Վերջին ամիսների ընթացքում մոլորակի ամենահաճախ օգտագործվող բառերի ու բառակապակցությունների մեջ «La Casa de Papel»-ը հաստատ չի զիջում «ինքնամեկուսացումին», «կարանտինին» ու անգամ կորոնավիրուսին։ 2017 թվականին իսպանական «Antena 3» հեռուստաալիքը սկսեց «Թղթե տունը» հեռուստասերիալի նկարահանումները՝ պատկերացում չունենալով, որ 2 տարի անց սերիալն այնպիսի հետաքրքրություն է առաջացնելու, որ հանրահայտ «Netflix»-ը չի խնայելու իր միջոցներն այն «գողանալու» համար։
Դե ինչ, նախաբանը, կարծես, ստացվեց։ «La casa de papel»-ը ամենահայտնի հեռուստասերիալն է այս պահին աշխարհում, ու դրա բացատրությունը թաքնված է հեռուստասերիալում բազմաթիվ դրսևորումների հետ, որոնցից մեկն էլ ֆիլմում սպորտի՝ մասնավորապես ֆուտբոլի հետ տարվող համեմատություններն են, երկխոսություններն ու անգամ լուռ պատկերները։
Եթե բացի կինոման լինելուց նաև ֆուտբոլասեր եք ու դիտել եք հեռուստասերիալը, ապա առնվազն մի քանի անգամ գերագույն հաճույք եք ստացել, երբ ձեր սիրելի կամ էլ ատելի հերոսները սկսում են խոսել ֆուտբոլից՝ Իսպանիայի պետական դրամահատարանի թալանման ամենաթեժ պահին։ Սերիալի իրադարձությունները ծավալվում են Իսպանիայի մայրաքաղաքում՝ Մադրիդում։ Սցենարիստները սերիալում առաջին ֆուտբոլային երկխոսությամբ ցանկանում են ևս մեկ անգամ փաստել, որ Մադրիդում ֆուտբոլային հակամարտությունը ընկալվում է «Ռեալի» կամ «Աթլետիկոյի» հանդեպ ունեցած սիրով։ «Բլանկոսները» ատում են «ռոխիբլանկոսներին» և հակառակը։
Իսպանիայի հետախուզության գնդապետ Պրիետոն, որը հետևում էր ինսպեկտոր Մուրիլիոյի աշխատանքին, «Թղթե տան» ֆուտբոլային առաջին տողերի (նաև երկրորդի) հեղինակն է։ Նա զարմանք է հայտնում ինսպեկտորի օգնական Անխելին, երբ իմանում է, որ վերջինս «Աթլետիկոյի» երկրպագու է։
Գնդապետ Պրիետոն մեկ անգամ չէ, որ հայտնվում է ֆուտբոլային երկխոսության կամ էլ կադրի կենտրոնում։ Թերևս ամենաազդեցիկ ֆուտբոլային օրինակներից մեկը դարձյալ բերում է հետախուզության գնդապետը։ Երբ ինսպեկտոր Ռակել Մուրիլիոյի հրամանով ոստիկանությունը կրակում է պատանդներից Արտուրո Ռոմանին, իսպանական մամուլը սկսում է գրել ինսպեկտորի՝ օպերացիան ձախողելու և իրականացման անկարողության մասին։ Ահա, թե ինչ խոսքերով է գնդապետ Պրիետոն կարեկցում Ռակելին․
«Սա նման է Իսպանիայի հավաքականի օրինակին։ Կարևոր չէ, թե ինչպես է սկսվում առաջնությունը։ Եթե այն հաջող ընթանա ու դուք չեմպիոն լինեք, դուք դառնալու եք այս ազգի հերոսուհին»։
2010 թվականին Իսպանիայի հավաքականը նվաճեց Աշխարհի առաջնության գավաթը՝ մեկնարկային խաղում 0-1 հաշվով Շվեյցարիային պարտվելուց հետո։
Այդքան հայտնի սպիտակ դրոշը
«Թղթե տան» ամենառոմանտիկ զույգի՝ Տոկիոյի ու Ռիոյի երկխոսություններից մեկը դարձավ ֆիլմի հաղթաթղթերից մեկը։ Իրականում սցենարիստները շատ սրամիտ են գտնվել՝ ժամանակ առ ժամանակ ֆուտբոլային երկխոսություններ կիրառելով։ Այսպես, Տոկիոն Ռիոյին առաջարկում է, որ երբ սկսվի խառնաշփոթը, նա բարձրացնի սպիտակ դրոշն ու հանձնվի։ Ի պատասխան Տոկիոյի խոսքերին՝ Ռիոն ասում է, որ բարձրացնում է սպիտակ դրոշը միայն երբ «Մադրիդն» է հաղթում։ Երբեք չհանձնվելու ավելի լավ օրինակ դուք հաստատ չեք գտնի։
Ֆուտբոլային մեկ այլ պատկերավոր օրինակի համար շնորհակալ ենք Մոսկվային։ Երբ Դենվերը պատմում է, որ սիրահարվել է «Թղթե տան» տնօրենի քարտուղարուհուն՝ Մոնիկային, Դենվերի հայրը՝ Մոսկվան, որդուն ասում է հետևյալը․
«Նայի՛ր նրան, նա ուրիշ լիգայից է, տղա՛ս։ Նա Չեմպիոնների լիգայից է։ Իսկ մենք նրանցից ենք, ովքեր իրենց տեղն են ուզում պահել Սեգունդայում»։
Դե էլ ինչ «La casa de papel» առանց պրոֆեսորի։ Օպերացիայի «ուղեղի» բազմաթիվ պլանների թվում էր «Կամեռուն» պլանը։ Սրանով նրանք պետք է շահեին հանրության համակրանքը։ Պրոֆեսորը կոչ է անում իր աշակերտներին պատկերացնել ֆուտբոլի աշխարհի առաջնության Բրազիլիա-Կամեռուն խաղը։ Պրոֆեսորը սրանով ցանկանում է ընդգծել, որ մարդիկ միշտ թույլի կողմն են լինում։ Վերը նշված խաղում, պրոֆեսորի ու ներկաների պնդմամբ, Կամեռունին երկրպագելու է ողջ աշխարհը, իսկ Բրազիլիային միայն բրազիլացիները։ Տարվող զուգահեռներում հանրության աչքին կողոպտիչները պետք է «դառնային» Կամեռունը, իսկ ոստիկանությունը՝ Բրազիլիան։ Պլանը հաջողվեց։
Մադրիդի «Ռեալի» երկրպագուները հաստատ նկատել են երրորդ եթերաշրջանի երկրորդ սերիայի ամենատպավորիչ պահերից մեկը։ Գնդապետ Պրիետոն ատամնաբուժարանում է, երբ նրան զանգում են ու ասում, որ կողոպտիչները վերադարձել են։ Մադրիդի օդում կողոպտիչների ուղղաթիռի հետ նշմարվում է «Սանտիագո Բեռնաբեու» ստադիոնը։ Ի՜նչ խոսք, ազդեցիկ դրվագ է։
Ա՜յ դու Արտուրիտո։ «Թղթե տան» ամենաչսիրված կերպարներից մեկը՝ Ֆերնանդո Սոտոն, որը մարմնավորում է Արտուրո Ռոմանի կերպարը, իրական կյանքում մեծ ֆուտբոլասեր է ու երկրպագում է իր քաղաքի գլխավոր թիմին՝ «Վալենսիային»։
Սոտոն տարվա սկզբին «Instagram»-ի իր էջում հերթական անգամ հայտնեց, որ ատում է Մադրիդի «Ռեալը»։ Դա այն բանից հետո էր, երբ «արքայական» ակումբը հաղթել էր «չղջիկներին» Իսպանիայի սուպերգավաթի կիսաեզրափակչում։ Նախորդ տարի՝ Իսպանիայի գավաթի եզրափակչից հետո, Սոտոն հայտարարել էր, որ այդ օրը լավագույններից մեկն էր իր կյանքում։ Նա անգամ եզրափակչից մի քանի օր առաջ կանխատեսել էր «Վալենսիայի» հաղթանակը «Բարսելոնայի» նկատմամբ 2-1 հաշվով AS-ի հետ զրույցում։
«Թղթե տան» երրորդ եթերաշրջանի դրվագներից մեկում նկարահանվել է նաև Նեյմարը։ Պրոֆեսորի ու Բեռլինի խոսակցության ընթացքում հայտնված երկու անծանոթներից մեկը Նեյմարն է։
Դա տեղի է ունեցել 2018 թվականի նոյեմբերին, մինչդեռ նրա ցուցադրվելիք հատվածը հասանելի է եղել հուլիսի 19-ին։ Բրազիլացի ֆուտբոլիստի մասնակցությամբ հատվածը հանվել է, քանի որ Նեյմարին մեղադրանք էր առաջադրվել բռնաբարության համար։ Երբ մեղադրանքը հանվել է, Նեյմարի մասնակցությամբ հատվածը դարձել է հասանելի։ Նեյմարի մասնակցությամբ հատվածը՝ այստեղ։
«La casa de Papel»-ը ևս մեկ անգամ ապացուցեց, որ ֆուտբոլը ազգային արժեք է իսպանացիների համար։ Այն ապրում է նրանց երակներում։ Չէ՞ որ պրոֆեսորի հանրահայտ հարցին, թե ինչն է մեզ բոլորիս միավորում, առաջին պատասխանն է․ «ֆուտբոլը»․․․
Արամ Սահակյան
