ՀՀ Նախագահի 2021 թվականի դեկտեմբերի 28-ի թիվ 406-Ա հրամանագրով Ֆիզիկական կուլտուրայի և սպորտի զարգացման գործում ներդրած ավանդի համար, ինչպես ավելի վաղ հայտնել էինք, երախտագիտության մեդալով պարգևատրվել է սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը:
ArmSport-ի հետ զրույցում անվանի մասնագետը փաստել է՝ հաճելի է, երբ աշխատանքդ գնահատվում է. «Շնորհակալ եմ այս պարգևի համար: Երբ աշխատանքը գնահատվում է, բնականաբար քեզ ավելի լավ ես զգում ու նաև շատ ավելի պարտավորված: Կաշխատենք ավելի լավ արդյունքներ ցույց տալ մեր ասպարեզում»:
Մարմնամարզիկները հունվարի 30-ից 14-օրյա հավաք են անցկացնելու Թբիլիսում՝ պատրաստվելով Աշխարհի Գավաթի փուլերին. «Աշխարհի Գավաթի խաղարկությունն անցկացվելու է 3 փուլով, պիտի հերթով մասնակցենք այդ փուլերին և միավորներ հավաքենք Աշխարհի առաջնությանը մասնակցելու համար»:
Հակոբ Սերոբյանն ընդգծում է՝ թեև Աշխարհի առաջնությունն է առջևում, բայց տարվա գլխավոր նպատակը սա չէ. «Մենք երիտասարդներ ենք պատրաստում ամռանը կայանալիք Եվրոպայի թիմային առաջնության համար, որին նաև մեծահասակները կմասնակցեն: Երիտասարդները 4 տարի չեն մասնակցել Եվրոպայի առաջնությանը, ունենք լավ երեխաներ: Հուսով եմ՝ պետք է լավ մասնակցենք: Եվրոպայի առաջնությունում մեծահասակները պետք է թիմային հաշվարկով նորից առնվազն 13-րդ հորիզոնականը զբաղեցնեն, որպեսզի Աշխարհի առաջնությանը մասնակցելու իրավունք ստանան»:
Վրաստանի մայրաքաղաքում կայանալիք հավաքին մասնակցելու են մեծահասակները, ովքեր հանդես են գալու Աշխարհի Գավաթի փուլերին և ոչ միայն.
«Ամեն հավաքին նաև երկու երիտասարդ կմասնակցի, նրանք, ովքեր մեկնելու են Եվրոպայի առաջնությանը: Վստահ եմ՝ հավաքն այդպես ավելի արդյունավետ կլինի, քանի որ երիտասարդները մեծահասակների հետ կմարզվեն ու նրանցից շատ բան կսովորեն»,- ասում է Հակոբ Սերոբյանը:
Հակոբ Սերոբյանը, ամփոփելով նախորդ տարին, այն պատմական է բնորոշում սպորտային մարմնամարզության համար.
«2021-ն ամենալավ տարին էր մեզ համար, քանի որ նշանակալի օրեր ունեցանք: Ապրիլի 24-ին Արթուր Դավթյանը դարձավ Եվրոպայի չեմպիոն, իսկ ամռանը 41 տարվա դադարից հետո օլիմպիական մեդալ նվաճեցինք՝ ի դեմս Դավթյանի բրոնզի: Սա պատմական իրադարձություն էր:
Պատերազմից հետո առաջին մրցումը, որ եղավ Եվրոպայի առաջնությունն էր, ու զգացինք՝ մեր ասպարեզում հաղթանակ ունեցանք: Սա շատ կարևոր էր: Կրկնակի պարտավորվածությամբ էինք մասնակցում: Առհասարակ մրցումներից հետո ես սովորաբար նշում եմ՝ գոհ էի, թե դժգոհ, բայց Եվրոպայի առաջնությունից հետո բացի դրանից նաև շնորհակալություն հայտնեցի տղաներին: Այնպես որ, շատ լավ տարի էր մեզ համար»:
Հակոբ Սերոբյանն անդրադառնում է նաև մեր մյուս մարմնամարզիկներին. «Եվրոպայի առաջնությունում մեր երկու մարզիկ 4-րդ հորիզոնականը զբաղեցրեց: Իհարկե, քանի որ չեմպիոն ունենք, նրանց արդյունքը մղվում է երկրորդ պլան: Ի դեպ, շատ քիչ տարբերությամբ՝ ընդամենը 0,5 միավորով զիջեցին: Եվրոպայի առաջնությանը 5 ներկայացուցչով մասնակցեցինք ու բոլորն էլ դուրս եկան եզրափակիչ: Սա ևս հաջողություն է»:
Սպորտային մարմնամարզության հավաքականի գլխավոր մարզիչն ասում է՝ լուրջ վնասվածքներ այս պահին թիմում չկան. «Վնասվածքներ կան, որոնք, բարեբախտաբար, շատ լուրջ չեն, բայց անկասկած մասնակցությունների վրա կազդի: Արթուր Ավետիսյանն ուսի վիրահատության էր ենթարկվել, կմասնակցի առաջիկա մրցումներին, բայց պետք է տեսնենք՝ ինչպես: Արթուր Դավթյանը հիմա ծնկի վնասվածք ունի, թեթև է, բուժում է անցնում: Միշտ էլ կան վնասվածքներ, բայց դրանց մասին չենք բարձրաձայնում, քանի որ տղաներն այդպես էլ են մասնակցում մրցումներին, թեպետ որակի վրա իհարկե ազդում է: Ամեն դեպքում, հուսով եմ՝ պետք է լավ լինի»:
Նշենք՝ մարմնամարզիկների համար թբիլիսյան հավաքը կտևի երկու շաբաթ:
Եվրոպայի առաջնությունը կկայանա օգոստոսի 18-ից 21-ը Գերմանիայում, իսկ Աշխարհի առաջնությունը կանցկացվի նոյեմբերի 29-ից դեկտեմբերի 6-ն Անգլիայում:
Նարե Հովհաննիսյան
