Հունվարի 18-ին լրանում է Հայաստանի ֆուտբոլի ֆեդերացիայի հիմնադրման 30-ամյակը: Այս առիթով ՀՖՖ նախագահ Արմեն Մելիքբեկյանը հանդես է եկել ուղերձով.
«Սա նշանակալի իրադարձություն է հայաստանյան ֆուտբոլային հանրության համար։ 30 տարին մի ժամանակահատված է, երբ արդեն կարելի է գիտակցված գնահատականներ տալ անցած ուղուն և, հիմնվելով այս տարիների ընթացքում ստեղծվածի վրա, փորձել կանխագուշակել, թե ինչ ճանապարհով է զարգանալու հայկական ֆուտբոլը: Գիտակցում ենք՝ ճանապարհը հեշտ չէ, սակայն մենք միասին՝ ֆուտբոլիստները, պաշտոնյաները, երկրպագուները, պատրաստ ենք առաջ գնալ՝ հաղթահարելով դժվարությունները և խոչընդոտները:
Դժվարությունները և խոչընդոտները հաղթահարելու համար ամենակարևոր բաղադրիչներն են միասնականությունն ու ներառականությունը։ Համատեղ ջանքերն ու նվիրվածությունն անխուսափելիորեն հաջողություն կբերեն, և այդ գործընթացում մենք պարտավոր ենք ներառել հայկական ֆուտբոլի բոլոր տարրերը։ Այսօր ևս մեկ անգամ ցանկանում եմ ընդգծել՝ հայկական ֆուտբոլը ոչ միայն պրոֆեսիոնալ ֆուտբոլի մակարդակն է, այլ նաև մեծ բուրգի բոլոր մասնակիցներն են, որոնք հավասարաչափ կարևոր են և առանց որոնց չի կարող կերտվել իրական հաջողությունը։ Եվ այդ հաջողությունը ոչ միայն մեր ազգային հավաքականի անցյալի և ապագայի հաղթանակներն են, այլև մասսայական և սիրողական ֆուտբոլը, կանանց ֆուտբոլն ու ֆուտզալը, սիրողական մրցաշարերի անցկացումը, ենթակառուցվածքների բարելավումը»,- ասվում է Արմեն Մելիքբեկյանի ուղերձում:
ՀՖՖ նախագահն ընդգծում է՝ այս ամենի համընթաց զարգացումը միայն կարող է բերել իսկական հաղթանակների, որոնք չեն չափվում լոկ խաղավերջում արձանագրված հաշվով, այլ ներառում են բազմաթիվ այլ գործոններ, օրինակ, ֆուտբոլ խաղի բերկրանքը վայելող մարդկանց թիվը, նրանց առողջությունը, թիմային աշխատանքի կարևորության գիտակցումը, երեխաների սոցիալականացումը։
Արմեն Մելիքբեկյանը նաև տեղեկացրել է, որ այս տարի Հայաստանի ֆուտբոլի ֆեդերացիան մի շարք միջոցառումներ է նախանշել. «Տարվա ընթացքում մենք կհիշենք հայկական ֆուտբոլի վետերաններին, կփորձենք լրացնել հայկական ֆուտբոլի բաց էջերը և տարեգիրք ստեղծել, որպեսզի ապագա սերունդները չմոռանան ֆուտբոլում ամբողջական կյանքեր ապրած և այս խաղին նվիրված մարդկանց, նրանց, ովքեր ապահովել են հայկական ֆուտբոլի շարունակականությունը»:
Շնորհավորելով բոլոր այն մարդկանց, ովքեր «անցած 30 տարիների ընթացքում ազնվորեն աշխատել են հայկական ֆուտբոլում, աջակցել են դրա զարգացմանը, անմնացորդ նվիրվել են սիրելի խաղին»՝ Արմեն Մելիքբեկյանն ընդգծել է, որ առանց նրանց մենք չէինք կարողանա աշխատել այսօր և ապագայի ծրագրեր մշակել՝ ի շահ հայկական ֆուտբոլի զարգացման։
«Հատուկ շնորհակալություն եմ հայտնում Հայաստանի ֆուտբոլի ֆեդերացիայի հիմնադրման ակունքներում կանգնած մարդկանց, որոնք երկրի համար բարդ ժամանակահատվածում ստանձնել են այդ կարևոր առաքելությունը։ Եվս մեկ անգամ շնորհավորում եմ բոլորիս այս նշանակալի տարեդարձի կապակցությամբ և հաջողություն մաղթում գալիք ֆուտբոլային տարում»,- ասվում է ՀՖՖ նախագահի ուղերձում:
