Միջազգային օլիմպիական կոմիտեի (ՄՕԿ) նախագահ Թոմաս Բախը իր այցը Ճապոնիա, որտեղ պետք է անցկացվի 2020 թվականի ամառային օլիմպիական խաղերը, հետաձգել է մինչև հուլիսի 12-ը: Այսինքն, ՄՕԿ-ի ղեկավարը խաղերի մայրաքաղաք կժամանի մրցաշարի մեկնարկից ընդամենը 11 օր առաջ:
Պարոն Բախի այս որոշումը ևս մեկ անգամ խթանեց այն խոսակցությունները, որ արդեն մեկ տարով հետաձգված 2020 թվականի խաղերը կրկին սպառնալիքի տակ են, չնայած այն հանգամանքին, որ ՄՕԿ-ը և Ճապոնիայի իշխանությունները դեռևս հավատարիմ են այն դիրքորոշմանը, որ ՕԽ-ն անպայման անցկացվելու է: Միևնույն ժամանակ, ըստ վերջին հարցումների, Ճապոնիայի բնակիչների ավելի քան 80%-ը դեմ է օլիմպիական խաղերին:
ՄՕԿ-ի նախագահ Թոմաս Բախը նախատեսվում էր ստուգողական այց կատարել Ճապոնիա դեռ մայիսին: Բայց կորոնավիրուսի հերթական՝ արդեն չորրորդ բռնկման պատճառով, այցը հետաձգվեց հունիս: ՄՕԿ-ն ամենայն հավանականությամբ ակնկալում էր, որ COVID-19 բռնկման միայն աննշան աճ կգրանցվի: Սակայն Ճապոնիայում, չնայած այն բանին, որ մայիսի սկզբից ի վեր, երկրի իշխանությունները վերստին կիրառեցին սահմանափակող միջոցներ, օրական գրանցվում է վարակի մոտ 7 հազար դեպք, ինչը համեմատելի է հունվարյան ցուցանիշների հետ: Այս ֆոնին օլիմպիական խաղերին դեմ հանդես եկող Ճապոնիայի քաղաքացիների քանակն ավելացավ:
ՄՕԿ-ի և Ճապոնիայի իշխանությունների միջև առցանց խորհրդատվությունները շարունակվում են վերջին երեք օրվա ընթացքում: Ըստ ամենայնի, այդ ընթացքում ՄՕԿ-ից պահանջվում էր երաշխավորել խաղերի անվտանգ անցկացումը: Թոմաս Բախը շտապեց կատարել համապատասխան հայտարարություններ ՝ նշելով, որ «ՄՕԿ-ը կենտրոնացած է օլիմպիական խաղերը անվտանգ անցկացնելու վրա», ինչպես նաև ասաց, որ մարզիկների մինչև 80% -ը արդեն պատվաստված կժամանեն Տոկիո: ՄՕԿ-ի ղեկավարը չի պարզաբանել, թե որտեղից է ստացել նման տվյալներ: Ավելի վաղ նա նաև ասել էր, որ պատվաստումը օլիմպիական խաղերին մարզիկների մասնակցության համար նախապայման չէ:
Մինչդեռ ճապոնացի պաշտոնյաները քննարկում են Օլիմպիական խաղերին օտարերկրյա երկայացուցիչների մասնակցությունը կտրուկ կրճատելու հնարավորությունը: Ավելի վաղ որոշվել էր, որ արտասահմանցի երկրպագուները չեն կարողանա մասնակցել մրցաշարին: Ճապոնացի երկրպագուների՝ տրիբունաներում ներկա լինելու հարցի վերաբերյալ որոշումը հետաձգվել է հունիս: Բայց, ինչպես հայտնում է Kyodo գործակալությունը, Ճապոնիայի իշխանությունները պատրաստվում են օլիմպիական խաղերում կրկնակի կրճատել օտարերկրյա «պատվիրակությունների» թիվը:
Հիշենք, որ Ճապոնիայի համար ՕԽ անցկացման հարցը վաղուց արդեն անցել է զուտ մարզական և կազմակերպչական հարթությունից քաղաքական: Գործողության մեջ ներգրավված են ոչ միայն երկրի իշխանությունները, այլև մարզերի ղեկավարությունը: Այսպիսով, անցյալ շաբաթ չորս տասնյակ ճապոնական բնակավայրեր՝ սկսած խոշոր քաղաքներից և ավարտված գյուղերով, հրաժարվեցին մասնակցել օլիմպիական նախագծին:
