Հայաստանի ազգային հավաքականի գլխավոր մարզիչ Ջոն վան՛տ Սխիպը Չեռնոգորիայի հետ վաղը կայանալիք ընկերական խաղից առաջ պատասխանել է լրագրողների հարցերին։
«Կարծում եմ՝ ինքներդ էլ կարող եք տեսնել, որ տղաների էներգիան տեղում է, մթնոլորտը լավ է։ Իհարկե, մենք հիասթափված ենք նախորդ խաղում կրած պարտությունից, հատկապես վերջին գոլերից, բայց տղաներին էլ եմ ասել, որ սա մի գործընթաց է, որով մենք պետք է ավելի լավը դառնանք ու սովորենք սխալներից, խաղերից քաղենք լավագույնը։ Այսօր էլ ենք այդ մասին խոսել։
Արդյոք կարծո՞ւմ եմ, որ պետք է փոփոխություն անել․ ոչ, ինչպես նախկինում արդեն ասել եմ՝ պետք է հարմարվես նաև մրցակցին։ Դա ֆուտբոլի վերաբերյալ իմ պատկերացումները չի փոխել, ինչպես նաև իմ խաղաոճը, բայց ես հասկանում եմ, որ մենք չենք կարող Նիդերլանդների հավաքականի նման ֆուտբոլ խաղալ։ Ես աշխատել եմ միջակ թիմերի հետ, որտեղ խնդիրներ են եղել, բայց կարողացել եմ վստահություն հաղորդել այդ թիմերին, բարձրացնել նրանց կարգը։ Մարզել եմ նաև ավելի բարձրակարգ թիմեր։ Բոլոր դեպքերում դու հիմնականում աշխատում ես նույն փիլիսոփայությամբ, իհարկե որոշակի տարբերություններով»,- ասել է մարզիչը։
Անդրադառնալով վաղվա խաղից ունեցած սպասելիքներին՝ մարզիչն ասել է, որ բոլոր դեպքերում կարևոր է մեկտեղել դրական արդյունքն ու թիմ կառուցելու գործընթացը․ «Բայց եթե դա չի լինում, պետք է նայես թիմի գրանցած աճին։ Կան կետեր, որոնց առումով մենք բարելավել ենք, բայց կան նաև բաներ, որոնց ուղղությամբ պետք է աշխատենք։ Վերլուծել ենք Չեռնոգորիայի թիմի խաղը, գիտենք, որ տանը նրանք ավելի հարձակողական ֆուտբոլ կխաղան»։
Մարզչին հարցրել են՝ արդյոք Կոսովոյի հետ խաղից հետո ՀՖՖ ղեկավարության հետ զրույց ունեցե՞լ է․ «Ոչ, չենք խոսել»։
