Հայաստանի ազատ ոճի ըմբշամարտի հավաքականի անդամ Արսեն Հարությունյանի համար 2019 թվականը հաջող մեկնարկեց. ապրիլին 19-ամյա ըմբիշը մեծահասակների իր առաջին մրցաշարում՝ Բուխարեստում կայացած Եվրոպայի առաջնությունում ոսկե մեդալ նվաճեց ու Եվրոպայի չեմպիոն հռչակվեց:
ArmSport-ի հետ զրույցում Արսեն Հարությունյանն ամփոփել է տարին, խոսել Տարվա 10 լավագույն մարզիկների ցանկում ընդգրկվելու և 2020-ից ունեցած սպասելիքների մասին.
«2019 թվականը միշտ կմնա իմ հուշերի մեջ. միշտ կհիշեմ, որ 19 տարեկանում դարձել եմ Եվրոպայի չեմպիոն: Դա տարվա կարևորագույն իրադարձությունն էր ինձ համար»,- ասում է Արսեն Հարությունյանը:
Երիտասարդ ըմբիշը, ով ԵԱ-ի եզրափակիչ գոտեմարտում 0:8 հաշվով պարտվելուց հետո կարողացել է հավաքվել ու 17։11 հաշվով հաղթել Եվրոպայի ու աշխարհի առաջնությունների փոխչեմպիոն, Եվրոպական խաղերի արծաթե մեդալակիր վրացի Բեկա Լոմտաձեին, ասում է՝ միայն հաղթանակի համար էր դուրս եկել գորգ.
«Հիշողությունները շատ են, որովհետև բոլոր գոտեմարտերս հավասար պայքարում եմ կարողացել հաղթել ու շատ տաղանդավոր տղաների. եթե նպատակ ունես ու ցանկանում ես հասնել դրան, ճանապարհը շատ դժվար է, պետք է պարապել, լսել մարզիչներին ու ամեն մրցաշարից հետո աշխատել սխալների վրա: Ես բարձրացել էի գորգ հաղթելու, ինձ համար նշանակություն չուներ, թե քանի 0 եմ պարտվում: Հավաքվեցի և գոտեմարտս ճիշտ պլանավորելով՝ կարողացա հաղթել»,- ասում է Արսեն Հարությունյանն ու նշում, որ հաղթանակից հետո չէր գիտակցում, թե շուրջն ինչ է կատարվում.
«Հաղթանակից հետո չէի հասկանում, թե շուրջս ինչ էր կատարվում: Չէի հավատում, որ չեմպիոն եմ դարձել: Մարզիչներս ու ընկերներս ինձ հետ հավասար ուրախանում էին: Օդանավակայանում հասկացա, որ իսկապես չեմպիոն եմ դարձել: Ընկերներս, բարեկամներս ու մեր ազգն ինձ շատ լավ դիմավորեցին»:
Արսեն Հարությունյանն, այդուհանդերձ, նշում է՝ դեռ չի իրագործել իր բոլոր նպատակները.
«Եթե աշխարհի չեմպիոն էլ դարձած լինեի, կասեի, որ իրագործել եմ: Ամեն դեպքում, շատ ուրախ եմ, որ 20 տարեկանում կարողացել եմ դառնալ Հայաստանի 10 լավագույն մարզիկներից մեկը: Շարունակելու եմ քրտնաջան մարզումներս:
Հիմա պատրաստվում եմ Եվրոպայի մեծահասակների առաջնությանը, հետո օլիմպիական ուղեգրի մրցմանը»:
Արսեն Հարությունյանն Ամանորը նախատեսում է դիմավորել ընտանիքի անդամների հետ, իսկ 2020-ի հետ կապված ցանկությունները շատ են.
«Ցանկանում եմ, որ 2020 թվականը լինի երջանկության ու հաջողության տարի: Սահմանին այլևս չլինեն կրակոցներ , մեր զինվորներն անփորձանք ծառայեն ու վերադառնան տուն:
2020 թվականն օլիմպիական տարի է: Բոլոր մարզիկներին հաջողություն եմ մաղթում»:
Նարե Հովհաննիսյան
