Բելգիայի հավաքականի գլխավոր մարզիչ Դոմենիկո Տեդեսկոն պատասխանել է այն հարցին, թե ինչու Մադրիդի «Ռեալի» դարպասապահ Տիբո Կուրտուան չի ընդգրկվել թիմի՝ 2024 թվականի Եվրոպայի առաջնության հայտացուցակում։
Մրցաշարը կկայանա Գերմանիայում հունիսի 14-ից հուլիսի 14-ը։ Բելգիան հայտնվել է E խմբում, որտեղ կխաղա Ռումինիայի, Սլովակիայի և Ուկրաինայի հետ:
«Տիբոն իր մարմինը բոլորից լավ գիտի: Ամեն ինչ պարզ էր հենց սկզբից։ Նա նոր է խաղադաշտ վերադարձել, և ամեն երեք-չորս օրը մեկ խոշոր մրցաշարում խաղալը դժվար է: Մենք հաշվի առանք այս տեղեկությունը և համարեցինք, որ Կուրտուան պատրաստ չէ Եվրոյին»,- Տեդեսկոյի խոսքը մեջբերել է RTBF-ն։
32-ամյա Կուրտուան վերջերս է ապաքինվել ծնկի վնասվածքից: 2023/24 մրցաշրջանում նա «Ռեալի» կազմում անցկացրել է 4 հանդիպում, որոնցում ոչ մի գոլ բաց չի թողել։
2023 թվականի ամռանը Կուրտուան լքել էր Բելգիայի հավաքականը Եվրո-2024-ի ընտրական մրցաշարի Էստոնիայի դեմ խաղից առաջ (3:0)։ Ֆուտբոլիստի հեռանալու պատճառը Տեդեսկոյի՝ ավագի թևկապը ոչ թե իրեն, այլ հարձակվող Ռոմելու Լուկակուին տալու պատճառով դժգոհությունն էր։
