Երևանի Վազգեն Սարգսյանի անվան Հանրապետական ստադիոնի մամուլի ասուլիսների սրահում տեղի ունեցավ ՀՖՖ նախագահ Արմեն Մելիքբեկյանի և Վրաստանի ֆուտբոլի ֆեդերացիայի նախագահ Լևան Կոբիաշվիլիի համատեղ ասուլիսը։ Ասուլիսի շրջանակում երկու կողմերը հայտարարեցին Երիտասարդական ԱԱ համատեղ անցկացնելու հայտ ներկայացնելու մտադրության մասին։
ՀՖՖ նախագահ Արմեն Մելիքբեկյանը հայտարարել է, որ մրցաշարի անցկացման վերաբերյալ քննարկումները եղել են դեռևս անցած տարի։
«Հաշվի առնելով ՀՖՖ և ՎՖՖ բարիդրացիական հարաբերությունները և փայլուն փոխգործակցությունը տարբեր ոլորտներում՝ միասին որոշել ենք հայտ ներկայացնել ՖԻՖԱ-ին՝ 2029 երիտասարդական աշխարհի առաջնությունը համատեղ անցկացնելու վերաբերյալ։ Նախնական պայմանավորվածությունը դեռևս անցած տարի է ձեռք բերվել, մի քանի հանդիպում եղել է Թբիլիսիում։ Պետք է նշել, որ եթե կարողանանք այս հայտը հաղթել, մեզ համար սա կլինի հրաշալի հաղթանակ, քանի որ սա ՖԻՖԱ-ի անցկացվող խոշորագույն մրցաշարերից է, և նման կարգի մրցաշարը կբարձրացնի երկու երկրների ֆուտբոլի մակարդակը», — հայտարարեց Արմեն Մելիքբեկյանը։
Արմեն Մելիքբեկյանի խոսքով՝ ՈՒԵՖԱ-ն արդեն հաստատել է, որ աջակցելու է Հայաստանին ու Վրաստանին համատեղ հայտի ներկայացման հարցում։ Այդ հարցում կլինի նաև Լևան Կոբիաշվիլիի օգնությունը։
«Շնորհակալ եմ այստեղ լինելու համար։ Ես ուրախ եմ, որ մենք միասին ենք հանդես գալիս համատեղ մրցաշարն անցկացնելու հայտով, քանի որ մենք ոչ միայն զուտ հարևաններ ենք, այլև բարեկամներ։ Պետք է ասեմ, որ այս հարցում շատ կարևոր էր Վրաստանի հավաքականի՝ ԵՎՐՈ 2024-ի եզրափակիչ փուլ դուրս գալու գործոնը։
Բացի դրանից, ես՝ որպես ՈՒԵՖԱ-ի գործկոմի անդամ, վստահեցնում եմ ու հաստատում եմ, որ ՈՒԵՖԱ-ի գործկոմը միանշանակ և աներկբա աջակցելու է Հայաստանի և Վրաստանի համատեղ հայտին», — ասաց Կոբիաշվիլին։
Արմեն Մելիքբեկյանն իր հայտարարության մեջ խոսեց մարզումային խաղադաշտերի և ենթակառուցվածքների կառուցման անհրաժեշտության մասին։ ՀՖՖ նախագահի խոսքով, սերտ աշխատանքներ են տարվում ՀՀ կառավարության հետ։
Նախատեսվելու է երկու ստադիոն կառուցել Վրաստանի սահմանին մոտ։ Ըստ նախնական պայմանավորվածության, առաջին ստադիոնը կկառուցվի Դիլիջան — Իջևան հատվածում, մյուս ստադիոնն, ամենայն հավանականությամբ, կլինի Լոռու մարզում՝ Վանաձոր քաղաքում։ Օգտագործվելու է նաև Հանրապետական ստադիոնը։ Արմեն Մելիքբեկյանը հույս հայտնեց, որ ազգային ստադիոնի գաղափարը նույնպես իրականություն կդառնա՝ այս առումով նույնպես կառավարության հետ համագործակցություն կա։
Լևան Կոբիաշվիլին հույս հայտնեց, որ երկու երկրներին կհաջողվի առանց խնդիրների անցկացնել մրցաշարը, քանի որ մինչև այսօր եղել է նման կարգի առաջնությունների անցկացման փորձ։
«Վրաստանը մինչև այսօր անցկացրել է Եվրոպայի մինչև 19 և 21 տարեկանների առաջնությունը։ Հայաստանը մեծ հաջողությամբ ընդունել է Եվրոպայի մինչև 19 տարեկանների առաջնությունը, իսկ այս տարի հյուրընկալել է Ֆուտզալի Չեմպիոնների լիգան։ Սա մեծ մրցաշարը բարեհաջող հյուրընկալելու լուրջ գրավական է», — հայատարեց Լևան Կոբիաշվիլին։
Ասուլիսի ավարտին Արմեն Մելիքբեկյանը հաջողություն մաղթեց Վրաստանի իր գործընկերոջն ու ազգային հավաքականին՝ առաջիկա Եվրոպայի առաջնությունից առաջ։ Դրան ի պատասխան, Լևան Կոբիաշվիլին հույս հայտնեց, որ մոտ ապագայում Հայաստանի ընտրանին նույնպես դուրս կգա որևէ մեծ մրցաշարի եզրափակիչ փուլ։
Հավելենք, որ 2029 թվականի աշխարհի երիտասարդական առաջնության անցկացման այլ հայտ չկա։ Առաջնության անցկացման ժամկետների մասին ՀՖՖ-ն լրացուցիչ կհաղորդի հայտը բարեհաջող հաղթելու դեպքում։ Դա նախատեսվում է հաջորդ՝ 2025 թվականին։
Ռոբերտ Գասպարյան
