«Արարատի» գլխավոր մարզիչ Վարդան Բիչախչյանն իր թիմի՝ Հայաստանի Գավաթի եզրափակչում տարած հաղթանակից հետո կիսվել է տպավորություններով։
«Արարատը», հիշեցնենք, 3-1 հաշվով հաղթեց «Ալաշկերտին» ու 13 տարվա դադարից հետո առաջին անգամ դարձավ Հայաստանի գավաթակիր․
«Ցանկանում եմ շնորհավորել «Արարատ» ակումբին՝ սկսած մեր հավաքարարներից մինչև ակումբի ղեկավարություն։ Երկար սպասված տիտղոս էր․ 13 տարի «Արարատին» չէր հաջողվել մրցանակակիր դառնալ։ Առանձնակի ուզում եմ շնորհակալություն հայտնել ֆուտբոլիստներին․ նախևառաջ սա նրանց քրտնաջան աշխատանքի արդյունքն է։ Երևի՝ ամենալավը ես գիտեմ, թե ֆուտբոլիստները որքան են չարչարվել գավաթակիր դառնալու համար։ Եվս մեկ անգամ շնորհակալություն եմ հայտնում ֆուտբոլիստներին անմնացորդ նվիրումի և իրենց կատարած ահռելի աշխատանքի համար։
Կարծում եմ՝ եթե երկար ժամանակ թիմին չի հաջողվում տիտղոս նվաճել, լարվածությունը տարեցտարի մեծանում է, բայց փառք ու պատիվ այս ֆուտբոլիստներին, որ կարողացան հավատալ սեփական ուժերին ու կարողացանք այս տարիների բացն այսօր լրացնել դաշտում։
Նաև ուզում եմ շնորհակալություն հայտնել մարզչական անձնակազմին՝ մեծ ծավալի աշխատանքի համար։ Շնորհակալություն բժշկական անձնակազմին, քանի որ այս վերջին հատվածում բավականին խիտ գրաֆիկով խաղալու դեպքում երևի՝ ամենակարևոր դերակատարը դառնում է բժշկական անձնակազմը․ նրանք ձեռքի տակ ունեցած ռեսուրսներով շատ քիչ ժամանակում փորձում են ամեն ինչ անել, որպեսզի ֆուտբոլիստներն արագ վերականգնվեն և պատրաստ լինեն»,- ասել է Վարդան Բիչախչյանը հետխաղային մամուլի ասուլիսի ժամանակ։
Խոսելով բուն խաղի մասին՝ Բիչախչյանն ընդգծել է, որ թիմը վատ հանդիպում չանցկացրեց ու երկրպագուներն էլ բավականին գեղեցիկ ֆուտբոլի ականատես եղան՝ երկու թիմի կողմից էլ․
«Բազում գոլային պահեր եղան։ Կարողացանք մեր պահերն օգտագործել, չնայած եղան պահեր, երբ վրիպեցինք նպաստավոր դիրքերից։ Ամեն դեպքում «Արարատն» այսօր գավաթակիր է, ինչի համար ևս մեկ անգամ շնորհավորում եմ «Արարատ» ակումբին»,- ասել է Վարդան Բիչախչյանը։
Երևանի «Արարատը» շարունակում է պայքարը նաև չեմպիոնական մրցավազքում։ Թիմը անցկացրած 20 խաղից հետո 36 միավոր ունի իր ակտիվում ու Հայաստանի առաջնության մրցաշարային աղյուսակի չորրորդ հորիզոնականն է զբաղեցնում՝ առաջատար «Նոային» զիջելով 5 միավորով։ «Արարատը» երկու խաղ պակաս է անցկացրել «Նոայից» ու Վարդան Բիչախչյանի խոսքով՝ ամեն ինչ իրենց ձեռքերում է․
«Շատ էմոցիաներ ծախսեցինք ու երևի՝ մեր ամենաբարդ գործն է լինելու կարողանալ շատ արագ թիմին ոչ միայն ֆիզիկապես, այլև հոգեպես պատրաստել առաջնության մնացած հատվածին։ Այո, Գավաթը նվաճելով կարողացանք ապահովել մեր մինիմումն ու եվրագավաթային ուղեգիր նվաճել, այդ առումով կարող ենք հանգիստ լինել, բայց առաջնության չեմպիոնությունը կախված է մեզնից՝ նայելով աղյուսակին։ Եթե հաղթենք մեր մնացած 4 խաղերում, կկարողանանք նաև Հայաստանի չեմպիոնությունը նվաճել։ Պարտավոր ենք գնալ մինչև վերջ՝ ինչքան էլ, որ դժվար լինի։ Ամսի 19-ից սկսած մեզ սպասվում է բավականին խիտ գրաֆիկով չորս հանդիպում։ Որքան էլ՝ դժվար լինի, փորձելու ենք պայքարել չեմպիոնության համար»,- եզրափակել է իր խոսքը Վարդան Բիչախչյանը։
Մայիսի 19-ին «Արարատն» Ավանի ֆուտբոլի ակադեմիայի մարզադաշտում հյուրընկալվելու է «Արարատ-Արմենիայի» կողմից, մայիսի 22-ին 15-րդ տուրից հետաձգված խաղում հյուրընկալվելու է «Ուրարտուի» կողմից, մայիսի 25-ին 3-րդ տուրից հետաձգված խաղում Վ․ Սարգսյանի անվան «Հանրապետական» մարզադաշտում մրցելու է «Ալաշկերտի» հետ, իսկ մայիսի 28-ին տուրի վերջին խաղում Երևանում հյուրընկալելու է «Շիրակին»։
