Ինչ մարզավիճակում են արտերկրում հանդես եկող հայ ֆուտբոլիստները, որոնք հրավիրվել են հավաքական

Հայաստանի ազգային հավաքականը հաջորդ ամսվա սկզբին կսկսի պատրաստվել Եվրո-2024-ի ընտրական փուլի հանդիպումներին։ Սեպտեմբերի 8-ին Հայաստանի հավաքականը կհյուրընկալվի Թուրքիային, իսկ 3 օր անց՝ Երևանում, կընդունի Խորվաթիայի հավաքականին։

Ազգային հավաքականի գլխավոր մարզիչ Ալեքսանդր Պետրակովն արդեն հրապարակել է հայտացուցակը։ Armsport-ն անդրադարձել է Հայաստանի հավաքականի հայտացուցակում ընդգրկված ֆուտբոլիստներին, որոնք հանդես են գալիս արտերկրում։

Հայտացուցակը

Դարպասապահներ

Օգնյեն Չանչարևիչ — «Ալաշկերտ»
Արսեն Բեգլարյան — «Արարատ-Արմենիա»
Ստանիսլավ Բուչնև — «Փյունիկ»

Պաշտպաններ
Վարազդատ Հարոյան — «Աստանա» (Ղազախստան)
Կամո Հովհաննիսյան — «Աստանա» (Ղազախստան)

Անդրե Չալըշըր — «Բրոմապոյկարնա» (Շվեդիա)

Գեորգի Հարությունյան — «Կրասնոդար» (Ռուսաստան)
Նաիր Թիկնիզյան — «Լոկոմոտիվ» (Մոսկվա, Ռուսաստան)

Ստյոպա Մկրտչյան — «Օսիեկ» (Խորվաթիա)

Տարոն Ոսկանյան — «Ալաշկերտ»
Ժիրայր Մարգարյան — «Ուրարտու»
Էրիկ Փիլոյան — «Ուրարտու»
Սերգեյ Մուրադյան — «Նոա»

Կիսապաշտպաններ

Էդուարդ Սպերցյան — «Կրասնոդար» (Ռուսաստան)

Տիգրան Բարսեղյան — «Սլովան» (Սլովակիա)

Վահան Բիչախչյան — «Պոգոն» (Լեհաստան)

Լուկաս Սելարայան — «Ալ-Ֆաթեհ» (Սաուդյան Արաբիա)

Ուգոչուկվու Իվու — «Ռուբին» (Կազան, Ռուսաստան)

Արտակ Դաշյան — «Փյունիկ»
Վբեյմար Անգուլո — «Ալաշկերտ»
Արթուր Սերոբյան — «Արարատ-Արմենիա»

Հարձակվողներ

Հրանտ-Լեոն Ռանոս — «Բորուսիա» (Մյոնխենգլադբախ, Գերմանիա)

Նորբերտո Բալեկյան — «Բոկա Խունիորս» (Արգենտինա)

Սարգիս Ադամյան — «Քյոլն» (Գերմանիա)

Բացակաները

Հավաքական չհրավիրված բոլոր ֆուտբոլիստներին անդրադառնալու կարիք չկա։ Նրանց մասին հարցերին կարող է պատասխանել գլխավոր մարզիչը։ Գուցե նա այդպես է որոշել, գուցե կան խաղացողներ, որոնք անձնական խնդիրներ ունեն և այլն։ Այս հոդվածում անդրադարձել ենք արտերկրում հանդես եկող միայն այն խաղացողներին, որոնք ընդգրկված են Հայաստանի ազգային հավաքականի առաջիկա խաղերի համար հրապարակված հայտացուցակում։

Պաշտպաններ

Հայաստանի հավաքականի երկու պաշտպաններ հանդես են գալիս «Աստանայում»։ Ղազախստանի առաջնությունն անցկացվում է գարուն-աշուն ձևաչափով, և այդ պատճառով Վարազդատ Հարոյանն ու Կամո Հովհաննիսյանը թիմի հետ ոչ թե պատրաստվել են նոր մրցաշրջանին, այլ շարունակում են պայքարել չեմպիոնության և Կոնֆերենցիաների լիգայի խմբային փուլի ուղեգրի համար։

Վարազդատ Հարոյանը վերջին շրջանում կորցրել էր տեղը թիմի մեկնարկային կազմում։ Լատվիայի հետ հանդիպումից հետո «Աստանան» 14 հանդիպում է անցկացրել բոլոր մրցաշարերում։ Հարոյանը ընդամենը 3 խաղ է ամբողջությամբ անցկացրել խաղադաշտում. 2-ը Ղազախստանի գավաթի, իսկ 1-ը՝ Չեմպիոնների լիգայի խաղարկությունում։ 4 անգամ Հարոյանը մնացել է պահեստայինների նստարանին և 4 խաղի էլ հայտավորված չի եղել։

Օգոստոսի 20-ին կայացած «Կայսարի» հետ ներքին առաջնության խաղում Հարոյանը խաղադաշտում անցկացրել է 12 րոպե։

Կամո Հովհաննիսյանը վերջին 2 ամսում մասնակցել է իր թիմի բոլոր խաղերին և դարձել 2 գոլային փոխանցման հեղինակ։ Կամոն, ի տարբերություն Հարոյանի, ավելի շատ խաղաժամանակ է ստացել։

Անդրե Չալըշըրը, նույնպես չի փոխել ակումբային գրանցումը և հրավիրված ֆուտբոլիստների թվում է, սակայն վնասվածք ունի։ Պաշտպանը բաց է թողել շվեդական «Բրոմապոյկարնայի» վերջին 3 հանդիպումները։ Չալըշըրը վերջին անգամ խաղադաշտ է դուրս եկել օգոստոսի 5-ին՝ Շվեդիայի առաջնության 17-րդ տուրի «Վերնամուի» հետ խաղում, որտեղ էլ փոխարինվել էր 32-րդ րոպեին։

Տրամաբանորեն, եթե Չալըշըրը հրավիրվել է հավաքական, ուրեմն հասցնելու է ապաքինվել մինչև առաջիկա հանդիպումները։

Գեորգի Հարությունյանը Ռուսաստանի Պրեմիեր լիգայի նոր մրցաշրջանի 6 տուրից 5-ում մնացել է իր թիմի պահեստայինների նստարանին։ 19-ամյա պաշտպանը 90 րոպե անցկացրել է խաղադաշտում «Ֆակելի» հետ օգոստոսի 25-ին կայացած հանդիպմանը, որն ավարտվել է 0։0 հաշվով։

Ռուսաստանի գավաթի խաղարկությունում Հարությունյանը մասնակցել է «Սպարտակի» և «Դինամոյի» հետ խաղերին, որտեղ խաղադաշտում անցկացրել է համապատասխանաբար 90 և 83 րոպե։

Նաիր Թիկնիզյանը փայլուն էր սկսել նոր մրցաշրջանը «Լոկոմոտիվի» կազմում։ Եզրային պաշտպանը ՌՊԼ-ի մեկնարկային տուրի «Ռուբինի» հետ խաղում իր թիմի մեկնարկային կազմում էր և դարձավ գոլի հեղինակ։ «Ուրալի» հետ գավաթային խաղում Նաիրը փոխարինման մտավ 2-րդ կեսում և նորից աչքի ընկավ խփած գոլով։ ՌՊԼ-ի երկրորդ տուրում էլ 24-ամյա ֆուտբոլիստը դարձավ դուբլի հեղինակ։

«Սոչիի» հետ օգոստոսի 27-ին կայացած հանդիպմանը Թիկնիզյանն իր թիմի մեկնարկային կազմում էր և մասնակցեց ամբողջ խաղին։

Ստյոպա Մկրտչյանն ամառային տրանսֆերային պատուհանի ընթացքում վարձակալական հիմունքներով տեղափոխվել է խորվաթական «Օսիեկ»։ Երիտասարդ պաշտպանը միանգամից դարձել է թիմի հիմնական կազմի խաղացող և նույնիսկ խփել իր առաջին գոլը նոր թիմի կազմում։

Մկրտչյանը 9 հանդիպում է անցկացրել «Օսիեկի» կազմում։ Վերջին 6 խաղերում պաշտպանը եղել է մեկնարկային կազմում և չի փոխարինվել։ Նա մասնակցել է նաև Կոնֆերենցիաների լիգայի հանդիպումներին։ «Օսիեկը» որակավորման 2-րդ փուլում հաղթահարել էր բոսնիական «Զալաեգերսեգի» արգելքը, իսկ 3-րդ փուլում ճանապարհը զիջել թուրքական «Ադանա Դեմիրսփորին»։ 20-ամյա Մկրտչյանը մասնակցել է բոլոր 4 հանդիպումներին՝ առանց փոխարինման։

Կիսապաշտպաններ

Էդուարդ Սպերցյանը դեռ «Կրասնոդարում» է։ Ամենայն հավանականությամբ, հայ կիսապաշտպանը չի փոխի ակումբային գրանցումն այս տրանսֆերային պատուհանի ընթացքում, որի ավարտին հաշված օրեր են մնացել։ Սպերցյանի ծառայություններով լրջորեն հետաքրքրված էր Ամստերդամի «Այաքսը», սակայն գործարքն այդպես էլ չկայացավ։

Սպերցյանը փայլուն մարզավիճակում է։ ՌՊԼ-ի 6 խաղում 3 գոլ է խփել, բաց է թողել միայն Մոսկվայի «Դինամոյի» հետ գավաթային խաղը՝ որակազրկման պատճառով։ «Կրասնոդարն» էլ 6 տուրից հետո 14 միավորով գլխավորում է Ռուսաստանի Պրեմիեր լիգայի մրցաշարային աղյուսակը։

Տիգրան Բարսեղյանը չի փոխել ակումբային գրանցումը։ Նրան և թիմակիցներին մեկ խաղ է բաժանում Եվրոպա լիգայի խմբային փուլից։ Անցած մրցաշրջանում «Սլովանը» հանդես եկավ Կոնֆերենցիաների լիգայի խմբային փուլում, որտեղ ընդգրկված էր նաև Երևանի «Փյունիկը»։ Հիմա Սլովակիան ներկայացնող թիմը կարող է խաղալ ԵԼ-ի խմբային փուլում։ Որակավորման փլեյ-օֆֆի առաջին խաղում «Սլովանը» Բրատիսլավայում 2։1 հաշվով հաղթել է Կիպրոսը ներկայացնող «Արիսին»։ Բարսեղյանը կայուն խաղաժամանակ է ստանում, ճիշտ է, ոչ այնքան, որքան ցանկալի է, բայց նա կարևոր խաղացող է Վլադիմիր Վայսի թիմում։ Ընթացիկ մրցաշրջանի պաշտոնական խաղերում Բարսեղյանը 1 գոլ է խփել՝ աչքի ընկնելով Սլովակիայի առաջնության 3-րդ տուրի «Սկալիցայի» հետ խաղում։

«Արիսի» հետ պատասխան հանդիպումը կայանալու է օգոստոսի 31-ին։

Վահան Բիչախչյանը նույնպես չի փոխել թիմն ամառային տրանսֆերային պատուհանի ընթացքում։ 24-ամյա կիսապաշտպանը 8 հանդիպում է անցկացրել նոր մրցաշրջանում՝ դառնալով 1 գոլի և 1 գոլային փոխանցման հեղինակ։

Լուկաս Սելարայանի տեղափոխությունը Սաուդյան Արաբիա անսպասելի էր։ 31-ամյա ֆուտբոլիստը համալրել է «Ալ Ֆաթեհի» շարքերը։

Սաուդյան Արաբիայի նոր մեկնարկած առաջնությունում արդեն 3 տուր է կայացել։ Սելարայանն առանց փոխարինվելու մասնակցել է բոլոր 3 խաղերին և դարձել 1 գոլային փոխանցման հեղինակ։ Թիմը 1 հաղթանակ է տարել, 1 ոչ-ոքի գրանցել և 1 պարտություն կրել։

Թերևս այս տեղափոխության դրական կողմերից մեկն այն է, որ Սաուդյան Արաբիայից հավաքականին միանալն ավելի հեշտ կլինի, քան ԱՄՆ-ից։ Սաուդյան Արաբիայի և Հայաստանի ժամային գոտիների միջև տարբերությունը 1 ժամ է։

Ուգոչուկվու Իվուն «Ուրարտուից» տեղափոխվել է «Ռուբին»։ Ռուսաստանի Պրեմիեր լիգայում ֆուտբոլիստը 5 ամբողջական հանդիպում է անցկացրել և ևս մեկ խաղում մտել է փոխարինման։ Իվուն գոլի հեղինակ էր դարձել Մոսկվայի «Սպարտակի» հետ խաղում։

Հարձակվողներ

Հրանտ-Լեոն Ռանոսը նախորդ մրցաշրջանի վերջում պայմանագիր էր կնքել Մյոնխենգլադբախի «Բորուսիայի» հետ։ Հայ ֆուտբոլիստը ընկերական խաղերում գոլ է խփել «Մոնպելյեին» և «Մյունխեն 1860»-ին։ Նոր թիմի կազմում 20-ամյա հարձակվողը 3 պաշտոնական խաղ է անցկացրել։

Գերմանիայի գավաթի 1/32-րդ եզրափակիչում փոխարինման դուրս գալով 73-րդ րոպեին, Ռանոսը դարձել է գոլի և գոլային փոխանցման հեղինակ։ Բունդեսլիգայում Հրանտ-Լեոն Ռանոսը 5 րոպե խաղացել է «Աուգսբուրգի»  (4:4) և 12 րոպե «Բայերի» (0:3) հետ։

Նորբերտո Բրիասկոն, որը երկար ժամանակ անց նորից խաղադաշտ էր դուրս եկել «Բոկա Խունիորսի» կազմում, հերթական վնասվածքն է ստացել։ Դեռևս հայտնի չէ դրա լրջության աստիճանը, բայց փոխարինվելուց հետո Բրիասկոն չէր կարողացել զսպել հուզմունքը։

Սարգիս Ադամյանը շարունակում է ելույթները «Քյոլնի» կազմում։ 30-ամյա հարձակվողը 2 գոլ էր խփել նախամրցաշրջանային փուլի խաղերում, ինչպես նաև աչքի ընկել Գերմանիայի գավաթի խաղարկության «Օսնաբրյուկի» հետ խաղում։

Բունդեսլիգայի մեկնարկային տուրում Ադամյանը փոխարինման է մտել Դորտմունդի «Բորուսիայի» (0:1) հետ խաղի 52-րդ րոպեին, իսկ երկրորդ տուրի «Վոլֆսբուրգի» հետ խաղում խաղադաշտ է դուրս եկել 27-րդ րոպեին։

Ամփոփում

Արտերկրում հանդես եկող հայ ֆուտբոլիստներից կայուն խաղաժամանակ են ստանում պաշտպաններն ու կիսապաշտպանները։ Հարձակման գծում լուրջ խնդիրներ ունենք։ Բացի այդ, կան վնասվածք ստացած խաղացողներ, որոնց փոխարեն, ամենայն հավանականությամբ, Ալեքսանդր Պետրակովը նոր ֆուտբոլիստներ կհրավիրի։

Միհրան Ալեքսանյան