Նոր սպորտաձև, մեդալային ֆուրոր. Երևանում կայացավ Սթրոնգմենի Եվրոպայի առաջնությունը

Երևանը դարձել է ու շարունակում է մնալ մեծ մրցաշարերի անցկացման և հյուրընկալման վայր։ Ընդ որում, մեր հարկի տակ անցկացվում են ինչպես ամենամասսայական սպորտաձևերի, այնպես էլ նոր տարածում ստացող մարզաձևերի մրցաշարեր։

Այդպես, Երևանում օրերս կայացավ Սթրոնգմենի Եվրոպայի առաջնությունը, որին մասնակցում էր ավելի քան 40 մարզիկ 10 երկրից։ Մրցումներն անցկացվեցին 3 վարժությունում.

Zercher — մարզիկը կքանստած դիրքից առնում է ծանրաձողն իր բիցեպս մկանների մեջ ու կանգնում է  ոտքի,

Log Lift — Մարզիկը բարձրացնում է խողովականման ծանրաձողը, 

Deadlift — Մարզիկը գետնից պոկում է ծանրաձողը (երկրպագուներին այս վարժությունն ավելի ծանոթ է որպես ձգում կամ силовая тяга)։

Լավագույնները որոշվում էին 11 քաշային կարգերում։ Ստեփան Շահումյանի անվան հրապարակում հավաքված երկրպագուները հետևեցին բարդ ու անզիջում պայքարի։ Հատկանշական է, որ նրանք, ի թիվս անծանոթ մարզիկների, մասնակիցների շարքում տեսան նաև հայտնի ծանրորդներ Իզաբելյա Յայլյանին և Տաթև Հակոբյանին։ Նրանք երկուսն էլ ոսկե մեդալ նվաճեցին Հայաստանի համար։ Իզաբելան կանգնեց պատվո հարթակի առաջին աստիճանին՝ 54 կգ քաշային կարգում, Տաթևը՝ 82 կգ։ Եվրոպայի չեմպիոնի տիտղոս նվաճեցին նաև 70 կգ քաշային Յուրի Սաքունցը, 80 կգ քաշային Գևորգ Առաքելյանը, 105 կգ քաշային Արտյոմ Խուգոյանը։ Հայաստանի դրոշի տակ հանդես եկող Իննա Ժիլկինան, ինչպես նաև Սամվել Սարգսյանը չեմպիոնական ոսկին նվաճեցին իրենց քաշային կարգերի «մաստերս» անվանակարգում (40+ տարիքային խումբ)։

Հետաքրքիր պայքար գրանցվեց 120 կգ քաշային կարգում։ Ոսկե մեդալի հավակնում էր երկու մարզիկ՝ Շոթա Գոգոբերիշվիլին՝ Վրաստանից, և Վալերի Գազաևը, որը ներկայացնում էր Ուկրաինան։ Համառ ու անզիջում պայքարում, ընդամենը 1 կգ առավելությամբ Եվրոպայի չեմպիոնի կոչումը նվաճեց ուկրաինացի մարզիկը։ Հատկանշական է, որ Գազաևը լինելով ակտիվ մարզիկ, գլխավորում է Սթրոնգմեն միջազգային ֆեդերացիան։

«Ինձ համար մեծ պատիվ էր ներկայացնել իմ երկիրը այստեղ՝ Երևանում՝ մասնակցելով Եվրոպայի առաջնությանը։ Ես իմ օրինակով ցանկանում եմ ապացուցել, որ մարզական կառույցի ղեկավար լինելը ոչ մի կերպ չի կարող խանգարել առողջ ապրելակերպով ապրող և հաղթելու ցանկություն ունեցող մարդուն՝ լինել լավագույնը Եվրոպայում և ամբողջ աշխարհում։

Այսօրվա պայքարը շատ լարված ստացվեց։ Ես ցանկանում եմ շնորհակալություն հայտնել բոլոր մասնակիցներին։ Ես չեմ ցանկանում օգտագործել «մրցակից» տերմինը, քանի որ մենք բոլորս միմյանց շատ լավ ճանաչում ենք ու լավ ընկերներ ենք։ Այնպես որ, ամեն անգամ մենք մեծ բավականություն ենք ստանում, երբ հավաքվում ենք, իսկ Երևանն աշխարհի ամենահյուրընկալ և ընկերասեր քաղաքներից է», — ArmSport-ի հետ զրույցում ասել է Վալերի Գազաևը։

Masters անվանակարգի գերծանր քաշային կարգում մասնակցում էր երկու մարզիկ։ Հայաստանի ներկայացուցիչ Սամվել Խաչատրյանն արեց ամեն ինչ՝ ոսկե մեդալ նվաճելու համար, սակայն Գերմանիայից ժամանակ Մարկուս Ֆրանկեն անսասան ու անկոտրում էր։ Ձախողելով ձգում վարժության միայն վերջին մոտեցումը՝ 53-ամյա մարզիկն արժանիորեն դարձավ եվրոպայի չեմպիոն։ Մեզ հետ զրույցում գերմանացի մարզիկն անկեղծորեն նշեց, որ հաճելիորեն զարմացած է Երևանի հյուրընկալությունից։

«Մրցաշարին պատրատվելու կամ մարզավիճակ հավաքելու հատուկ մեթոդիկա կամ գաղտնիք չունեմ։ Ես միշտ եմ ձգտել մնալ լավ մարզավիճակում, միշտ հաճախել եմ մարզասրահ։ Նույնիսկ երբ եկավ ժամանակն առողջությանն ավելի մեծ ուշադրություն դարձնելու, ես ասացի ինքս ինձ, որ սպորտով զբաղվելուց ավելի լավ եղանակ չկա։ Այդպես, ես 53 տարեկանում այսպիսի մարզավիճակ եմ պահպանում։

Երևանում առաջին անգամ էի, հաճելիորեն զարմացած եմ այստեղի մարդկանցից։ Ինձ ընդունեցին շատ բարեհամբույր կերպով, այստեղ բոլորը ժպտերես են, բարին կամեցող։ Հնարավորության դեպքում անպայման կայցելեմ Հայաստան, քանի որ ինձ ասացին, որ այստեղ շատ գեղեցիկ է նաև մայրաքաղաքից դուրս», — ասել է Մարկուս Ֆրանկեն։

Երևանում կայացած այս մրցաշարը կազմակերպել էր Սթրոնգմենի միջազգային ֆեդերացիան՝ Հայաստանի ֆեդերացիայի հետ համատեղ։ Հայաստանյան կառույցի ղեկավար Արտավազդ Նալբանդյանի խոսքով, մրցաշարն ավելի քան կայացած կարելի է համարել։ Մասնակիցների միջև կար մարզական պայքար, մրցավայր եկած երկրպագուները մինչև վերջին պահը հաճելի լարվածությամբ են հետևել առաջնությանը։

«Մեզ համար կարևոր է տեսնել երկրպագուների դեմքին ուրախություն։ Ցանկացած սպորտաձև արվում է երկրպագուների համար, այնպես չէ՞։ Այս մրցաշարին ես նկատեցի, որ բոլոր երկրպագուները ամեն պահի սրտատրոփ սպասում էին հաջորդ մասնակցին և հետաքրքրությամբ հետևում էին բոլոր մարզիկների ելույթներին։

Եվրոպայի առաջնությունում Հայաստանի միանգամից 7 մարզիկ կանգնեց պատվո հարթակի առաջին աստիճանին։ Սա շատ լուրջ նվաճում է Հայաստանում զարգացող այս սպորտաձևի համար։ Ինձ համար այս մեդալներից զատ կարևոր է փաստել, որ ամեն ինչ անցավ բարձր մակարդակով։ Շատ հաճելի է մրցաշարի ավարտին տեսնել բոլոր-բոլորի ուրախ դեմքերը», — Armsport-ին պատմել է Արտավազդ Նալբանդյանը։ 

Սթրոնգմենի Եվրոպայի առաջնությունից հետո մեր մարզիկների առաքելությունը չի ավարտվում։ Շատ շուտով նրանք դառնալու են է՛լ ավելի խոշոր մրցաշարի մասնակից։ Գերմանիայում նախատեսված է անցկացնել Սթրոնգմենի աշխարհի առաջնությունը, որտեղ նույնպես մեդալային ակնկալիքները մեծ են։

Ռոբերտ Գասպարյան