Ֆոտոլրագրողի հուշեր․ ՖԱ Երևան՝ առանց հաղթանակ, առանց միավոր

Հայկական ֆուտբոլում չգրված ավանդույթ կա։ Երեկ բացվեց ֆուտբոլային ակումբ, վաղը արդեն այդ ակումբի ապագան դառնում է մշուշոտ։ Գրեթե ամեն անգամ, երբ նման բացվող կամ վերաբացվող ակումբների ներկայացման պաշտոնական արարողությանը հրավիրում են լրագրողներիս, հաճախ հնչում են հարցեր, թե որքանով է այս կամ այն ակումբը ամուր ֆինանսական հիմքերի վրա կանգնած։ Հիմնականում ակումբի ստեղծման նախաձեռնողները հեգնական են պատասխանում լրագրողների հարցերին, կարծես թե չցանկանալով ընդունել փաստը, որ, այո՛, հայկական իրականությունում դա նորմալ պրակտիկա է, երբ ակումբը հաշվված ամիսների կյանք կարող է ունենալ։ Փաստացի, հայկական ակումբային ֆուտբոլի պատմությունը դա ավելի շուտ կեսճանապարհին կանգնած ու անհետացած ակումբների պատմություն է, քան նվաճումների ու ակումբային պատմության շարունակականության։

Հերթական նման դեպքը գրանցվեց ընթացիկ մրցաշրջանում, երբ աշնանային հատվածից հետո առաջնությունը լքեց ՖԱ «Երևանը»։ ՖԱ «Երևանը» վերաստեղծված ակումբի փորձ էր։ Նրա մուտքը առաջնություն մեծ շուքով չեղավ։ Տևական ժամանակ ակումբի ֆեյսբուքյան էջը կասկածելի լռություն էր պահպանում։ Հետո ակտիվացավ․ ակտիվացավ այնպես, որ ժամանակի ընթացքում պարզ դարձավ՝ ՖԱ «Երևան» ակումբի ամենահետաքրքիր մասնիկը ոչ այդքան ֆուտբոլային է, որքան համացանցային։ Ցանկանում եմ, որ մենք վերհիշենք այն լուսանկարները, որոնք լրահոսի հետ գնացել են պատմության գիրկը՝ վերանայենք մեր առաջնության մրցաշարային աղյուսակում ամուր 10-րդ տեղից կառչած ակումբի խաղերի լավագույն դրվագները։ Ափսոս միայն, որ մենք այդպես էլ ականատեսը չեղանք ակումբի վաստակած առաջին միավորին, կամ հաղթանակին։

2019/2020 մրցաշրջանի առաջին տուրում «Արարատը» Հանրապետական ստադիոնում ընդունեց հենց ՖԱ «Երևանին»։ Չէր կարելի ընտրել այլ խաղ, քանի որ միշտ էլ հետաքրքիր է առաջնություն վերադարձող նախկինում բավականին ուժեղ ակումբի խաղը նկարելը։ Այդ ժամանակ դեռ բոլորս լիահույս էինք, որ ՖԱ «Երևանի» համար այլ ճակատագիր է նախատեսված։ Լուսանկարում երկու ակումբների ավագները բարձրացնում են նոր մեկնարկող առաջնության խորհրդանիշը, ինչպես նաև ՀՀ պետական դրոշը։

Թիմը պայքարեց մինչև վերջ, սակայն խուսափել պարտությունից չհաջողվեց։ 1-0 հօգուտ «Արարատի»։

ՖԱ «Երևանի» դեպքում մի ամբողջ պատմություն է գլխավոր մարզչի թեման։ Նրանք կարծես փոխվում էին ավելի արագ, քան ֆուտբոլիստները խաղադաշտում։ Այս լուսանկարում Նեբոյշա Պետրովիչն է, որը թերևս աչքի ընկավ յուրահատուկ մի որոշմամբ խաղերից մեկում՝ լուսանկարվելով թիմի հետ, երբ մեկնարկային կազմը խաղադաշտում կանգնում է ֆոտոլրագրողների առջև։ Դժվար է ասել, թե արդյո՞ք աշխարհում նման նախադեպ եղել է։ Իհարկե, ոչ ոք չի բացառում նման քայլի հնարավորություն, սակայն առիթն ու պատճառը հասկանալ մենք՝ լրագրող-ֆոտոլրագրողներս չկարողացանք։

5-րդ տուրում ՖԱ «Երևանի» մրցակիցը Հայաստանի բազմակի չեմպիոն ՖԱ «Փյունիկն» էր։ Դիմադրել փորձառու փյունիկցիներին ՖԱ «Երևանի» ֆուտբոլիստները չկարողացան․ արդյունքը եղավ 4-1 հաշիվը։

7-րդ տուրում ՖԱ «Երևանը» հյուրընկալվել էր «Ալաշկերտին», իսկ Հայաստանի մայրաքաղաքի պատվավոր անունը կրող ակումբը փոխել էր գլխավոր մարզչին։ Կարծես թե Վլադ Գոյանը խոշոր հաշվով հերթական պարտությունից հետո հասկանում է, որ ինքը նույնպես երկար չի մնալու վարդագույն Երևանում։

5-1 հօգուտ «Ալաշկերտի»։ ՖԱ «Երևանի» միակ գնդակի հեղինակ՝ Ռամազան Իսաև։

11-րդ տուրում ՖԱ «Երևանը» ներկայացավ նոր գլխավոր մարզիչով։ Կարծում եմ անունը էական չէ այս դեպքում․․․ լավ, լավ կգրենք՝ ՖԱ «Երևանի» ֆուտբոլիստները «Նոա» -ի դեմ խաղում դաշտ դուրս եկան Խոսե Անտոնիո Կալդաս դե Օլիվեյրայի գլխավորությամբ։

Պայքար, իհարկե, կար, բայց արդյունքը՝ ինչպես միշտ․ ՖԱ «Երևանը» պարտվեց։

Այո՛, այս խաղում էլ գոլի հեղինակ նրանք կարողացան դառնալ։ 3-1 հօգուտ «Նոա»-ի։ Միակ գոլը ՖԱ «Երևանի» կազմում հեղինակեց Ջեֆերսոն Բարբոսա Դա Կրուզը։

13-րդ տուրում ՖԱ «Երևանը» փորձեց կանգնել գործող չեմպիոն «Արարատ-Արմենիայի» ճանապարհին։ Փորձը մնաց փորձ, քանի որ պատմության մեջ մնաց միայն հաշիվը՝ 7-2. Հուսամ հասկանում եք, թե ով հաղթեց։

Արդեն այս ժամանակ պարզ էր, որ ակումբի հետ մի բան կատարվում է ու նման կերպ շարունակվել այս պատմությունը չի կարող։ Անգամ կատակներ էին պտտվում ակումբի մասին, որ այն՝ «Հայաստանի բարձրագույն խմբի պաշտոնական երեք միավոր բաժանողն է»։

Կատակը մնաց կատակ, սակայն պատմությունը ուրախ ավարտ չունեցավ։ Արդեն այս տարի՝ 2020 թվականին հայտնի դարձավ, որ ՖԱ «Երևանը» դուրս է գալիս ընթացիկ առաջնությունից, իսկ նրա հետ խաղերում թիմերին գրանցվելու է տեխնիկական հաղթանակ։ Առաջնությունն այս պահին ժամանակավոր դադար է առել՝ կապված կորոնավիրուսի հետ, սակայն ձմեռային դադարից հետո վերսկսված առաջնության մեկնարկային երկու տուրերում ՖԱ «Երևանը» պաշտոնապես ստանձնեց նրանց կատակով տրված կարգավիճակը՝ «Առաջնության պաշտոնական երեք միավոր բաժանող»։

Գևորգ Ղազարյան՝ Armsport-ի ֆոտոլրագրող