Ազգերի լիգայի B դիվիզիոնի 1-ին խմբի երկրորդ տուրում Հայաստանի ազգային հավաքականը Գլազգոյում կմրցի Շոտլանդիայի ընտրանու հետ: Մեծ Բրիտանիան ներկայացնող երկրի հավաքականի հետ Հայաստանի հավաքականը պատմության մեջ կհանդիպի առաջին անգամ: Այսպիսով, Շոտլանդիան կդառնա ՈւԵՖԱ-ի անդամ 47-րդ երկիրը, որի հետ Հայաստանի ազգային հավաքականը կհանդիպի :
Հայաստանի ընտրանին պատմության մեջ չի հանդիպել Անգլիայի, Ֆարերյան Կղզիների, Կոսովոյի, Սան-Մարինոյի, Սլովենիայի, Ավստրիայի, Շվեյցարիայի և Ադրբեջանի հավաքականների հետ:
Շոտլանդիայի հավաքական
Շոտլանդիայի հավաքականն աշխարհում ամենահին պատմություն ունեցող հավաքականն է: Ազգային թիմերի մակարդակով աշխարհում առաջին հանդիպումը կայացել է Շոտլանդիայի հավաքականի մասնակցությամբ: 1872թ․ նոյեմբերի 30-ին Շոտլանդիայի հավաքականը հանդիպել է Անգլիայի ընտրանու հետ: Խաղն ավարտվել է գոլազուրկ ոչ-ոքի: Շոտլանդիայի հավաքականը պատմության մեջ 8 անգամ մասնակցել է աշխարհի առաջնությունների, 3 անգամ՝ Եվրոպայի առաջնությունների եզրափակիչ փուլերին: Ազգային թիմը ոչ մի դեպքում չի կարողացել հաղթահարել խմբային փուլը: Վերջին անգամ Աշխարհի առաջնության եզրափակիչ փուլին շոտլանդացիները մասնակցել են 1998թ․: ԱԱ-2022-ի ընտրական փուլում Շոտլանդիայի հավաքականը դուրս եկավ որակավորման խմբային փուլից, սակայն փլեյ-օֆֆի կիսաեզրափակչում պարտություն կրեց Ուկրաինայի թիմից (1:3): Եվրոպայի առաջնություններում շոտլանդացիների վերջին մասնակցությունը եղել է 2020թ․: ՈւԵՖԱ-ի վարկանիշային աղյուսակում Շոտլանդիայի հավաքականը զբաղեցնում է 11-րդ տեղը՝ ՖԻՖԱ-ի աղյուսակում՝ 39-րդ:
Հավաքականի կազմը
Շոտլանդիայի հավաքականի կազմում խաղերի քանակով ռեկորդակիր է համարվում Քենի Դալգլիշը, որը 1971-1986 թվականների ընթացքում մասնակցել է 102 խաղի: Ներկայիս կազմում հիմնականում հանդես են գալիս ֆուտբոլիստներ անգլիական Պրեմիեր լիգայից: Հավաքականի ամենաթանկարժեք ֆուտբոլիստը «Լիվերպուլի» պաշտպան ու ազգային թիմի ավագ Անդրե Ռոբերտսոնն է: Շոտլանդիայի հավաքականում են նաև «Մանչեսթեր Յունայթեդի» կիսապաշտպան Սկոթ ՄկԹոմանին, «Չելսիի» կիսապաշտպան Բիլի Գիլմուրը, «Ասթոն Վիլլայի» կիսապաշտպան Ջոն Մկգեյնը, «Սաութհեմփթոնի» հարձակվող Չիե Ադամսը, իտալական «Բոլոնյայից» Աարոն Հիկեյը և այլոք: Ընդհանուր առմամբ, Շոտլանդիայի հավաքականի ընդհանուր արժեքը կազմում է 252,85 մլն եվրո:
Մարզադաշտը
Շոտլանդիայի ազգային հավաքականը տնային խաղերն անցկացնում է Գլազգո քաղաքի «Համպդեն Պարկ» մարզադաշտում: Գլազգոն Մեծ Բրիտանիայում մեծությամբ 3-րդ քաղաքն է և ամենամեծն է Շոտլանդիայում: Մարզադաշտը կառուցվել է 1903թ․ «Քուինս Պարկ» ֆուտբոլային ակումբի կողմից, տեղավորում է 52 103 հանդիսական: 1903թ․ հոկտեմբերի 31-ին մարզադաշտն ընդունել է առաջին հանդպումը, որում «Քուինս Պարկը» նվազագույն հաշվով հաղթեց «Սելթիկին»։ 2021թ․ մարզադաշտում կայացել են Եվրոպայի առաջնության հանդիպումները։
