Այսօր մեկնարկում է Մեծ սաղավարտի 4 մրցաշարերից մեկը՝ US Open-ը (ԱՄՆ-ի Բաց առաջնություն)։
Մրցաշարն անցկացվում է ամեն տարի՝ օգոստոսի վերջերին, սեպտեմբերի սկզբին։ 2022 թվականին մրցաշարը կանցկացվի օգոստոսի 29-ից սեպտեմբերի 11-ը։ Սա կլինի մրցաշարի 142-րդ խաղարկությունը։ Մրցումների հիմնական խաղարկությանը մասնակցում են 128-ական թենիսիստներ և թենիսիստուհիներ մենախաղում և 64 զույգ՝ զուգախաղում։
US Open-ն ընդգրկում է հետևալ կարգերը՝․
🥎 տղամարդկանց և կանանց մենախաղեր,
🥎 տղամարդկանց, կանանց և խառը զուգախաղեր,
🥎 ինչպես նաև պատանեկան մրցաշարեր և վետերանների մրցաշարեր
Առաջին մրցաշարն անցկացվել է «ԱՄՆ ազգային տղամարդկանց մենախաղի առաջնություն» անվան տակ՝ 1881 թվականի օգոստոսին Նյուպորտում։ Մրցաշարին կարող էին մասնակցել միայն ԱՄՆ-ի թենիսի ազգային ասոցիացիայի անդամ ակումբները: Մրցաշարի առաջին հաղթողը Ռիչարդ Սիրսն էր։
Մրցաշարի գործող չեմպիոնը տղամարդկանց մենախաղում Դանիլ Մեդվեդևն է, իսկ կանանց մենախաղում՝ Էմմա Ռադուկանուն։
🎾 Հետաքրքիր փաստ․ Ռոջեր Ֆեդերերի կողմից 2004-ից 2008 թվականներին հինգ անընդմեջ տիտղոս նվաճելուց հետո ոչ մի թենիսիտի չի հաջողվել պաշտպանել իր տիտղոսը հաջորդ խաղարկությունում։
Մրցաշարի ռեկորդակիրները (Բաց դարաշրջանում)
🥎 ՏՂԱՄԱՐԴԱԿԱՆՑ ՄՐՑԱՇԱՐ
Ամենատիտղոսակիր մարզիկները՝ Ջիմի Քոնորս, Փիթ Սամպրաս, Ռոջեր Ֆեդերեր (5)
Ամենատարեց չեմպիոնը՝ Քեն Ռոսուել, 35 տարեկան (1970)
Ամենաերիտասարդ չեմպիոնը՝ Մայքլ Չանգ, 19 տարեկան (1990)
🥎 ԿԱՆԱՆՑ ՄՐՑԱՇԱՐ
Ամենատիտղոսակիր մարզիկները՝ Քրիս Էվերտ, Սերենա Ուիլյամս (6)
Ամենատարեց չեմպիոնը՝ Ֆլավիա Պենետա, 33 տարեկան (2015)
Ամենաերիտասարդ չեմպիոնը՝ Թրեյսի Օսթին, 16 տարեկան (1979)
Մրցաշարի կազմակերպիչը ԱՄՆ թենիսի միությունն է։ 1978 թվականի սկսած մրցաշարի խաղերը տեղի են ունենում Նյու Յորքի Բիլի Ջին Քինգի անվան թենիսի ազգային կենտրոնում։ US Open-ի մրցանակային ֆոնդը կկազմի 60 մլն դոլար, ինչը 4,3%-ով ավելի է նախորդ տարվա համեմատ։
Ովքե՞ր են մասնակցելու մրցաշարին
Վերևում արդեն նշեցինք, որ մրցաշարի գործող չեմպիոնը Դանիլ Մեդվեդևն է, ով այս մրցաշրջանում գլխավորում է ATP վարկանիշային աղյուսակը։ Նրանից բացի մրցաշարում հանդես կգան նախորդ տարիների հաղթողները՝ Դոմինիկ Տիմը (2020), Ռաֆայել Նադալը (2010, 2013, 2017, 2019), Սթեն Վավրինկան (2016), Մարին Չիլիչը (2014), Էնդի Մարեյը (2012 թ.)։
Հետաքրքիր է, որ իրականում իրենց տիտղոսը կպաշտպանեն միանգամից երեք խաղացողներ՝ Դանիլ Մեդվեդևը, որպես նախորդ մրցաշրջանի հաղթող, ինչպես նաև Դոմինիկ Տիմը և Ռաֆայել Նադալը, ովքեր համապատասխանաբար 2020 և 2019 թվականներին իրենց հաղթանակներից հետո չխաղացին Նյու Յորքում:
Նշենք, որ մրցաշարի եռակի չեմպիոն և աշխարհի նախկին առաջին ռակետ Նովակ Ջոկովիչը բաց կթողնի US Open-ը։ Սերբ թենիսիտը պարզապես չի կարողանա մեկնել ԱՄՆ՝ կորոնավիրուսի դեմ պատվաստումից հրաժարվելու պատճառով։
🎾 Վարկանիշային աղյուսակը՝ օգոստոսի 29-ի դրությամբ
ATP-ն և WTA-ն ԱՄՆ բաց առաջնության մեկնարկի նախօրեին հրապարակել են օգոստոսի 29-ի դրությամբ թարմացված վարկանիշային աղյուսակը:
Տղամարդկանց վարկանիշային աղյուսակը շարունակում է գլխավորել ռուս թենիսիստ Դանիիլ Մեդվեդևը։ Նախորդ շաբաթվա համեմատ առաջին տասնյակում փոփոխություններ չեն եղել։
1․Դանիլ Մեդվեդև (Ռուսաստան) — 6885 միավոր;
2 (2). Ալեքսանդր Զվերև (Գերմանիա) — 5760;
3 (3). Ռաֆայել Նադալ (Իսպանիա) — 5630;
4 (4). Կարլոս Ալկարաս (Իսպանիա) — 5100;
5 (5). Ստեֆանոս Ցիցիպաս (Հունաստան) — 4890;
6 (6). Նովակ Ջոկովիչ (Սերբիա) — 4770;
7 (7). Կասպեր Ռուդ (Նորվեգիա) — 4695;
8 (8). Ֆելիքս Օժյե-Ալիասիմե (Կանադա) — 3625
9 (9). Քեմերոն Նորի (Մեծ Բրիտանիա) — 3415;
10 (10). Հյուբերտ Հուրկաչ (Լեհաստան) — 3355;
31 (31). Կարեն Խաչանով (Ռուսաստան) — 1315
Կանանց վարկանիշային աղյուսակում նախկինի պես առաջատարը լեհ Իգա Շվյոնտեկն է։ Երկրորդ տեղում էստոնացի Անետ Կոնտավեիտն է, երրորդում՝ Հունաստանի ներկայացուցիչ Մարիա Սակկարին։
WTA վարկանիշային աղյուսակը․
1․ Իգա Շվյոնտեկ (Լեհաստան) — 8605 միավոր;
2 (2). Անետ Կոնտավեիտ (Էստոնիա) — 4360;
3 (3). Մարիա Սակկարի (Հունաստան) — 4190;
4 (4). Պաուլա Բադոսա (Իսպանիա) — 3980;
5 (5). Օնս Ժաբեր (Թունիս) — 3920;
6 (6). Արինա Սոբոլենկո (Բելառուս) — 3470;
7 (7). Սիմոնա Հալեպ (Ռումինիա) — 3255
8 (8). Ջեսիկա Պեգուլա (ԱՄՆ) — 3201;
9 (10). Դարիա Կասատկինա (Ռուսաստան) — 3015
10 (9). Գարբինե Մուգուրուսա (Իսպանիա) — 2886 .
