VBet Հայաստանի Պրեմիեր-լիգան մոտենում է եզրագծին․ այսօր՝ մայիսի 10-ին, կմեկնարկի վերջին երեք տուրերից առաջինը, որը խոստանում է շատ հետաքրքիր լինել։
Գավաթի եզրափակչից առաջ՝ վերջին դիմակայությունն առաջնությունում
Տուրի կենտրոնական խաղում «Արարատը» այսօր Ժամը 19:00-ին Վազգեն Սարգսյանի անվան «Հանրապետական» մարզադաշտում կմրցի «Ալաշկերտի» հետ։ Մինչև ամսվա վերջ այս թիմերն ընդհանուր առմամբ երեք հանդիպում կանցկացնեն միմյանց հետ՝ 6 միավորի արժեք ունեցող։ Բացի այսօրվա խաղից, Աբրահամ Խաշմանյանի և Վարդան Բիչախչյանի սաները կհանդիպեն նաև մայիսի 15-ին՝ Հայաստանի Գավաթի խաղարկության եզրափակչում, ինչպես նաև մայիսի 25-ին՝ առաջնության հետաձգված հանդիպման շրջանակում։
Թե՛ «Արարատը», թե՛ «Ալաշկերտը» պայքարում են երկու ճակատով՝ Հայաստանի Գավաթի և չեմպիոնության համար, ու ներդնելու են վերջին ուժերը՝ հաջողության հասնելու համար։
Օրեր առաջ «Ալաշկերտը» հոբելյանական 100-րդ հաղթանակը տարավ առաջնությունում, ու առհասարակ բավականին վստահ քայլերով առաջ է շարժվում՝ թե՛ ֆիզիկապես, թե՛ հոգեբանական առումով լինելով շատ լավ վիճակում։ «Արարատը» վերջին երկու խաղում կարևոր միավորներ կորցրեց՝ նախ պարտվելով «Արարատ-Արմենիային», ապա ոչ-ոքի խաղալով «Վանի» հետ, բայց Վարդան Բիչախչյանի թիմը դեռ չեմպիոնական մրցավազքում է, ավելին, եթե այսօր հաղթանակ տանի, կգլխավորի աղյուսակը։
Ի դեպ, «Ալաշկերտն» այս խաղն անցկացնելու է առանց գլխավոր մարզիչ Աբրահամ Խաշմանյանի և մարզիչ Կարեն Բարսեղյանին, ովքեր որակազրկված են։ Հանդիպումը բաց կթողնի նաև «Ալաշկերտի» առաջատարներից մեկը՝ Ալեքսանդր Գլիշիչը։
«Ալաշկերտը» 19 խաղից հետո 36 միավորով մրցաշարային աղյուսակի առաջին հորիզոնականն է զբաղեցնում, իսկ «Արարատը» նույնքան խաղից հետո 35 միավորով երրորդն է։
Գավաթի խաղարկությունից դուրս մնալուց հետո «Նոան» իր ողջ ուշադրությունն ու ուժերը կկենտրոնացնի առաջնությանը՝ փորձելով չլքել եվրագավաթային գոտին և ինչու ոչ՝ պայքարել նաև չեմպիոնության համար, ինչը թերևս այնքան էլ հեշտ չի լինի։
«Արարատ-Արմենիայի» հետ նախորդ տուրում գրանցված գոլազուրկ ոչ-ոքիի արդյունքում «Նոան», որը մեկ խաղ ավելի է անցկացնել իր մոտակա հետապնդողների նկատմամբ, կարևոր միավորներ կորցրեց ու այլևս սայթաքելու իրավունք չունի։ Այս տուրում Դմիտրի Գունկոյի սաները վաղը՝ մայիսի 11-ին, Ավանի ֆուտբոլի ակադեմիայի մարզադաշտում կընդունեն Գյումրիի «Շիրակին»։ Գյումրիի թիմը հեշտ մրցակիցներից չէ՝ չնայած եզրափակում է ՀՊԼ-ի մրցաշարային աղյուսակը, այդուհանդերձ, «Նոայի» համար մրցաշարային աղյուսակի տեսանկյունից անչափ կարևոր է հենց երեք միավորով խաղադաշտից հեռանալը։
«Նոա»- «Շիրակ» հանդիպման մեկնարկը 16։00-ին է։
Տուրի մյուս խաղում «Ուրարտուն» մրցելու է «Վանի» հետ։ Մրցաշարային աղյուսակում միմյանց հարևանների միջև խաղը կայանալու է Երևանում։ Տանտերերը՝ Տիգրան Եսայանի գլխավորությամբ, վերջին շրջանում այնքան էլ աչքի չեն ընկնում կայունությամբ, այդուհանդերձ՝ նախորդ տուրում «Շիրակի» հետ Գյումրիում գրանցած ոչ-ոքիից հետո փորձելու են բարելավել դիրքերն ու անպայման հաղթանակ տանել առաջիկա խաղում։ Չարենցավանի թիմը, սակայն, հեշտ հանձնվողներից չէ ու վստահաբար՝ պայքարելու է մինչև վերջ։
«Ուրարտու»-«Վան» հանդիպման մեկնարկը 19։00-ին է։
23-րդ տուրի վերջին խաղը կկայանա Վ․ Սարգսյանի անվան «Հանրապետական» մարզադաշտում, որտեղ վաղը՝ մայիսի 11-ին, ժամը 19։30-ին «Արարատ-Արմենիան» կհյուրընկալվի «Փյունիկի» կողմից։
«Արարատ-Արմենիան» այս պահին ՀՊԼ-ի մրցաշարային աղյուսակի 4-րդ հորիզոնականն է զբաղեցնում՝ երկու միավորով զիջելով երրորդ տեղում գտնվող «Արարատին», 3 միավորով էլ՝ առաջատար «Ալաշկերտին»։ 68-ամյա ռուս մասնագետ Անատոլի Բայդաչնիի գլխավորությամբ «Արարատ-Արմենիան», որը շարունակում է պայքարը մրցանակային տեղերի համար, միավորներ կորցնելու իրավունք չունի և վստահաբար ամեն ինչ անելու է՝ «Փյունիկի» հետ խաղում առավելության հասնելու համար։
23-րդ տուրից առաջ ՀՊԼ-ի մրցաշարային աղյուսակն այս տեսքն ունի՝
| N | Թիմեր | Խ | Հ | Ո | Պ | ԽԳ | ԲԳ | Մ |
|---|---|---|---|---|---|---|---|---|
| 1. |  Ալաշկերտ |
19 | 10 | 6 | 3 | 20 | 11 | 36 |
| 2. |  Նոա |
20 | 10 | 5 | 5 | 30 | 17 | 35 |
| 3. |  Արարատ |
19 | 10 | 5 | 4 | 28 | 12 | 35 |
| 4. |  Արարատ-Արմենիա |
19 | 9 | 6 | 4 | 28 | 12 | 33 |
| 5. |  ՈՒրարտու |
19 | 8 | 5 | 6 | 21 | 16 | 29 |
| 6. |  Վան |
21 | 7 | 4 | 10 | 19 | 26 | 25 |
| 7. |  Լոռի ՖԱ |
24 | 7 | 2 | 15 | 16 | 44 | 23 |
| 8. |  Փյունիկ |
20 | 5 | 6 | 9 | 15 | 15 | 21 |
| 9. |  Շիրակ |
21 | 2 | 7 | 12 | 16 | 40 | 13 |
