«Մանչեսթեր Յունայթեդի» նախկին պաշտպան Պատրիս Էվրան կիսվել է թիմի նախկին գլխավոր մարզիչ սըր Ալեքս Ֆերգյուսոնի և «Կարմիր սատանաների» նախկին հարձակվող Դենի Ուելբեքի միջև ծագած միջադեպի մասին իր հիշողություններով։
«Եթե սըր Ալեքս Ֆերգյուսոնը հիմա մարզեր, նա բանտ կգնար։ Գիտե՞ք, թե քանի ֆուտբոլիստի եմ տեսել լաց լինելիս՝ նրա հետ ունեցած կոնֆլիկտներից հետո: Նա շատ խիստ էր:
Հիշում եմ Ուելբեքի հետ կատարվածը։ Դա ընկերական խաղ էր, խաղում էինք Սաուդյան Արաբիայում։ Մեր օգտին նշանակվեց 11 մետրանոց հարված, Ուազան (Ուեյն Ռունի — խմբ.) գնդակը փոխանցեց Ուելբեքին, Դենին վրիպեց։ Այո՛, մենք պարտվեցինք, բայց դա ընդամենը ընկերական խաղ էր, և տևեց մոտ 45 րոպե։
Մենք մտանք հանդերձարան և լսեցինք Ֆերգյուսոնին. «Ուելբեք, Ուելբեք»։
Նա նրան էր փնտրում, և ես հիշում եմ, որ այդ պահին ես և Ուելբեքը զուգարանում էինք։ Ֆերգին այդ պահին գոռում էր. «Անիծյալ, դու քեզ ո՞ւմ տեղն ես դրել»։ Դու նոր էիր միացել հիմնական թիմին և 11-մետրանո՞ցն էիր իրացնում։ «Երբեք, այլևս նման բան չի լինի, անիծյալ»։
Ես փորձեցի հանգստացնել նրան, բայց նա ընդհատեց. «Ինձ բացարձակ չի հետաքրքրում, որ սա ընկերական խաղ է, դու այլևս երբեք դա չես կրկնի»։ — ասել է Էվրան SDS փոդքասթի համար տված հարցազրույցում։
