Հունիսի 15-ին կայացած վիճակահանությամբ պարզ դարձավ, որ Չեմպիոնների Լիգայի որակավորման առաջին փուլում Հայաստանի չեմպիոն «Ալաշկերտի» մրցակիցը Ուելսից «Քոնաս Քի Նոմադս» ակումբն է:
Նախքան կմեկնարկեն եվրագավաթային խաղերը, ArmSport-ն առաջարկում է ծանոթանալ մեր թիմերի մրցակիցներին։
Եվ այսպես, ո՞վ է «Ալաշկերտի» մրցակիցը․․․
«Քոնաս Քի Նոմադսը» պրոֆեսիոնալ ֆուտբոլային ակումբ է, որ ներկայացնում է Ուելսը։ Այն հանդես է գալիս երկրի ազգային լիգայում՝ Քամրի Պրեմիերում, և հանդիսանում է դրա գործող չեմպիոնը։
Ակումբը հիմնադրվել է 1946 թվականին՝ անվանվելով «Քոնաս Քի Ջունիորս», բայց 1951-ին վերանվանվել է «Քոնաս Քի Նոմադս»։ Ի տարբերություն «Ալաշկերտի», որը Հայաստանի քառակի չեմպիոն է, այս թիմն իր պատմության ընթացքում երկու անգամ է նվաճել երկրի չեմպիոնությունը՝ անցած և նախանցած տարի։
Թեպետ ակումբի տնային մարզադաշտը «Դիսայդ Ստեդիումն» է, բայց Հայաստանի չեմպիոնին ուելսցիները կընդունեն «Պարկ Ավենյու» կոչվող մարզադաշտում։
Ի դեպ, այնտեղ հասնելու համար, ակումբի մամուլի քարտուղարի թվիթերյան էջի գրառումներից դատելով, «Քոնաս Քի Նոմադսը» ևս երկար ճանապարհ պիտի անցնի։
Nice day for a stadium visit to Park Avenue yesterday to start preparations for @the_nomads @ChampionsLeague qualifying round match next month. It’s a long round trip, but I suspect harder for our Armenian visitors. Definitely going to be arranging some fan buses for our fans 🏆 pic.twitter.com/iIxtwUckum
— Tom Houghton (@TomHoughton7) June 19, 2021
«Քոնաս Քի Նոմադսը» 6-րդ անգամ է մասնակցում եվրագավաթային խաղի, ընդ որում՝ երկրորդ անգամ է դա Չեմպիոնների լիգան։ Ուելսցիներն այս ընթացքում 2 անգամ կարողացել են հաղթահարել Եվրոպա լիգայի առաջին որակավորման փուլի արգելքը, իսկ մեկ անգամ այդ մրցաշարի երկրորդ որակավորման փուլում հայտնվել են ՉԼ առաջին որակավորման փուլում պարտվելուց հետո։
Այս թիմի կազմում, ինչպես մեր թիմում, շատ են փորձառու խաղացողները, իսկ ամենամեծը թիմի ավագն է՝ 39-ամյա Ջորջ Հորանը։
Ուելսցիների կազմում ամենաթանկարժեք ֆուտբոլիստներն են Հորանը, թիմի նորեկ Ջեյմի Մալենը և Մայքլ Ուայլդը՝ բոլորը 125 հազար եվրո շուկայական արժեքով։ Մեր չեմպիոններն ավելի թանկարժեք են։ Ամենաբարձրը, ըստ Transfermarkt-ի, 29-ամյա բրազիլացի Տիագու Կամետայի ու 28-ամյա ֆրանսիացի Վինսեն Բեզեկուրի արժեքներն են՝ 350 հազար եվրո։
Ուելսցիների գլխավոր մարզիչը շոտլանդացի նախկին ֆուտբոլիստ Էնդի Մորիսոնն է։ 50-ամյա մասնագետն իր կարիերայի ընթացքում հանդես է եկել տարբեր թիմերում՝ այդ թվում «Մանչեսթեր Սիթիում»՝ 1998-2002 թվականներին։ Իսկ այս ակումբը նա գլխավորում է 2015-ից։
Վիճակահանության արդյունքներն իմանալուց հետո Մորիսոնն ասել էր, որ մի փոքր հասցրել է ուսումնասիրել հայկական թիմին ու իմանալ, որ «այն հիմնականում կազմված է հայ ֆուտբոլիստներից, կան նաև բրազիլացիներ, սերբեր»։ «Բարդ խաղ է սպասվում»,- ասել էր նա։
Թիմերի միջև առաջին խաղը կկայանա հուլիսի 7-ին Ուելսում, իսկ Երևանում մրցակցին կընդունենք մեկ շաբաթ անց՝ հուլիսի 14-ին։
Հիշեցնենք՝ մեր չեմպիոնը առաջին փուլի արգելքը հաղթահարելու դեպքում կհանդիպի «Շերիֆ» (Մոլդովա)-«Տեուտա» (Ալբանիա) զույգի հաղթողի հետ։
Ստելլա Բաբլոյան
