Կոնֆերենցիաների լիգայի 2023/24 թթ․ մրցաշրջանի որակավորման առաջին փուլի առաջին խաղում «Արարատ-Արմենիան» կմրցի Ալբանիան ներկայացնող «Էգնատիայի» հետ։
Հուլիսի 13-ին կայանալիք հանդիպման նախախաղային ասուլիսի ժամանակ «Արարատ-Արմենիայի» գլխավոր մարզիչ Վարդան Մինասյանը պատասխանել է այն հարցին, թե արդյոք բա՞րդ է խաղալ ալբանական թիմերի հետ։
«Ինչ վերաբերում է ինձ, ապա մեկ անգամ ենք հավաքականի մակարդակով խաղացել Ալբանիայի հետ։ Դա ընկերական խաղ էր։ Բալկանյան ֆուտբոլը, որը ներկայացնում է Ալբանիան, միշտ ուժեղ է եղել, միշտ։ Հավաքականի մակարդակով ևս, թիմը միշտ լավ արդյունքներ է ցույց տալիս։ Մի քանի տարի առաջ նրանք նույնիսկ խմբային փուլը հաղթահարեցին։
Ինչ վերաբերվում է «Էգնատիային», ապա լավ թիմ է։ Ինչքանով որ մենք ենք ուսումնասիրել, նրանք մեկ տարվա մեջ 20 նոր տրանսֆեր են արել, որովհետև, ինչպես հասկացանք, նրանց մոտ ֆինանսական առումով կայուն վիճակ է։ Այն, ինչ տեսնում ենք մամուլով, նրանք ցանկանում են եվրոպական ակումբային ասպարեզում հաջողություններ ունենալ։
Իհարկե, երբ մենք խաղում ենք տանը, փորձում ենք դոմինանտ ֆուտբոլ ցուցադրել, բայց գիտեք՝ ամեն թիմ խաղում է այնքան, որքան իրեն թույլ է տալիս մրցակիցը։ Մենք փորձելու ենք վերահսկել գնդակը, բայց նաև չենք մոռանալու, որ սա երկխաղյա դիմակայություն է»,- ասել է Մինասյանը։
«Արարատ-Արմենիա» — «Էգնատիա» հանդիպումը կկայանա հուլիսի 13-ին՝ Ավանի ֆուտբոլի ակադեմիայի մարզադաշտում։ Խաղի սկիզբը՝ 19։00։
