Մրցավարական որոշումների վերլուծության մեջ մասնագիտացած Archivo VAR պորտալը վերլուծել է Լա Լիգայի 35-րդ տուրի՝ «Բարսելոնա» – «Ռեալ Մադրիդ» (4:3) հանդիպման ընթացքում տեղի ունեցած երկու վիճահարույց դրվագ։
Աղբյուրի փոխանցմամբ՝ խաղի մրցավար Ալեխանդրո Էրնանդեսը սխալ է գործել հանդիպման վերջնամասում՝ «Ռեալի» դարպասին չնշանակելով 11 մետրանոց, երբ կատալոնացիների հարձակվող Ֆերան Տորեսի հարվածը ձեռքով արգելափակել է հյուրերի կիսապաշտպան Օրելյեն Չուամենին։
«Չուամենին մեկնեց ձեռքը և, առանց այն հետ քաշելու որևէ փորձ անելու, կանգնեցրեց Ֆերանի հարվածը մոտ տարածությունից։ Չնայած VAR համակարգի՝ դրվագը վերանայելու հորդորին, մրցավարը որոշեց չփոխել իր որոշումը»,– նշում է Archivo VAR-ը։
Բացի այդ, ընդգծվում է, որ հանդիպման 90+6-րդ րոպեին Էրնանդեսը սխալմամբ չեղարկել է տանտերերի կիսապաշտպան Ֆերմին Լոպեսի խփած գոլը՝ նշելով ձեռքով խաղ։
«Ֆերմինի գործողությունը չի համապատասխանում կանոնակարգի այն կետին, որի հիման վրա այդ դրվագները պետք է վերանայվեն»,– ասվում է Archivo VAR-ի մեկնաբանությունում։
