Բռնցքամարտի Օլիմպիական հավաքականը ներկայանալի կազմով մեկնել էր Լոնդոն՝ վարկանիշային մրցաշարի, սակայն օրեր անց վերադարձավ հայրենիք. կորոնավիրուսի տարածման հետևանքով նոր մեկնարկած մրցաշարը դադարեցվել էր: Այդուհանդերձ, մերոնք հասցրին մի քանի հաղթանակներ տանել մեկնարկում, ինչպես նաև մեկ օլիմպիական ուղեգիր ապահովել. 52 կգ քաշային Կորյուն Սողոմոնյանը նվաճեց Հայաստանի 4-րդ ուղեգիրը Տոկիո-2020-ի համար:
Հավաքականի գլխավոր մարզիչ Ռաֆայել Մեհրաբյանն ArmSport-ի հետ զրույցում իր ափսոսանքն է հայտնում դադարեցված մրցաշարի կապակցությամբ՝ նշելով, որ եթե այն շարունակվեր, վստահաբար ավելի լավ արդյունքներ կունենայինք.
«Արդյունքներից գոհ եմ, եթե մրցաշարը շարունակվեր ավելի լավ արդյունքներ կգրանցեինք, բայց դե ինչ արած: Դեռևս չգիտենք, թե երբ կշարունակվի մրցաշարը: Առհասարակ այն դադարեցնելու որոշումը բավականին անսպասելի էր մեզ համար: Ամեն ինչ հանգիստ էր, ոչ մի խուճապ չկար, ու միանգամից որոշեցին դադարեցնել: Այդ ժամանակ մի փոքր լարվածություն ի հայտ եկավ: Չէինք սպասում, որ այդպես կլինի: Շատ կարևոր մրցաշար էր. եթե դադարեցրին, ուրեմն իսկապես վիրուսն արդեն շատ էր տարածվել: Եթե 2 օր ուշ հետաձգեին, վստահ եմ՝ էլի վարկանիշ ձեռք բերած կլինեինք: Կարող էին մի փոքր էլ ուշ հետաձգել , բայց վախ կար, որ ճանապարհները՝ թե՛ օդային, թե՛ ցամաքային, կփակվեին»,- ասում է Մեհրաբյանն ու ընդգծում, որ մարզումային պայմանների սահմանափակ լինելու պատճառով հիմա իրենց գործն ավելի է բարդացել.
«Դժվար է լինելու, քանի որ հիմա մարզվելու պայմանները շատ սահմանափակ են: Մարզիկներին առաջադրանք եմ տվել ամեն մեկն իր բակում մարզվի, որպեսզի մարզավիճակը չկորցնեն, մինչև տեսնենք՝ ինչ է լինելու:
Կարևոր քաշերում ունենք լավ ներկայացուցիչներ, ովքեր դեռ կարող են վարկանիշ նվաճել: Սպասում ենք մրցաշարի վերսկսկմանը»,- ասում է Ռաֆայել Մեհրաբյանը:
Խոսելով Կորյուն Սողոմոնյանի ելույթից՝ Մեհրաբյանն ընդգծում է, որ փորձի ու վարպետության շնորհիվ մեր մարզիկը կարողացավ վարկանիշ նվաճել.
«Կորյունի մրցակիցը բավականին ուժեղ բռնցքամարտիկ էր Իսրայելից՝ ազգությամբ հայ: Նրան վաղուց ճանաչում էինք, մինչ այս էլ Կորյունը մրցել էր Դավիթի հետ ու դարձյալ հաղթել էր: Իհարկե, այսօրվա դրությամբ նա բավականին աճել էր, շատ լարված պայքար ընթացավ: Փորձը և վարպետությունը Կորյունին օգնեցին հաղթել ու վարկանիշ ձեռք բերել»:
Օլիմպիական ուղեգրին շատ մոտ էր նաև 57 կգ քաշային Արթուր Բազեյանը. մեր մարզիկը մեկնարկում հաղթել էր Լեհաստանը ներկայացնող Մացեյ Յոզվիկին՝ մրցավարների միաձայն որոշմամբ, սակայն 1/8 եզրափակչում պարտվեց ուկրաինացի Միկոլա Բուցենկոյին ու լքեց պայքարը։
«Արթուրը պարտվեց բավականին փորձառու ու միջազգային հարթակներում շատ ճանաչված բռնցքամարտիկի, բայց Արթուրն արեց ամեն ինչ: Ես նրանից հույսս չեմ կտրում: Հավանական է՝ մյուս վարկանիշային մրցաշարին ավելի լավ կմասնակցի»,- ասում է Ռաֆայել Մեհրաբյանը:
Սպասելիքները մեծ էին նաև 51 կգ քաշային Անուշ Գրիգորյանից, որը սակայն հենց մեկնարկում պարտություն կրեց իտալացի Ջիորդինա Սորենտինոյից: Չնայած պարտությանը՝ գլխավոր մարզիչը գոհ է մեր մարզուհու կատարած աշխատանքից.
«Անուշը դեռ լավ մարզավիճակում չէր, բայց ես իրենից գոհ եմ: Բավականին ժամանակ հիվանդ էր, չկարողացավ լիարժեք պատրաստվել, համենայն դեպս նա պարտվեց մի մարզուհու, որն իր քաշային կարգում, կարող եմ ասել, ամենաուժեղն էր: Իրականում չնչին տարբերությամբ պարտվեց:
Համոզված եմ՝ եթե Անուշը երկրորդ անգամ հանդիպեր այդ բռնցքամարտիկի հետ, անպայման կհաղթեր, քանի որ նորից եմ կրկնում՝ հավաքների ժամանակ նա մի փոքր հիվանդացավ ու չկարողացավ լիովին վերականգնվել»:
Լոնդոնի վարկանիշային մրցաշարի մեկնարկային օրերում հաղթանակներ տարան Հայաստանի ներկայացուցիչներ Անի Հովսեփյանը, Արման Դարչինյանն ու Գոռ Ներսիսյանը: Գլխավոր մարզիչը հույսեր է կապում այս մարզիկների հետ ու վստահություն հայտնում՝ մրցաշարի վերսկսումից հետո նրանք շարունակելու են հաղթարշավն ու անպայման ուղեգրեր են նվաճելու.
«Անին բացարձակ առավելությամբ հաղթեց չեխ բռնցքամարտիկին, բավականին բարդ հակառակորդ էր: Անին հաջորդ մենամարտն անցկացնելու է աշխարհի չեմպիոն, թուրք բռնցքամարտիկի հետ և ես չեմ կասկածում, որ Անին հաղթելու է: Թուրք մարզիկին հաղթելու դեպքում՝ Անին վարկանիշ ձեռք կբերի: Համոզված եմ, որ նա կարող է հաղթել»,- ասում է Ռաֆայել Մեհրաբյանը:
Հավաքականի գլխավոր մարզիչը Լոնդոն մեկնելուց առաջ հույս էր հայտնել՝ իրենք կկարողանան 3-5 օլիմպիական ուղեգիր նվաճել: Ասում է՝ այս հույսերը շարունակում են իրատեսական մնալ.
«Նվազագույնը՝ 3, առավելագույնը 5 օլիմպիական ուղեգիր, կարծում եմ, կնվաճենք: Չեմ ցանկանում ժամանակից առաջ ընկնել, բայց գուցե ավելի շատ էլ կարողանանք: Ծանր քաշային Գուրգեն Հովհաննիսյանից մեծ սպասելիքներ ունեմ, Նարեկ Մանասյանից, Արման Դարչինյանից, Գոռ Ներսիսյանից. Գոռը շատ անկանխատեսելի բռնցքամարտիկ է: Կարող է իմ սպասածից էլ շատ տալ: Լոնդոնում նա հաղթեց այն մարզիկին, որին ընկերական մենամարտի ժամանակ պարտվել էր:
Չեմ ցանկանում նախօրոք ասել. օրինակ Դարչինյան Արմանի հակառակորդը շատ ուժեղ էր, բայց նա ցույց տվեց, որ կարող է հաղթել: Առաջին մենամարտում մեծ առավելությամբ հաղթեց իտալացի մարզիկին, որը Եվրոպական խաղերի ֆինալիստ էր: Բաչկովի հաղթանակի վրա ևս չեմ կասկածում: Բաչկովը հանդիպելու է ռուս բռնցքամարտիկի հետ, բայց ունի բոլոր հնարավորությունները հաղթելու համար: Մի խոսքով, կան տղաներ, որոնք անպայման վարկանիշ ձեռք կբերեն»,- վստահեցնում է Ռաֆայել Մեհրաբյանը:
Վարկանիշային մրցաշարը՝ վերսկսվելուն պես, կշարունակվի մրցումային 3-րդ օրվա արդյունքերով՝ արդեն իսկ կայացած վիճակահանությամբ: Ռաֆայել Մեհրաբյանն ասում է՝ սա մի կողմից լավ է, քանի որ ճանաչելով առաջիկա մրցակիցներին՝ կկարողանան ավելի լավ նախապաստրատվել:
«Միայն մեկ բան կարող է խանգարել. այս համաճարակի պատճառով չեմ կարողանում իրականացնել այն մարզումային ծրագիրը, ինչը պլանավորել եմ: Առաջիկա 14 օրը մեր մարզիկները կլինեն հսկողության տակ, կմարզվեն իրենց տներում: Ամեն օր նրանց հետ կապի մեջ եմ: Տեսնենք՝ ինչով կավարտվի այս ամենը»:
Արտակարգ դրության և կարանտինի ավարտից հետո Մեհրաբյանն ասում է՝ առանց մեկ օր կորցնելու հավաք են անցկացնելու.
«Երբ հայտնի կլինի, թե Լոնդոնի մրցաշարը երբ է շարունակվելու, արդեն կպլանավորենք, թե որտեղ կարող ենք անցկացնել հավաքը, ապահով տեղում: Ի սկզբանե նախատեսել էինք, որ Լոնդոնի մրցաշարի ավարտից հետո նախ հավաք ենք անցկացնելու Ծաղկաձորում, իսկ հետո՝ Օլիմպավանում, և պատրաստվելու ենք Ֆրանսիայի վարկանիշային մրցաշարին: Բայց հիմա պլանները մի փոքր փոխվել են, չնայած կարծում եմ՝ դարձյալ Ծաղկաձորում ու Օլիմպավանում հավաքներ կանցկացնենք այն բանից հետո, երբ իմանանք, թե Լոնդոնի մրցաշարը երբ է շարունակվելու: Դեռևս ոչ մի հստակություն չկա, գուցե Ֆրանսիայի մրցաշարն էլ հետաձգվի, չգիտենք:
Ամեն դեպքում, եթե Օլիմպիական խաղերը կայանան, ամեն ինչ կանենք ըստ արժանվույն պատրաստվելու և լավ հանդես գալու համար: Չեմ կասկածում, որ կարող ենք լիովին վերականգնվել ու նախապատրաստվել խաղերին, քանի որ մեր մարզիկները գրեթե ամբողջ տարվա ընթացքում անցել են բոլոր նախապաստրատական փուլերը, լավ մարզումներ են անցկացրել: Կարծում եմ՝ վերջին մրցաշարերի փոփոխությունները մեզ չեն խանգարի»,- ասում է Ռաֆայել Մեհրաբյանը:
Ինչ վերաբերում է մրցաշարի դադարեցման հետևանքով կրած հնարավոր ֆինանսական կորուստներին՝ հավաքականի գլխավոր մարզիչն ասում է՝ Լոնդոնից խոստացել են որոշակի գումարների վերադարձ իրականացնել.
«Մեր կողմից վճարված, բայց չօգտագործված ծառայությունների գումարները, օրինակ 14 օր պետք է մնայինք, բայց 5-6 օր մնացինք, խոսակցություն եղավ, որ կվերարձնեն: Ֆեդերացիան կամ ՀԱՕԿ-ը, հավանաբար, պետք է զբաղվեն այդ հարցով: Ամեն դեպքում, Բռնցքամարտի Հայաստանի Ազգային ֆեդերացիայի նախագահ Հովհաննես Հովսեփյանն ամբողջ ընթացքում մեր կողքին է եղել ու ոչ մի խնդիր չենք ունեցել»:
Ռաֆայել Մեհրաբյանի խոսքով, Լոնդոնի օլիմպիական վարկանիշային մրցաշարը կարող է անցկացվել մայիսին. այս առումով վերջնական որոշում կկայացվի մոտ մեկ շաբաթից:
Հիշեցնենք՝ բռնցքամարտի Հայաստանի օլիմպիական հավաքականը Լոնդոն էր մեկնել 10 մարզիկով՝ 52 կգ քաշային Կորյուն Սողոմոնյանը, 57 կգ Արթուր Բազեյանը, 63 կգ Հովհաննես Բաչկովը, 69 կգ Գուրգեն Մադոյանը, 75 կգ Արման Դարչինյանը, 81 կգ Գոռ Ներսիսյանը, 91 կգ Նարեկ Մանասյանը և գերծանր քաշային Գուրգեն Հովհաննիսյանը: Կանանց պայքարում հանդես են եկել 51կգ Անուշ Գրիգորյանն ու 69 կգ Անի Հովսեփյանը:
Նարե Հովհաննիսյան
