ՊՍԺ-ն տարբերակներ է ուսումնասիրում թիմն ուժեղացնելու համար: Այս մասին հայտնում է TodoFichajes-ը։
Աղբյուրի համաձայն՝ Լիգա 1-ի հսկաները մեծացրել են իրենց հետաքրքրությունը «Բարսելոնայի» իսպանացի կիսապաշտպան Գավիի նկատմամբ։
Նշվում է, որ փարիզցիների գլխավոր մարզիչ Լուիս Էնրիկեն շատ է ցանկանում իր թիմում տեսնել 20-ամյա ֆուտբոլիստին։ Միևնույն ժամանակ նշվում է, որ «Բարսելոնան» Գավիին համարում է ակումբի ապագայի առանցքային խաղացող և չի պատրաստվում վաճառել նրան։
Միակ բանը, որը կարող է ազդել Գավիի նկատմամբ «կապտանռնագույնների» դիրքորոշման վրա, ակումբի ֆինանսական վատ վիճակն է։ Transfermarkt-ը իսպանացու տրանսֆերային արժեքը գնահատում է 70 միլիոն եվրո։
Գավիի գործող պայմանագրի ժամկետը «Բարսելոնայի» հետ նախատեսված է մինչև 2030 թվականի կեսերը։
