ՈւԵՖԱ Չեմպիոնների լիգայի որակավորման առաջին փուլի շրջանակում «Նոան» Աբովյանում նվազագույն հաշվով հաղթեց Պոդգորիցայի «Բուդուչնոստին»։ Խաղից հետո «Նոայի» գլխավոր մարզիչ Սանդրո Պերկովիչն ամփոփել է հանդիպումը։
«Դժվար էր, քանի որ «Բուդուչնոստը» պաշտպանվում էր կրկնակի պատով։ Դժվար է խաղալ, երբ հակառակորդը կանգնած է իր դարպասից 30-40 մետր հեռավորության վրա, և ամբողջ թիմը հետևում է գնդակին։ Պարզ էր, որ նրանց նպատակն էր հնարավորինս երկար պահպանել ոչ-ոքի հաշիվը։
Մենք կայուն էինք և մեծամասամբ հավատարիմ մնացինք մեր ծրագրին։ «Բուդուչնոստը» ուներ ընդամենը մեկ ռեալ վտանգավոր պահ. մենք թույլ չտվեցինք, որ նրանք ավելին ստեղծեն, թեև, խոստովանում եմ, որոշ դրվագներում լավագույնս չընկալեցինք խաղային իրավիճակը։
Կցանկանայի, որ հաշվի առավելությունը ավելի մեծ լիներ, բայց նույնիսկ 2:0 հաշվի դեպքում Պոդգորիցայում պատասխան հանդիպումը նույնքան կարևոր կլիներ։ Ես հստակ պատկերացնում եմ, թե ինչ է մեզ սպասվում այնտեղ. խաղը բոլորովին այլ կլինի, և մենք պատրաստ կլինենք դրան», — ասել է Պերկովիչը։
Հիշեցնենք, որ պատասխան հանդիպումը կկայանա հուլիսի 15-ին, Երևանի ժամանակով 23։00-ին։
