ՈւԵՖԱ-ն հինգշաբթի՝ մարտի 27-ին, հետաքննություն է սկսել Մադրիդի «Ռեալի» չորս խաղացողների նկատմամբ՝ Չեմպիոնների լիգայի 1/8-րդ եզրափակչի «Ատլետիկոյի» դեմ հանդիպումից հետո (1:0)։
«Սերուցքայինների» ֆուտբոլիստներ Վինիսիուս Ժունիորը, Կիլիան Մբապեն, Դանի Սեբալյոսը և Անտոնիո Ռուդիգերը մեղադրվում են անպարկեշտ պահվածքի մեջ։ Այս հարցին անդրադարձել է նաև «Ռեալի» գլխավոր մարզիչ Կառլո Անչելոտին։
«Մենք վստահում ենք ՈւԵՖԱ-ին։ Կարծում ենք՝ ամեն ինչ լավ կընթանա։ Սպասում ենք նրանց որոշմանը, բայց վստահ ենք, որ ամեն ինչ դրական կլուծվի», — ասել է Անչելոտին մամուլի ասուլիսի ժամանակ։
Հիշեցնենք, որ Չեմպիոնների լիգայի քառորդ եզրափակիչում Մադրիդի «Ռեալը» կմրցի Լոնդոնի «Արսենալի» հետ։ Թիմերի առաջին հանդիպումը կկայանա ապրիլի 8-ին, Լոնդոնում։
