«Կրասնոդարի» և Հայաստանի ազգային հավաքականի կիսապաշտպան Էդուարդ Սպերցյանը Ռուսաստանի Պրեմիեր լիգայի 13-րդ տուրում «Կրիլյա Սովետովի» դեմ խաղից հետո Metaratings.ru-ին տված հարցազրույցում ամփոփել է հանդիպումը և խոսել թիմի հաղթական շարքի մասին։
Հոկտեմբերի 28-ին «Կրասնոդարը» Սամարայում 2:1 հաշվով հաղթել է «Կրիլյա Սովետովին»։ Սպերցյանը դարձավ գոլային փոխանցման հեղինակ, իսկ գոլերի հեղինակներ դարձան Ջոն Կորդոբան և Վիկտոր Սան։
– Ինչպե՞ս կգնահատեք հանդիպումը։ Որքա՞ն ծանր էր խաղը։
– Ծանր հանդիպում և ծանր հաղթանակ։ Մենք խաղադաշտ էինք դուրս եկել մեկ մտքով և հասանք հաղթանակի։ Դա շատ կարևոր է մեզ համար։
– Թվում էր, որ «Կրասնոդարի» համար առաջին խաղակեսը ավելի դժվար էր, քան երկրորդը։ Կային սխալներ։ Թիմը դաշտի՞ն էր հարմարվում։ Ո՞րն էր հիմնական խնդիրը։
– Ավելի ճիշտ կասեն մարզիչները՝ խաղի վերլուծության ժամանակ։ Ընդմիջմանը մարզչական շտաբը կատարեց որոշ շտկումներ։ Կարծում եմ, որ մենք ճիշտ սկսեցինք խաղալ, կային լավ պահեր։ Թեև առաջին կեսում էլ ունեինք երկու-երեք լավ պահ։
– Ի՞նչ ավելացավ երկրորդ կեսում։
– Կարծում եմ՝ վերահսկողությունն ու շարժումը։
– Որքա՞ն կարևոր էր հաղթանակը, հատկապես այն բանից հետո, երբ «Զենիթը» և «Լոկոմոտիվը» ոչ-ոքի խաղացին։
– Իհարկե, մենք գիտեինք արդյունքը, նայում էինք խաղը, բայց նորից կասեմ՝ մենք այստեղ էինք մեկ մտքով։ Մենք խաղից խաղ ենք գնում։ Եթե շարունակենք այդպես, մեզ համար միևնույն կլինի, թե ինչպես են խաղում մյուս թիմերը։
– «Կրասնոդարը» 10 խաղ անընդմեջ հաղթել է։ Ո՞ր գործոնների շնորհիվ է թիմն այսքան լավ մարզավիճակում։
– Դա քրտնաջան աշխատանքի, կարգապահության և թիմի միասնականության արդյունք է։
Այս մրցաշրջանում Սպերցյանը ՌՊԼ-ում անցկացրել է 13 խաղ, խփել է 5 գոլ և կատարել 3 արդյունավետ փոխանցում։
«Կրասնոդարը» 13 տուրերից հետո շարունակում է գլխավորել ՌՊԼ-ի մրցաշարային աղյուսակը՝ իր ակտիվում ունենալով 33 միավոր։ Հաջորդ տուրում Մուրադ Մուսաևի թիմը տնային խաղում կհանդիպի «Օրենբուրգի» հետ։ Հանդիպումը տեղի կունենա նոյեմբերի 3-ին և կմեկնարկի Երևանի ժամանակով 20:45-ին։
