկայացրել եմ, թե հարցն ինչումն է:
Արել եմ այն, ինչ կարողացել եմ: Գնահատականը տրվել է մեր հանրության, երկրպագուների, ղեկավարության կողմից. բոլորը գերազանց գնահատական են տվել, քանի որ անկախ Հայաստանի պատմության մեջ ոչ մի մարզաձևում չեն գրանցվել այն արդյունքները, որ գրանցվել են մեր մարզաձևում: Սա խոսում է կատարած աշխատանքի մասին:
Ուրախ եմ, որ կարողացել եմ օգտակար լինել մեր հանրապետությանը, մեր մարզաձևին և ուրախացնել մեր ժողովրդին: Միգուցե, կլինի ավելի լավ մասնագետ, չեմ կարող ասել, ժամանակը ցույց կտա»,- մեզ հետ զրույցում ասել է Լևոն Ջուլֆալակյանն ու պատմել, թե հրաժարականից հետո ինչ արձագանքներ է ստացել սպորտային հանրության ու երկրպագուների կողմից.
«Ճիշտն ասած ամեն քայլափոխին ինձ ճանաչողներն ու անծանոթներն իրենց մտահոգությունն ու ափսոսանքն են հայտնում: Դե, ինչ կարող եմ պատասխանել: Պատասխանել եմ արդեն՝ ինչ պատասխանել եմ: Ընդհանրպես չեմ տատանվում իմ քայլում, որոշումներ կայացնելիս շատ վստահ եմ լինում, չեմ զղջում: Բայց երևի՝ չկա մի օր, որ նման հարցով ինձ չմոտենան: Ասում են՝ ափսոսում են, որ հեռացել եմ:
Անմիջապես առաջարկ է եղել դրսից, բայց քանի որ տարիներ շարունակ պատրաստել եմ այս հավաքականը, ինձ համար ճիշտ չէր լինի մեկ այլ թիմի պատրաստելը այս պահին, քանի որ առաջիկայում Օլիմպիական խաղերն են: Սա իմ սիրած աշխատանքն է, իմ սիրած մարզաձևը, առաջարկներ անմիջապես են եղել, բայց ասել եմ, որ առաջիկա մեկ տարում հաստատ չեմ համագործակցի որևէ հավաքականի հետ: Հետո արդեն ժամանակը ցույց կտա»:
Լևոն Ջուլֆալակյանը, որը հավաքականի գլխավոր մարզչի պաշտոնից հեռացավ Ղազախստանում կայացած աշխարհի առաջնությունից մոտ 20 օր առաջ, չցանկացավ մեկնաբանություն տալ մեր ըմբիշների մասնակցության վերաբերյալ:
Հայաստանի հավաքականը 2 մեդալ նվաճեց ԱԱ-ում, իսկ Արթուր Ալեքսանյանն ու Կարապետ Չալյանը Տոկիո-2020-ի 2 ուղեգիր ապահովեցին մեր երկրի համար.
«Չեմ ցանկանա մեկնաբանություն տալ այդ հարցով: Ավելի ճիշտ կլինի՝ այդ հարցին հավաքականի ներկայիս մարզիչները պատասխանեն:
Արդյունքներից բոլորը տեղյակ են, նախորդ տարիների արդյունքներից ևս տեղյակ են: Մնացած գնահատականը պետք է տան լրագրողներն ու երկրպագուները»,- ասում է մարզիչը:
Հունահռոմեական ոճի ըմբիշ, Լոնդոնի Օլիմպիական խաղերի արծաթե մեդալակիր, աշխարհի և Եվրոպայի չեմպիոն Արսեն Ջուլֆալակյանի՝ Տոկիո-2020-ին մասնակցելու հեռանկարն, ըստ Լևոն Ջուլֆալակյանի, պարզ է.
«Այդ քաշային կարգում Արսենն ապացուցել է, որ ինքն առաջատարն է եղել: Այդ քաշային կարգում մենք ունենք մարզիկ, որը վատը չէ, բայց դեռ շատ անելիքներ ունի իմ պատկերացմամբ: Կլինի պայքար Արսեն Ջուլֆալակյանի և Կարապետ Չալյանի միջև: Ով՝ արժանի եղավ, նա էլ կմեկնի Տոկիո:
Ես կողմնակից եմ այն մտքին, որ եթե մարզիկը վարկանիշ է ձեռք բերում դառնալով աշխարհի չեմպիոն կամ մրցանակակիր՝ մտածելու տեղիք է տալիս, բայց եթե մարզիկը զբաղեցնում է 5-րդ հորիզոնականը,դա նորից մտածելու տեղիք է տալիս: Եվ եթե նույն քաշային կարգում կա մրցակցություն, որի մասին պարտավոր է մտածել հավաքականի գլխավոր մարզիչը՝ հաշվի առնելով այն, որ մենք ոչ թե միայն մասնակցության համար ենք մեկնելու Օլիմպիական խաղերին, այլ պետք է պայքարենք մեդալի համար, ուրեմն այստեղ ճիշտ քայլեր է պետք նախաձեռնել:
Վարկանիշը տրվում է երկրին, իսկ ժամանակը ցույց է տալիս, թե ով է ավելի պատրաստ ու ով պետք է մասնակցի Տոկիո-2020-ին:
Արսենն Աշխարհի առաջնությանը չմասնակցեց, բայց նա աշխատում է, մարզվում է, ու հաստատ կմասնակցի՝ որտեղ պլանավորվեց: Իսկ կպլանավորվի ֆեդերացիայի հետ համագործակցելով: Ոչինչ իմիջիայլոց չի ստացվի»,- եզրափակում է իր խոսքը Լևոն Ջուլֆալակյանը:
Նարե Հովհաննիսյան
