Երեկ Հայաստանի ազգային հավաքականի ավագ Հենրիխ Մխիթարյանը հայտարարեց ազգային հավաքականում իր կարիերան ավարտելու որոշման մասին։
Այս հայտարարությունից հետո փակվում է մեր ազգային հավաքականի պատմության ևս մեկ էջ, և դա պարզապես մեկ էջ չէ, այլ մի ամբողջ ժամանակաշրջան, հրաշալի ժամանակաշրջան․․․
Հ․ Հրաշալի
«Առաջնության 8 խաղում 11 գոլ խփելն արդեն ֆանտաստիկ է, բայց երբ այդ ամենին ավելանում է այն փաստը, որ նա կիսապաշտպան է, դա արդեն հրաշալի է։ Եթե դուք նրա մասին դեռ չեք լսել, եթե անգամ Եվրոպայի թոփ ակումբները նույնպես չեն լսել նրա մասին, ապա դուք շուտով կիմանաք նրա մասին․․․»,- Մխիթարյանի մասին 2012-2013 մրցաշրջանի ժամանակ ասել է շոտլանդացի նախկին ֆուտբոլիստ Փեթ Նևինը։
Եվ իսկապես, կարճ ժամանակ անց, ամբողջ աշխարհը ճանաչեց հայ ֆուտբոլիստին․ նախ նա տեղափոխվեց Ուկրաինա, որտեղ նշանակալից հաջողությունների հասավ, իսկ հետո սկսվեց նրա հրաշալի ոդիսականը թոփ լիգաներում․․․
Մխիթարյանը Հայաստանի հավաքականում իր նորամուտը նշեց 2007թ․ հունվարի 14-ին՝ Պանամայի հետ ընկերական խաղում, իսկ հավաքականում առաջին անգամ գոլի հեղինակ դարձավ 2009թ․ մարտի 28-ին՝ Էստոնիայի դեմ խաղում։
«Հիշում եմ, երբ առաջին անգամ կրեցի ազգային հավաքականի մարզաշապիկը Պանամայի դեմ ընկերական խաղում և երբ խփեցի առաջին գոլս Աշխարհի առաջնության որակավորման փուլի Էստոնիայի դեմ խաղում։ Անկախ դժվարությունից՝ ցանկացել եմ հաղթել կարիերայիս ամեն քայլափոխին»,- իր երեկվա նամակում գրել է Հենրիխը։
2014թ. Աշխարհի առաջնության ընտրական փուլի Իտալիայի դեմ խաղում Հենրիխը խփել է իր 12-րդ գոլը և դարձել Հայաստանի հավաքականի պատմության լավագույն ռմբարկուն, իսկ Ռոման Բերեզովսկու՝ կարիերան ավարտելուց հետո, դարձել է հավաքականի ավագը։
Ե․ Եզակին․․․
Մխիթարյանը 10 անգամ ճանաչվել է Հայաստանի լավագույն ֆուտբոլիստ (2009, 2011, 2012, 2013, 2014, 2015, 2016, 2017, 2019, 2020 թվականներին), ընդ որում՝ յոթ անգամ անընդմեջ։ Նա նաև հանդիսանում է Հայաստանի միակ ֆուտբոլիստը, որը խաղացել է ներկա պահին ամենաուժեղ լիգայում՝ Անգլիայի Պրեմիեր Լիգայում, ինչպես նաև ՀՀ պատմության մեջ միակը, ով խաղացել է Ա Սերիայում։
Նա նաև Հայաստանի ազգային հավաքականի պատմության լավագույն ռմբարկուն է՝ 95 խաղում խփած 32 գնդակով։ Բացի այդ, նա Հայաստանի ազգային և երիտասարդական հավաքականների կազմում միակ ֆուտբոլիստն է, որին հաջողվել է դառնալ հեթ-տրիկի հեղինակ՝ երկու հավաքականներում էլ։ 2009թ․՝ երիտասարդական հավաքականի կազմում հեթ-տրիկի հեղինակ է դարձել Իռլանդիայի հետ խաղում, իսկ 2016թ․ ազգային հավաքականի կազմում՝ Գվատեմալայի հավաքականի դեմ խաղում։
Եվս մեկ հետաքրքիր փաստ․ նա պոլիգլոտ է, տիրապետում է նվազագույնը 7 լեզուների՝ հայերեն, ռուսերեն, ֆրանսերեն, անգլերեն, պորտուգալերեն, իտալերեն և գերմաներեն: Այդ առումով ևս նա ոչ միայ առանձնանում է հայ ֆուտբոլիստների, այլ ընդհանրապես համաշխարհային ֆուտբոլի ներկայացուցիչների շրջանում։
Ն․ Նվիրվածություն աշխատանքին
«Իր հետ աշխատած բոլոր մարզիչները ևս ընդգծում են Հենոյի նվիրվածությունը և պրոֆեսիոնալիզմը»,- Հայաստանի ազգային հավաքականի գլխավոր մարզիչ Խոակին Կապառոսն անդրադարձել է Հենրիխ Մխիթարյանի հայտարարությանը։
«Այսօր հայկական ֆուտբոլի և ազգային հավաքականի համար տխուր օր է: Մեր ավագը, առաջատարը և Հայաստանի հավաքականի պատմության ամենատաղանդավոր ֆուտբոլիստը որոշում է կայացրել հավաքականում կարիերան ավարտելու վերաբերյալ: Բախտ եմ ունեցել հաճույք ստանալու իր խաղից և մարզումներից: Ինձ համար մեծ պատիվ էր մարզել այսպիսի ֆուտբոլիստի: Ջերմորեն համբուրում եմ Հենոյին՝ մաղթելով ամենայն բարիք: Կարծում եմ՝ Հենոն ավելին է հայկական ֆուտբոլի համար, քան ուղղակի ֆուտբոլիստ: Հենոն առաջատար է և միշտ կմնա այդպիսին»,- Կապառոսի խոսքերն է փոխանցում ՀՖՖ մամուլի ծառայությունը։
Եվ իսկապես, եվրոպական ֆուտբոլում Մխիթարյանն իրեն դրսևորել է որպես աշխատանքի նկատմամբ մեծ նվիրվածություն ունեցող ֆուտբոլիստ։ Ինչ-ինչ, բայց այդ հարցում ոչ մի մարզիչ չի կարող արտահայտել հակառակ կարծիքը․․․
Ո․ Ոգեշնչող
«Վերջին 15 տարիների ընթացքում մեծագույն պատվով եմ խաղացել իմ ազգային հավաքականում, իսկ վերջին 6 տարիների ընթացքում՝ առավել պատվով կրել նրա ավագի թևկապը»,- գրել է Մխիթարյանն իր նամակում։
Հենրիխն այս ամբողջ ժամանակահատվածում եղել է թիմի առաջատարներից մեկը, ում ներկայությունը խաղադաշտում վստահություն էր ներշնչում խաղընկերներին։ Բայց նրա դերակատարումը մեծ է ոչ միայն հավաքականում, այլ նաև ամբողջ հայկական ֆուտբոլում․ հազարավոր երեխաներ հենց Մխիթարյանի հաջողություններով են ոգեշնչվել և սկսել զբաղվել ֆուտբոլով։ Հազարավոր ծնողներ գիտակցեցին, որ ֆուտբոլը պարզապես խաղ չէ, երբ 22 հոգի վազում է մեկ գնդակի հետևից, այլ լուրջ մասնագիտություն, հեռանկարային ոլորտ, որում, ինչպես Մխիթարյանը, իրենց երեխաները ևս կարող են գրանցել մեծ հաջողություններ։
ՀՖՖ նախագահ Արմեն Մելիքբեկյանը ևս անդրադարձել է Հենրիխ Մխիթարյանի հայտարարությանը։
«Տարբեր առիթներով նշել եմ, որ Հենրիխ Մխիթարյանն անկախ Հայաստանի պատմության լավագույն ֆուտբոլիստն է և անուրանալի ներդրում ունի Հայաստանի ազգային հավաքականի հաջողություններում: Հենրիխ Մխիթարյանը հիանալի ելույթներ է ունեցել եվրոպական թոփ առաջնություններում՝ հայկական ֆուտբոլն ավելի ճանաչելի դարձնելով միջազգային ասպարեզում:
Վստահ եմ՝ Մխիթարյանը կայացրել է կշռադատված որոշում, որին պետք է վերաբերվել ամենայն հարգանքով: Ավելորդ է նշել, որ Հայաստանի ազգային հավաքականի դռները միշտ բաց են Մխիթարյանի համար: Հետագա հաջողություններ եմ մաղթում Մխիթարյանին իր ակումբային կարիերայի ընթացքում»,- Մելիքբեկյանի խոսքերն է փոխանցում ՀՖՖ մամուլի ծառայությունը։
⚽ Թիմային նվաճումներ
«Փյունիկ»
🟢 Հայաստանի չեմպիոն (4)՝ 2006, 2007, 2008, 2009
🟢 Հայաստանի գավաթակիր (1)՝ 2009
🟢 Հայաստանի սուպերգավաթակիր (2)՝ 2007, 2008
Ընդհանուր՝ 7 տիտղոս
«Շախտյոր»
🟢 Ուկրաինայի չեմպիոն (3)՝ 2010/11, 2011/12, 2012/13
🟢 Ուկրաինայի գավաթակիր (3)՝ 2010/11, 2011/12, 2012/13
🟢 Ուկրաինայի սուպերգավաթի հաղթող (1)՝ 2012
Ընդհանուր՝ 7 տիտղոս
«Բորուսիա Դ»
🟢 Գերմանիայի սուպերգավաթի հաղթող (2): 2013, 2014
Ընդհանուր՝ 2 տիտղոս
«Մանչեսթեր Յունայթեդ»
🟢 Լիգայի գավաթակիր. 2017
🟢 Անգլիայի սուպերգավաթի հաղթող՝ 2016
🟢 ՈՒԵՖԱ Եվրոպա Լիգայի հաղթող՝ 2017
Ընդհանուր՝ 3 տիտղոս
Անձնական ձեռքբերումներ
🟢 Հայաստանի հավաքականի պատմության լավագույն ռմբարկու
🟢 Հայաստանի տարվա լավագույն ֆուտբոլիստ՝ 10 անգամ
🟢 «Շախտյորի» լավագույն խաղացող 2012թ․
🟢 Ուկրաինայի առաջնության լավագույն խաղացող՝ 2012թ․
🟢 Ուկրաինայի Պրեմիեր լիգայի լավագույն ռմբարկու՝ 2012/13 թթ․
🟢 Ուկրաինայի առաջնության ռեկորդակիր մեկ մրցաշրջանում խփած գոլերի քանակով՝ 25 գոլ
🟢 ԱՊՀ և Բալթյան երկրների լավագույն ֆուտբոլիստ 2012, 2013 թթ․
🟢 Ընդգրկվել է Գերմանիայի Բունդեսլիգայի 2013/14 թթ. խորհրդանշական հավաքականում
🟢 Բունդեսլիգայի լավագույն ասիստենտ՝ 2015/16 (18 փոխանցում)
🟢 2016 Բունդեսլիգայի տարվա լավագույն խաղացող
Մխիթարյանը «Հայրենիքին մատուցած ծառայությունների համար» առաջին աստիճանի շքանշանակիր է, Հայաստանում ՅՈՒՆԻՍԵՖ-ի բարի կամքի դեսպան։
Պարզապես ավելացնենք․ «Հենո՛, շնորհակալությո՜ւն ամեն ինչի համար, և այժմ չենք ասում ցտեսություն (հավաքականում), այլ պարզապես՝ մինչ հանդիպում, քեզ նորանոր հաջողություններ»․․․
ArmSport-ի պատրաստած Մխիթարյանի ֆոտոշարքը՝ ստորև․
GALLERY
