«Ուրարտու» ՖԱ-ն այսօր՝ մայիսի 11-ին, լրատվամիջոցների ներկայացուցիչների ներկայությամբ երկարաձգեց պայմանագիրը թիմի գլխավոր մարզիչ Դմիտրի Գունկոյի հետ, որից հետո կայացավ մարզչի և ակումբի գլխավոր տնօրեն Գոհար Վարդանյանի մամուլի ասուլիսը։
«Ուղղակի պայմանագրի երկարաձգում է եղել, կետերում փոփոխություններ չեն եղել։ Նոր պայամանգիրը նախատեսված է մինչև 2026 թվականի հունիս ամիսը»,-իր խոսքը սկսեց Գոհար Վարդանյանը՝ ընդգծելով, որ իրենք լիովին վստահում են մարզչին, գնահատում նրա կատարած աշխատանքն ու ճիշտ են համարել պայմանագիրը երկարաձգել մրցաշրջանի հենց այս հատվածում։
Այնուհետև լրագրողների հարցերին պատասխանեց Գունկոն․
«Այս ակումբը տարբերվում է նրանով, որ երկարաձգեց ինձ հետ պայմանագիրն աշխատանքի առաջին տարվանից հետո (ծիծաղում է՝ հեղ․)։ Այն տարբերվում է ենթակառուցվածքներով, երիտասարդ ֆուտբոլիստներով, որ աճում են ակումբում, փիլիսոփայությամբ, ակումբի քաղաքականությամբ։
Նվաճումների մասին խոսելու բան չկա հիմա։ Մեր մարզչական շտաբը ձգտում է ամենաբարձր հորիզոնականներին և մեր հավաքած փորձն օգնում է զարգացնել ֆուտբոլիստներին ու ամեն անգամ մեզ ավելի ուժեղ է դարձնում։ Հուսով եմ՝ մեր հավաքած փորձը կօգնի հասնել մեր նպատակներին։
Իմ՝ թիմը գլխավորելուց հետո եղած փոփոխություններից մեկը Հայաստանի հավաքականում մեր թիմից նոր ֆուտբոլիստների հայտնվելն է։ Մարզչական շտաբի, անձամբ մեզ համար դա ինչ-որ չափանիշ է։ Կարծում եմ՝ ճիշտ ուղղությամբ ենք շարժվում։ «Ուրարտուից» 4 ֆուտբոլիստ հրավիրվել է Հայաստանի հավաքական, այն ինքնին խոսում է ակումբի քաղաքանության մասին։
Ամեն օր պատրաստվում ենք խաղերին սովորական ռեժիմով։ Հասկանում ենք, որ առաջնության վերջնամասը թեժ է լինելու։ Թիմը լիարժեք պայքարելու տրամադրվածություն ունի և պատրաստ է խաղալ ու հաղթել մնացած խաղերը։
Ամսի 13-ին Գավաթի եզրափակիչն է։ Լուրջ պատրաստվում ենք այդ խաղին, այն պայքար է տիտղոսի համար։ Արդեն 4 խաղ ունեցել ենք «Շիրակի» դեմ, գիտակցում ենք, որ գավաթային խաղերը բավականին անկանխատեսելի են, հետաքրքիր են, որտեղ մեկ խաղով որոշվում է ամեն ինչ։ Մենք եզրափակիչում ենք, սպասում ենք խաղին, վերլուծում ենք մրցակցին, ճանաչում ենք նրանց, ինչպես նրանք՝ մեզ» ։
