Երևանում բացվել է Արցախյան երկրորդ պատերազմում զոհված, ՀՀ ազգային հերոս Վահագն Ասատրյանի անվան մարտարվեստների ակադեմիա։ Այն Վահագն Ասատրյանի անունով կոչելու նախաձեռնությամբ հանդես է եկել Կիոկուշին կարատեի ազգային ֆեդերացիան։ Ակադեմիայի ստեղծմանն աջակցել է Վահագն Ասատրյանի ընկերը՝ ռուսաստանաբնակ Արմեն Մուրադյանը։
Միջոցառմանը ներկա էին հերոսի ընկերները, ընտանիքի անդամները, Քինգ-բոքսինգի ազգային ֆեդերացիայի նախագահ, ոստիկանության գնդապետ Գառնիկ Հայրապետյանը, Սասունցի Դավիթ կամավորական ջոկատի հիմնադիր-հրամանատար Համլետ Հովսեփյանը:
Մարտարվեստների ակադեմիայում սաները կմարզվեն MMA, կյոկուշին կարատե և քինգ-բոքսինգ մարզաձևերով:
«Մենք Վահագն Ասատրյանի մանկության ընկեր՝ Արմեն Մուրադյան հետ, որոշեցինք հիմնել մարտարվեստների ակադեմիա, ոչ թե միայն կյոկուշին կարատեի, քանի որ ցանկանում էինք ընտրությունը լայն լիներ, ու հնարավորություն տայինք ավելի շատ երեխաների, ով ինչ սիրում է՝ դրանով զբաղվի:
Մարզադպրոցում կմարզվեն 300 հոգի: Ունենք 3 դահլիճ: Արդեն ունենք մեծ հետաքրքրվածություն: Հոկտեմբերի 1-ից ակադեմիայի դռներն արդեն բաց կլինեն: Այս ամենը լինելու է անվճար հիմունքներով: Այստեղ մարզելու են աշխարհի ու Եվրոպայի չեմպիոններ, այդ թվում՝ կյոկուշին կարատեի աշխարհի չեմպիոն Արման Մելքոնյանը, Կնյազ Սահակյանը, MMA-ի ներկայացուցիչ Աշոտ Պետրոսյանը, Քինգ-բոքսինգի աշխարհի չեմպիոն Արման Սահակյանը: Մարզիչներին պատահական չենք ընտրել, բոլորը Եվրոպայի, աշխարհի չեմպիոն կամ մրցանակակիրներ են: Վահագնի հետ մանուկ հասակում մարզվել ենք, իսկ Արմեն Մուրադյանը նախկին մարզիկ է: Գաղափարն այն է, որ մեր ընկերոջ հիշատակը վառ պահենք, նրա գործը շարունակենք, երեխաներին հնարավորինս կտրենք փողոցից»,-ArmSport-ի հետ զրույցում ասաց կյոկուշին կարատեի ազգային ֆեդերացիայի նախագահ Սպարտակ Գասպարյանը:
Մարտարվեստների ակադեմիայի նախագահ Լևոն Գրիգորյանն իր ելույթում նշեց, որ մենք պարտական ենք Վահագնին և բոլոր հերոս տղաներին, որոնք իրենց կյանքի գնով պահեցին մեր անկախությունն ու կյանքի լուսավոր օրերը։
«Մենք պետք է հիշենք ու միշտ վառ պահենք նրանց անուններն ու հիշատակը։ Մեր ակադեմիան, կրելով հերոսի անունը, պարտավորվում է սպորտի բնագավառում դրսևորել հաղթական կամք, միասնականություն, քանի որ սպորտը հանդիսանում է ևս մեկ խթան՝ ուղղված Հայաստան-Արցախ-Սփյուռք եռամիասնության շարունակական ամրապնդմանը»,- ասաց ակադեմիայի նախագահը։
Քինգ-բոքսինգի աշխարհի չեմպիոն, Mix Fight-ը ներկայացնող Արման Սահակյանը մեզ հետ զրույցում կարևորեց նման մարզադպրոցների դերը:
«Ամենաճիշտ տարբերակը սա է՝ երեխաներին փողոցին կտրելու և առողջ ապրելակերպը խթանելու համար: Սա ևս մեկ քայլ է առողջ սերունդ դաստիրակելու համար: Ես որպես գործող մարզիկ ու մարզիչ խորհուրդ եմ տալիս բոլորին, որ զբաղվեն սպորտով»,-ասաց քինգ-բոքսինգի աշխարհի ու Եվրոպայի չեմպիոն Արման Սահակյանը:
Վահագն Ասատրյանը եղել է ՀՀ ԶՈՒ հատուկ նշանակության զորամասի հրամանատարը։ Նա մասնակցել է 2020 թվականի հայ-ադրբեջանական պատերազմին։ Իր հրամանատարությամբ գործող ստորաբաժանումը մի շարք մարտական գործողությունների է մասնակցել։
Վահագն Ասատրյանն իր ղեկավարած հատուկ նշանակության ստորաբաժանման հետ կատաղի մարտեր է մղել Հադրութ քաղաքում և մերձակայքում։ Զոհվել է 2020 թվականի հոկտեմբերի 12-ին՝ Հադրութ քաղաքի պաշտպանության ժամանակ, ադրբեջանական զինված ուժերի կողմից արձակված հրթիռի հարվածից։ 2020 թվականին տեղի ունեցած հայ-ադրբեջանական պատերազմի ժամանակ հայրենիքի պաշտպանության և անվտանգության ապահովման գործում մատուցած բացառիկ ծառայությունների, մարտական գործողությունների ընթացքում ցուցաբերած անձնուրացության և անմնացորդ նվիրումի համար Վահագն Ասատրյանը հետմահու արժանացել է «Հայաստանի ազգային հերոս» բարձրագույն կոչման։
