Նորավանք-Ուրարտու․ Գավաթային ճակատամարտի սպասումով

Գավաթի եզրափակիչ է դուրս եկել խաղային հստակ ձեռագիր որդեգրած երկու թիմ, ինչն էլ ավելի հետաքրքիր է դարձնում կայանալիք դիմակայությունը։ «Նորավանքը» շանս չունի Vbet ՀՊԼ-ի միջոցով նվաճելու եվրագավաթային ուղեգիր, այդ առումով «Ուրարտուի» շանսերը ևս բարձր չեն։ Այնպես, որ գավաթի եզրափակիչը նման է լինելու ֆուտբոլային իսկական թատերաբեմի։

Միմյանց դեմ են մրցելու ներկայումս երկու ամենաերիտասարդ հայ մասնագետները, որոնք դեռ երկար ճանապարհ են անցնելու, և երկուսն էլ հնարավորություն ունեն` որպես գլխավոր մարզիչ նվաճելու իրենց կարիերայի առաջին տիտղոսը։ Հայկական ֆուտբոլին քաջածանոթ ոչ մի ներկայացուցչի համար նորություն չէ, որ առաջնության երկրորդ հատվածում Վահե Գևորգյանի թիմը կերպարանափոխված ֆուտբոլ է խաղում, և թիմի մասնակցությամբ բոլոր խաղերում մրցակիցների հետ «Նորավանքի» շանսերը գնահատվում են նվազագույնը 50/50։

«Նորավանքը» սիրում է խաղալ իր ֆուտբոլը` խաղի ընթացքում փորձելով կիրառել ուժեղ պրեսինգ և գնդակ կորցնելուց հետո այն արագ վերադարձնել։ «Ուրարտուի» խաղաոճը շատ ավելի տարբերվող է։ Ռոբերտ Արզումանյանի տղաները սիրում են հնարավորինս շատ վերահսկել գնդակը։ «Ուրարտուն» շատ լավ է կարողանում պաշտպանությունից անցնել հարձակման` գնդակ խաղարկելով անցնելով կիսադաշտը, սակայն գրոհների եզրափակիչ փուլում թիմի մոտ առկա են որոշակի խնդիրներ, որոնք հիմնականում կապված են գրոհը եզրափակելու հետ։

Արզումանյանի թիմը հասնում է մրցակցի կիսադաշտ, ինչից հետո բավականին հաճախ տեսնում ենք եզրային փոխանցումներ դեպի տուգանային հրապարակ։ Այս առումով շատ մեծ դերակատարում են ունենալու Ժիրայր Մարգարյանը և Նանա Անտվին։ Նանայի փոխանցումները վերջին շրջանում սյնքան էլ արդյունավետ չեն ստացվում և որոշակի միօրինակություն ունեն։ Աջ եզրայինի փոխանցումների էֆեկտիվությունից շատ բան է կախված լինելու։ Ժիրայր Մարգարյանն այս տեսանկյունից ավելի էֆեկտիվ է գործում։

«Ուրարտուի» խաղում մեծ դեր են ունենալու խաղադաշտի կենտրոնում գործող ֆուտբոլիստները` Իվու, Աղասարյան, Մկրտչյան։ Պետք չէ մոռանալ հարձակվող Արթուր Միրանյանի մասին, որը գարնանային հատվածում հիանալի արդյունավետություն է ապահովում, ինչպես նաև Ջոնել Դեսիրեին և Դմիտրո Խլյոբասին: «Նորավանքը» հիմնականում խաղում է 4-2-3-1 դասավորությամբ։ Այստեղ ևս կենտրոնում գործող ֆուտբոլիստներից շատ բան է կախված լինելու։ Հենակետայինները պետք է փորձեն խաղադաշտի կենտրոնում հնարավորինս շատ խափանել մրցակցի խաղացողների աշխատանքը` թույլ չտալով մոտենալ սեփական տուգանային հրապարակին։

Հարձակման գծում Վահե Գևորգյանի թիմում կան շատ լավ կատարողներ։ Յենե Տենտոնը, Եվգենի Կոբզարը և Բաբու Չամը կարողանում են եզրերում ապահովել համապատասխան սրություն, որից հետո գրոհը մտնում է եզրափակիչ փուլ, իսկ հարձակման կրակագծում աշխատում է Իբրահիմ Շուաիբուն, ով հասցրել է ցույց տալ իր գոլային հոտառությունը։

Թիմերը բոլորովին վերջերս խաղացին միմյանց դեմ, որտեղ «Նորավանքը» հաղթեց 3-2 հաշվով։ Այդ խաղը ստացավ բավականին հարձակողական բնույթ, և թիմերը «բաց» ֆուտբոլ խաղացին։ Խնդրում եմ` մի կենտրոնացեք նախորդ հանդիպման սցենարի և գրանցված հաշվի վրա։ Սա եզրափակիչ է, և մեծ հավանականությամբ շատ ավելի զգուշավոր ֆուտբոլ ենք տեսնելու։ Չի բացառվում, որ գոլառատ խաղ կստացվի, բայց դրա հավանականությունը մեծ չէ։ Եթե անգամ այդպիսի սցենար ունենանք, գոլերի մեծ մասը կտեսնենք երկրորդ խաղակեսում, քանի որ պարտվող թիմը պետք է գնա առաջ` չունենալով կորցնելու ոչինչ։

«Նորավանքի» ֆուտբոլիստների մոտ շատ խաղերի մեկնարկային րոպեներին նկատվում է լարվածություն, որից կարող է օգտվել «Ուրարտուն»՝ դառնալով արագ գոլի հեղինակ։ Հակառակ պարագայում Վահե Գևորգյանին հաջողվում է միջամտությունների շնորհիվ թոթափել այդ լարվածությունը, որից հետո «Նորավանքը» խաղում է հանգիստ` առանց որևէ ավելորդ հուզմունքի։

«Ուրարտուի» գլխավոր մարզիչ Ռոբերտ Արզումանյանը վերջին օրերի ընթացքում մի քանի անգամ նշել է, որ եզրափակչի ֆավորիտը «Նորավանքն» է` մտաբերելով իրենց նկատմամբ այդ թիմի վերջին հաղթանակը։  Արզումանյանն այս տեսակետով թերևս նպատակ ունի իր խաղացողներին զերծ պահել ավելորդ լարվածությունից, ինչը ևս տրամաբանական մոտեցում է։

Օրեր առաջ Vbet ՀՊԼ-ի հերթական տուրում տեղի ունեցած «Արարատ-Արմենիա»-«Փյունիկ» հանդիպումն առանձնացավ հիանալի ֆուտբոլային մթնոլորտում։ Գավաթի եզրափակչում ևս ակնկալվում է ֆուտբոլային տոն, որն ապահովելու են «Նորավանքը» և «Ուրարտուն»։ Բոլորդ մայիսի 8-ին եկեք «Հանրապետական» մարզադաշտ և վայելեք հայկական ֆուտբոլ։ Թեժ է լինելու։