Կիպրոսցի 53-ամյա մարզիչ Պամբոս Քրիստոդուլուն նշանակվել է «Սևան» ֆուտբոլային ակումբի գլխավոր մարզիչ, հայտնում է ակումբի մամուլի ծառայությունը։
Կիպրոսցի մասնագետի հետ համագործակցության պայամանագիր է ստորագրվել մինչև 2021/22 մրցաշրջանի ավարտը։
Պամբոս Քրիստոդուլուն իր մարզչական կարիերան սկսել է 2006 թվականին «Դոքսա» (Կատոկոպիա) թիմում։ Մարզչական կարիերայի ընթացքում մարզել է Կիպրոսի հայտնի ակումբներ՝ «Օլիմպիակոսը», «Անորտոսիսը», «Օմոնիան» ԱԷԼ-ը։
2014 թվականին նշանակվել է Կիպրոսի ազգային հավաքականի գլխավոր մարզիչ, ու այդ պաշտոնում հավաքականը գլխավորել է ԵՎՐՈ-2016-ի խմբային ընտրական փուլում։ Տոնել է հաղթանակներ Բոսնիայի և Հերցեգովինայի, Իսրայելի ու Անդորրայի հավաքականների նկատմամբ։
Ակումբային մակարդակով մեծ հաջողությունների է հասել ԱԷԼ-ի գլխավոր մարզչի պաշտոնում։ 2011/12 մրցաշրջնում Քրիստոդուլույի ԱԷԼ-ը հռչակվել է Կիպրոսի չեմպիոն՝ սահմանելով յուրահատուկ ռեկորդ․ մրցաշրջանում թիմը 26 խաղերում բաց է թողել ընդամենը 7 գնդակ։ 2012/13 մրցաշրջանում մասնակցելով Չեմպիոնների լիգայի որակավորման փուլին, երրորդ փուլում Քրիստոդուլույի գլխավորությամբ ԱԷԼ-ը հաղթանակի է հասել սերբական «Պարտիզանի» նկատմամբ, իսկ չորրորդ փուլի առաջին խաղում 2։1 հաշվով հաղթել է բելգիական «Արնդերլեխտին», բայց զիջել պատասխան խաղում 0։2 հաշվով, ու մասնակցել Եվրոպայի լիգայի խմբային փուլին։
2016 թվականին նորից գլխավորելով Լիմասոլի ԱԷԼ թիմը, Պամբոս Քրիստոդուլուն, հերթական անգամ նվաճել է Կիպրոսի չեմպիոնի կոչումը։ Չորս անգամ ճանաչվել է որպես Կիպրոսի լավագույն մարզիչ։
Մինչև «Սևանի» հետ պայմանագիր ստորագրելը աշխատել է «Նեա Սալամինա» թիմում։
«Պամբոս Քրիստոդուլույին նշանակումը չի փոխելու «Սևան» ֆուտբոլային ակումբի մարզչական կազմը։ Մեր ակումբում շարունակելու են աշխատել գլխավոր մարզչի օգնական՝ Աղվան Այվազյանը, դարպասապահների մարզիչ՝ Արմեն Ավագյանը, ինչպես նաև ֆիզիկական պատրաստականության մարզիչ Ռաֆա Բիսպոն։ Լրիվ հակառակը մարզչական կազմը համալրվելու է։ Գլխավոր մարզչին օգնելու է նաև հույն մարզիչ՝ Գեորգիոս Կոստիսը։
Բարի գալուստ, և բարի երթ Պամբոս Քրիստոդուլու։
Հուսով ենք, ու հավատում ենք որ նոր մարզչի հետ հաղթանակները շատ են լինելու․․․»,- ասված է ակումբի ամմուլի ծառայության հաղորդագրության մեջ։
