Լա լիգայի նախագահ Խավիեր Տեբասը մեկնաբանել է «Բարսելոնայի» ֆինանսական վիճակը՝ ակումբի տրանսֆերային ակտիվության ֆոնին։
Նրա խոսքով՝ չնայած մի քանի խաղացողների ձեռքբերման շուրջ ձեռք բերված համաձայնություններին, կատալոնական ակումբը դեռևս հնարավորություն չունի պաշտոնապես գրանցել նոր խաղացողների։
«Բարսելոնան» ակտիվացրել է «Էսպանյոլի» դարպասապահ Ժոան Գարսիային 25 միլիոն եվրոյով գնելու հնարավորությունը և բանավոր համաձայնության է եկել «Ատլետիկ Բիլբաոյի» խաղացող Նիկո Ուիլյամսի հետ։ Սակայն Տեբասը շեշտել է, որ տրանսֆերային հայտարարությունները նույնը չեն, ինչ խաղացողների գրանցումը։
«Տրանսֆերի մասին հայտարարելը մեկ բան է, խաղացողի գրանցումը՝ բոլորովին այլ։ «Բարսան» պետք է քայլեր ձեռնարկի Լա Լիգայի կանոնակարգերին համապատասխանելու համար՝ հարգելով 1:1 կանոնը։ Գարսիայի դեպքում իրավիճակն ավելի պարզ է, բայց ակումբը դեռ պետք է ազատի տեղ աշխատավարձերի ցուցակում։ Նրանք դա հասկանում են»,- ESPN-ին տված հարցազրույցում նշել է Լա Լիգայի ղեկավարը։
Նա նաև ընդգծել է, որ այլ խաղացողների հետ բանակցությունների մասին լուրերը դեռևս չեն հաստատվել, և «Բարսելոնան» լիովին չի համապատասխանեցրել իր ֆինանսական ցուցանիշները Լա լիգայի պահանջներին։
