Հայաստանի բռնցքամարտի հավաքականի գլխավոր մարզիչ Կարեն Աղամալյանը մեկնաբանել է Եվրոպական խաղերում 71 կգ քաշային Գուրգեն Մադոյանի մեկնարկը, որը 1/16 եզրափակչում 5-0 հաշվով վստահ հաղթանակ տարավ Մոնտենեգրոն ներկայացնող Ստեֆան Սավկովիչի նկատմամբ:
«Միանշանակ հաղթանակը Գուրգենինն էր: Նրա մրցակիցը՝ Մոնտենեգրոյի ներկայացուցիչը, բավական ուժեղ մարզիկ է, որը Տաշքենդում հանդես գալով 75 կգ քաշային կարգում, տպավորիչ մենամարտեր էր անցկացնում: Կասկած կար, որ դժվար է լինելու, բայց Գուրգենը թելադրեց իրենը՝ հաղթելով արագության հաշվին: Իհարկե, կային որոշ սխալներ, մի փոքր չհերիքեց դիպուկությունը, բայց տեմպը կարողացավ մինչև վերջ պահել: Ընդհանուր առմամբ գոհ եմ: Հաջորդ մրցակիցը՝ Էստոնիայի ներկայացուցիչը, նորից բարդ, տեխնիկապես ուժեղ բռնցքամարտիկ է: Պետք է լավագույնս պատրաստվենք:
Մեր բռնքամարտիկները լավ են սկսել պայքարը, հուսով եմ՝ այդպես էլ կշարունակեն»,- հույս է հայտնել հավաքականի գլխավոր մարզիչը:
Կարեն Ադամալյանն անդրադարձել է նաև Եվրոպական խաղերի մրցավարությանը. «Մրցավարական աշխատանքն էլ, կարծես թե, մինչ այս պահը նորմալ է ընթացել, թեև հաճախ լիարժեք հաղթած ռաունդում 4-1 հաշվով են հաղթանակ գրանցում, որը վերջնահաշվարկում կարող է իր ազդեցությունն ունենալ ընդհանուր ելքի վրա»:
Հիշեցնենք՝ հայ բռնցքամարտիկներից մինչև հիմա հաղթանակներով են մեկնարկել Արթուր Բազեյանը, Նարեկ Հովհաննիսյանը, Համբարձում Հակոբյանը և Գուրգեն Մադոյանը: Այսօր երեկոյան Նարեկ Հովհաննիսյանը կանցկացնի իր երկրորդ , իսկ Անի Հովսեփյանն ու Դավիթ Չալոյանը՝ առաջին մենամարտերը:
