Հայաստանի ազգային հավաքականն ավարտեց իր 7-րդ արշավը աշխարհի առաջնություններում։ Մեր ընտրանին 7-րդ անգամ մրցաշարի եզրափակիչ փուլին կհետևի տանից։ Այս որակավորման փուլի առաջին երեք տուրերում տարած հաղթանակներից հետո հայ երկրպագուները հայտնվել էին 7-րդ երկնքում մինչև Ֆլիկն ու Ֆրիկը մեզ իրականություն վերադարձրին (Գերմանիա-Հայաստան՝ 6-0, Հայաստան-Լիխտենշտեյն՝ 1-1)։
Մեր ընտրանու խաղի և գրանցած արդյունքների վերաբերյալ կարծիքները կարող են տարբերվել, բայց տեսնենք՝ ինչ է փաստում վիճակագրությունը։
Հայաստանի ազգային հավաքականը 1998-ի աշխարհի առաջնությունից ի վեր մրցաշարում անցկացրել է 72 հանդիպում, որից 13-ում հաղթել է, 17-ն ավարտել ոչ-ոքի, իսկ 42-ում պարտվել է։ Այդ խաղերում մեր թիմը մրցակիցների դարպասը գրավել է 61 անգամ, իսկ սեփական դարպասն ընդունել 142 գնդակ։
ԱԱ-1998-ի որակավորման փուլում Հայաստանի հավաքականը հայտնվել էր 9-րդ խմբում, որտեղ էլ առաջին անգամ հանդիպեց Գերմանիայի ընտրանուն։
Մեր հավաքականն այս մրցաշարում իր առաջին խաղն անցկացրեց տանը՝ մրցելով Պորտուգալիայի հետ ու կարողացավ 0-0 ավարտել հանդիպումը։
4 տարի անց մեր ընտրանին հայտնվեց 5-րդ խմբում և նահանջեց վերջին՝ 6-րդ հորիզոնական։
ԱԱ-2006-ի ընտրական փուլի 1-ին խմբում մեր թիմը կրկին 6-րդն էր՝ նախավերջինը մրցաշարային աղյուսակում։
ԱԱ-2010-ի ընտրական փուլում Հայաստանի հավաքականը վերջինն էր 5-րդ խմբում, բայց հատկանշական է, որ տանը 2-1 հաշվով հաղթել էր ֆավորիտներից մեկը համարվող Բելգիայի ընտրանուն։ Ի դեպ, այս ընտրական փուլում մեր խմբում տեղ էր գտել նաև Թուրքիայի ընտրանին։
Աշխարհի 2014 թվականի առաջնության որակավորման փուլում մեր հավաքականը B խմբում ուժեղ մրցակիցների էր հանդիպել ու թեև այն ավարտեց 5-րդ տեղում, այնուամենայնիվ այնքան էլ վատ արդյունքներ չգրանցեց։
Նախորդ՝ 2018 թվականի ԱԱ-ի որակավորման փուլը մեզ համար ավարտվեց E խմբի կրկին 5-րդ տեղում, բայց 10 խաղում բաց թողեցինք կրկնակի շատ գոլ ու մեծ մասում պարտություն կրեցինք։
Օրեր առաջ ավարտված ԱԱ-2022-ի ընտրական փուլը մեզ համար ցավալի ստացվեց․ հիանալի մեկնարկ ու տխուր վերջաբան։ J խմբի մեր մրցակիցներին հազիվ թե հասցրած լինեք մոռանալ։
Հատկանշական է, որ մեր հավաքականը ԱԱ-ի որակավորման փուլերում 4-րդ տեղից վեր չի բարձրացել՝ ավելի շատ հայտնվելով նախավերջին կամ վերջին տեղերում։
Ամենահաջողը կարելի է համարել ԱԱ-2014-ի որակավորման փուլը, որտեղ թեև զբաղեցրինք 5-րդ տեղը, բայց երկրորդ տեղում գտնվող դանիացիներից հետ էինք ընդամենը 3 միավորով։ Օրինակի համար կարելի է նշել, որ այս ընտրական փուլում, որտեղ հաստատվեցինք 4-րդ տեղում, ունենք 12 միավոր և երկրորդ տեղում գտնվող Հյուսիսային Մակեդոնիային զիջում ենք 6 միավորով։
Ամենաանհաջողը կարելի է համարել 2002-ի և 2010-ի որակավորման փուլերը․ առաջինում հաղթանակ չենք ունեցել, բայց 5 ոչ-ոքիի շնորհիվ վաստակել ենք 5 միավոր, իսկ երկրորդում ունեցել ենք ընդամենը 1 հաղթանակ, 1 ոչ-ոքի և 8 պարտություն՝ վաստակելով 4 միավոր։
Մեր հավաքականի լավագույն ռմբարկուները՝ ըստ ընտրական փուլերի․
ԱԱ-1998․ Էրիկ Ասադուրյան՝ 3 գոլ
ԱԱ-2002․ Արթուր Պետրոսյան՝ 3 գոլ
ԱԱ-2006․ Արա Հակոբյան՝ 3 գոլ
ԱԱ-2010․ 6 ֆուտբոլիստ խփել է մեկական գնդակ
ԱԱ-2014․ Յուրա Մովսիսյան՝ 4 գոլ
ԱԱ-2018․ Հենրիխ Մխիթարյան՝ 2 գոլ
ԱԱ-2022․ Հենրիխ Մխիթարյան, Տիգրան Բարսեղյան՝ 2-ական գոլ։
Այսպիսով, մեկ ընտրական փուլում լավագույն արդյունքն ունի Յուրա Մովսիսյանը։
Ինչ վերաբերում է այս ընտրական փուլին, ապա նշենք, որ խփած գնդակների քանակով զիջում ենք միայն նախորդ երկու որակավորման փուլերին, բաց թողած գոլերի քանակով այն վատագույններից էր, ընդ որում 20 գոլի 50%-ը բաց ենք թողել միայն գերմանացիներից։ Հարկ է նշել, սակայն, որ 1998 թվականից ի վեր այս մրցաշարում ավելի շատ միավոր (13) վաստակել էինք միայն ԱԱ-2014-ի ընտրական փուլում։
Այս ընտրական փուլում մեր թիմի կազմում ամենից շատ հանդիպում անցկացրել է ծագումով նիգերիացի ֆուտբոլիստ Սոլոմոն Ուդոն, որը դաշտ է դուրս եկել բոլոր 10 խաղերում։
Հավելենք նաև, որ մեր ազգային թիմի կազմում այս ընտրական փուլում իրենց նորամուտը նշեցին Ստանիսլավ Բուչնևը, Դավիթ Տերտերյանը, Ժիրայր Մարգարյանը, Լուկաս Սելարայանը, Իշխան Գելոյանը, Արթուր Ավանեսյանը, Նարեկ Գրիգորյանը և Ժիրայր Շաղոյանը։
Ստելլա Բաբլոյան
