Ֆուտբոլի աշխարհի առաջնության՝ ԱԱ 2022-ի մեկնարկին հաշված օրեր են մնացել։ Մրցաշարը կկայանա Կատարում և կանցկացվի նոյեմբերի 20-ից դեկտեմբերի 18-ը։ Խաղերը կկայանան 8 ստադիոններում։ Ճիշտ ժամանակն է ծանոթանալ ստադիոններին։
Ստադիոն «Ալ Բայթ» (քաղաքը՝ Ալ Խոր)
Բացվել է 2020 թվականին
Տեղավորում է 60 հազար հանդիսական (ԱԱ 2022-ից հետո՝ 32 հազար)
Խաղերը՝ խմբային փուլի 6 խաղ (ներառյալ բացման հանդիպումը), ինչպես նաև 1/8, 1/4 և 1/2 եզրափակիչների մեկական խաղ
Առաջին հայացքից պարզ է դառնում, թե ինչն է ոգեշնչել կառուցապատողներին: Հեշտությամբ ճանաչելի է բեդվինների վրանը, որը տուն էր քոչվորների համար, որոնք ապրում էին Պարսից ծոցի ափին։ Նույնիսկ ստադիոնի անվանումն վերաբերում է այս կացարանին, որը կոչվում է Bayt Al Shaar: Մարզադաշտը ստացել է հինգ աստղ GSAS-ից (գնահատում է հաստատության ազդեցությունը շրջակա միջավայրի վրա):
«Ալ Բայթը» կլինի մրցաշարի երկրորդ կարևորագույն մարզադաշտը։ Եվ, իհարկե, աշխարհի առաջնության ավարտից հետո տրիբունաների վերին շերտը կապամոնտաժվի ու կուղարկվի զարգացող երկրներ՝ աջակցելու ֆուտբոլին։
Ստադիոն «Լուսաիլ» (քաղաքը՝ Լուսաիլ)
Բացվել է 2021 թվականին
Տեղավորում է 80 հազար հանդիսական (ԱԱ 2022-ից հետո՝ 20 հազար)
Խաղերը՝ խմբային փուլի 6 խաղ, ինչպես նաև 1/8, 1/4 և 1/2 եզրափակիչների մեկական խաղ և եզրափակիչ հանդիպումը
Լուսաիլը մի ամբողջ գերժամանակակից քաղաք է, որը հատուկ կառուցվել է աշխարհի առաջնության համար՝ Դոհայից 20 կմ հեռավորության վրա։ Իսկ Նորման Ֆոսթերի ճարտարապետական բյուրոյի նախագծած ոսկե մարզադաշտը կդառնա քաղաքի կենտրոնը։ Այստեղ կանցկացվի աշխարհի առաջնության 10 հանդիպում՝ ներառյալ կիսաեզրափակիչն ու եզրափակիչը։
Կատարի իշխանությունները հասկանում են, որ 2022 թվականի աշխարհի առաջնությունից հետո երկրին 80 հազարանոց մարզադաշտ պետք չէ։ Ուստի տրիբունաների մեծ մասը կապամոնտաժվի և կնվիրաբերվի ամբողջ աշխարհի սպորտային նախագծերին: Մարզահամալիրի տարողունակությունը կկրճատվի մինչև 20 հազար հանդիսատես, իսկ ստադիոնը՝ «Լուսաիլը», կվերածվի հանգույցի, որտեղ կտեղակայվեն դպրոց, հիվանդանոց, առևտրի կենտրոն, սրճարաններ և ռեստորաններ։
Ստադիոն «Ահմադ Բին Ալի» (քաղաքը՝ Ալ Ռայան)
Բացվել է 2020 թվականին
Տեղավորում է 40 հազար հանդիսական (ԱԱ 2022-ից հետո՝ 20 հազար)
Խաղերը՝ խմբային փուլի 6 խաղ, ինչպես նաև 1/8 եզրափակչի մեկ հանդիպում
Այս մարզադաշտը նախագծվել է Pattern Design ճարտարապետական ընկերության կողմից, որ զբաղվել է «Էվերթոնի» նոր մարզադաշտի և «Մանչեսթեր Սիթիի» «Էթիհադ» ստադիոնի ընդլայնման նախագծերով, «Ահմեդ Բին Ալի ստեդիումի» շինարարությունն իրականացրել է ամերիկյան AECOM ընկերությունը, որն էլ մի քանի մարզադաշտ է կառուցել 2010 թվականի աշխարհի առաջնության համար: Այս ընկերությունը կառուցել է նաև Ատլանտայի «Մերսեդես Բենց» մարզադաշտը (աշխարհի ամենաառաջադեմ ստադիոններից մեկը):
Ստադիոն «Ալ Ջանուբ» (քաղաքը՝ Ալ Վակրա)
Բացվել է 2019 թվականին
Տեղավորում է 40 հազար հանդիսական
Խաղերը՝ խմբային փուլի 6 խաղ, ինչպես նաև 1/8 եզրափակչի մեկ հանդիպում
Աշխարհի առաջնության միակ մարզադաշտն է Ալ Վակրա քաղաքում։ Գտնվելով Պարսից ծոցի ափին, քաղաքը պատմականորեն համարվում էր ձկնորսական, բայց այժմ մեծությամբ երկրորդն է Կատարում: Անցյալի մասին հիշեցնում է մարզադաշտի դիզայնը․ տանիքը պատրաստված է ավանդական դհաու նավակների առագաստների տեսքով։ Ճարտարապետը բրիտանացի Զահա Հադիդն է։
Ստադիոն «Ալ Տումամա» (քաղաքը՝ Դոհա)
Բացվել է 2020 թվականին
Տեղավորում է 40 հազար հանդիսական (ԱԱ 2022-ից հետո՝ 20 հազար)
Խաղերը՝ խմբային փուլի 6 խաղ, ինչպես նաև 1/8 և 1/4 եզրափակչի մեկական խաղ
Մարզադաշտը նախագծել է կատարցի ճարտարապետ Իբրահիմ Ջայդան։ Նա ոգեշնչվել է ավանդական կատարական ժանյակավոր գլխարկով՝ հաֆիայով։ Ստադիոնի վերին հատվածն ակնհայտորեն հիշեցնում է այս գլխարկի ավանդական նախշը: Ստադիոնն իր անվանումը ստացել է տարածաշրջանում աճող ծառի անունով։
Առաջին խաղն այստեղ կայացել է 2021 թվականի հոկտեմբերին՝ Կատարի Էմիրի գավաթի եզրափակիչը։ Դա «Բարսելոնայի» ներկայիս գլխավոր մարզիչ Չավիի վերջին հանդիպումներից մեկն էր տեղի «Ալ Սադի» գլխավոր մարզչի պաշտոնում։ Այս խաղում Չավիի թիմը հետխաղային 11 մետրանոցներով հաղթել էր «Ալ Ռիադին»։
2022 թվականի աշխարհի առաջնությունից հետո ստադիոնի նստատեղերի քանակը կկրճատվի երկու անգամ, իսկ մարզահամալիրի տարածքում կտեղակայվի սպորտային բժշկության կենտրոն և հյուրանոց։
Ստադիոն «Էդյուքեյշն Սիթի» (քաղաքը՝ Ալ Ռայան)
Բացվել է 2020 թվականին
Տեղավորում է 40 հազար հանդիսական (ԱԱ 2022-ից հետո՝ 20 հազար)
Խաղերը՝ խմբային փուլի 6 խաղ, ինչպես նաև 1/8 և 1/4 եզրափակչի մեկական խաղ
Մարզադաշտը, ինչպես կարելի է կռահել անվանումից, գտնվում է Կատարի կրթական կենտրոնում։ Այստեղ դուք կգտնեք մի քանի խոշոր համալսարաններ ու Կատարի կրթության և գիտության հիմնադրամի կենտրոնակայանը: «Էդյուքեյշն Սիթին» արդեն ընդունել է 2020 թվականի աշխարհի ակումբային առաջնությունը, որը հաղթել էր «Բավարիան»:
Ալ Ռայանի ստադիոնը համարվում է աշխարհում էկոլոգիապես ամենամաքուրներից մեկը. 2019 թվականի մայիսին «Էդյուքեյշն Սիթին» ստացել է հինգ աստղ GSAS-ի վարկանիշում (գնահատում է հաստատության ազդեցությունը շրջակա միջավայրի վրա): Մարզադաշտի շրջակայքում կան կանաչապատ մեծ տարածքներ (ինչպես երեւում է լուսանկարներում, նույնիսկ գոլֆի դաշտ կա)։
Աշխարհի առաջնությունից հետո նստատեղերի քանակը կկրճատվի երկու անգամ, իսկ չպահանջված կառույցները կուղարկվեն զարգացող երկրներ՝ սպորտի առաջխաղացման համար։
«Խալիֆա» միջազգային ստադիոն (քաղաքը՝ Դոհա)
Բացվել է 1976 թվականին (վերակառուցումն ավարտել են 2017 թվականին)
Տեղավորում է 40 հազար հանդիսական
Խաղերը՝ խմբային փուլի 6 խաղ, ինչպես նաև 1/8 մեկ խաղ և 3-րդ տեղի համար նախատեսված հանդիպումը
Կատարի ամենահին մարզադաշտերից մեկը․ այն կառուցվել է 1976 և վերակառուցվել՝ 2017 թվականին։ Բացումը եղել է Կատարի Էմիրի գավաթի եզրափակիչ խաղով, որում «Ալ Սադը» (Չավին դեռևս խաղում էր թիմում) հաղթել է «Ալ Ռայանին»։
Այս ստադիոնում արդեն կայացել է 2019 թվականի աշխարհի ակումբային առաջնության եզրափակիչը, որում հաղթել է «Լիվերպուլը»։
Մարզադաշտի նստատեղերը պաշտպանված են եղանակային անբարենպաստ պայմաններից, իսկ կլիմայի լրացուցիչ կառավարումն ապահովվում է հովացման առաջադեմ տեխնոլոգիաներով:
«Ստադիոն 974» (քաղաքը՝ Դոհա)
Բացվել է 2021 թվականին
Տեղավորում է 40 հազար հանդիսական, ԱԱ-ից հետո այն լիովին կքանդվի
Խաղերը՝ խմբային փուլի 6 խաղ, ինչպես նաև 1/8 եզրափակչի մեկ հանդիպում
Աշխարհի առաջին մարզադաշտը, որն ամբողջությամբ կառուցվել է բեռնարկղերից: 974-ը և՛ Կատարի միջազգային հեռախոսակոդն, և՛ շինարարության համար օգտագործվող բեռնարկղերի քանակը: Դրանց ներսում կտեղակայվեն մանրածախ առևտրի կետեր, զուգարաններ և այլ ենթակառուցվածքներ: Ստադիոնն ունի նաև այլընտրանքային անվանում՝ «Ռաս ԱբուԱբաուդ»։
Կատարի իշխանությունները աշխարհի առաջնությունից հետո մարզադաշտն ամբողջությամբ կքանդեն, իսկ օգտագործված մասերը կուղարկեն կարիքավոր երկրներ։
Աղբյուրներ՝ www.qatar2022.qa, www.sports.ru