Արցախի Հանրապետության Կրթության, գիտության, մշակույթի և սպորտի նախարար Լուսինե Ղարախանյանն անդրադարձել է ադրբեջանցիների կողմից «Լեռնային Արցախ» ՖԱ-ի մանկապատանեկան թիմի միկրոավտոբուսը կանգնեցնելու փաստին. Ղարախանյանն ընդգծել է, որ կատարվածն ահաբեկչության դասական օրինակ է.
«Այսօր հանդիպեցի Արցախի ֆուտբոլի մանկապատանեկան թիմի հետ։ Արցախի մանկապատանեկան թիմին տեղափոխող ավտոբուսի հետ կատարվածը ահաբեկչության դասական օրինակ է։ Սա Բեսլանի սարսափը վերապրելու և զգալու առիթ դարձավ։ Իսկ Արցախի տարբերանշանը քերելը կարծրացող հայատյացության ևս մի ապացույց է։ Սպորտը քաղաքականացման ենթակա չէ, ահաբեկման՝ առավել ևս։
Մեր մարզիկները չեն տրվել թուրք ահաբեկչի սադրանքին։ Նրանք կշարունակեն սպորտով նվաճել բարու, հաղթանակի, ուժի, ինքնահաղթահարման սահմանները։ Ի դեպ, թիմը 2020_2021 թվականների ՀՀ պատանիների ֆուտբոլի առաջնության չեմպիոն է, իսկ Գերմանիայի Լայպցիգ քաղաքի 16 երկրների ֆուտբոլի պատանիների մրցույթում այս տարի նվաճել են երկրորդ տեղը։
Ո’չ ահաբեկչությանը»,- գրել է Արցախի Հանրապետության Կրթության, գիտության, մշակույթի և սպորտի նախարարը:
Ավելի վաղ հայտնել էինք, որ սեպտեմբերի 17-ին ադրբեջանիցները Գորիս-Կապան ավտոճանապարհի Որոտանի հատվածում կանգնեցրել են Արցախի ֆուտբոլի մանկապատանեկան թիմի միկրոավտոբուսը: Երեխաներին ֆիզիկական վնաս չեն հասցրել, բայց փորձել են հոգեբանական ճնշում գործադրել, մասնավորապես՝ թշնամու ուժային կառույցի ծառայողը երեխաներին դիմել է՝ ասելով.
«Ղարաբաղն Ադրբեջան է, պա՞րզ է»։
Երեխաները չեն տրվել սադրանքին ու որևէ կերպ չեն արձագանքել:
