Տարվա 10 լավագույն մարզիկներ. ArmSport-ի ընտրած մարզիկների նվաճումները

ՀՀ կրթության, գիտության, մշակույթի և սպորտի նախարարությունն անցկացնում է ՀՀ «Տարվա 10 լավագույն մարզիկներ» 2019  մրցույթը, որին մասնակցել է նաև ArmSport-ը:

Ներկայացնում ենք մեր կողմից տասնյակում ընդգրկված մարզիկներին և նրանց նվաճումներն անցնող տարում.

Արթուր Ալեքսանյան Սիմոն Մարտիրոսյան Գոռ Մինասյան Հակոբ Մկրտչյան Արթուր Դավթյան Կարապետ Չալյան Հովհաննես Բաչկով Ռուբեն Ալեքսանյան Հենրիխ Մխիթարյան Արթուր Ավետիսյան:

Սիմոն Մարտիրոսյանի ոսկյա և ռեկորդներով լի տարին

22-ամյա անվանի ծանրորդը փայլեց նաև 2019 թվականին: Տարվա սկզբին նա նախ Բաթումիում անցկացված Եվրոպայի առաջնությունում չեմպիոն հռչակվեց՝ երկամարտի 427 (192+235) կգ արդյունքով: Սիմոն Մարտիրոսյանը փոքր ոսկե մեդալներ նվաճեց նաև պոկում ու հրում վարժություններում:

Սեպտեմբերին արդեն Թայլանդի Պատտայա քաղաքում անցկացված աշխարհի առաջնությունում 109կգ քաշային Սիմոն Մարտիրոսյանը դարձյալ հավասարը չունեցավ. նա երկամարտի արդյունքներով նվաճեց ոսկե մեդալը և հռչակվեց աշխարհի կրկնակի չեմպիոն:

Մեր մարզիկը անթերի գործեց պոկում վարժությունում և բարձրացրեց բոլոր երեք մոտեցումները. նախ 190 կգ, ապա 195կգ և ամենավերջում բարձրացնելով 199 կգ ծանրաձողը՝ Սիմոնը սահմանեց աշխարհի ռեկորդ և նվաճեց փոքր ոսկե մեդալ:

Հրում վարժությունում նույնպես Հայաստանի ներկայացուցիչը նախնական պատվիրել էր ամենածանր քաշը՝ 230 կգ: Բոլոր ծանրորդները ավարտեցին իրենց մրցելույթները, նոր միայն Սիմոնը սկսեց իր առաջին մոտեցումը՝ հաջողությամբ բարձրացնելով 230 կգ-ը և ունենալով երկու մոտեցում՝ հռչակվեց աշխարհի չեմպիոն:

Սիմոն Մարտիրոսյանը տարին ավարտեց Եվրոպայի մինչև 23 տարեկանների առաջնությունում նվաճած ոսկե մեդալներով և փայլուն ռեկորդով:

Հակոբ Մկրտչյանն ու աշխարհի և Եվրոպայի չեմպիոնությունները

22-ամյա Հակոբ Մկրտչյանի համար 2019 թվականը լավագույնն էր մեծահասակների պայքարում: Գյումրեցի ծանրորդը նախ հռչակվեց Եվրոպայի չեմպիոն՝ 89 կգ քաշայինների պայքարում 371 կգ երկամարտի արդյունքով (ռեկորդ), իսկ սեպտեմբերին արդեն աշխարհի առաջնությունում Մկրտչյանը երկամարտի 375 կգ արդյունքով նվաճեց ոսկե մեդալը։

Նա նաև փոքր արծաթ նվաճեց հրում վարժությունում՝ 204 և 208 կգ ծանրաձողերը վստահ պահելով գլխավերևում։ Պոկումում գյումրեցի ծանրորդը 167 կգ արդյունքով 4-րդ տեղն էր զբաղեցրել։

Մկրտչյանն աշխարհի ու Եվրոպայի գործող չեմպիոնի կարգավիճակով մեկնեց Բուխարեստ, որտեղ մասնակցեց Մ23 տարեկանների ԱԱ-ին: Այստեղ ևս գյումրեցի ծանրորդը հավասարը չունեցավ. նա երկամարտի 375 կգ (165+210) արդյունքով դարձավ ոսկե մեդալակիր:

Մկրտչյանը տարեվերջին փոխեց քաշն ու այսուհետ հանդես կգա օլիմպիական՝ 96 կգ քաշում: Այս քաշային կարգում առաջին ստուգատեսը Քաթարի վարկանիշային աշխարհի Գավաթն էր, որտեղ, սակայն, մեր ծանրորդը բավարարվեց 7-րդ տեղով:

Գոռ Մինասյանն ու ոսկու արժեք ունեցող արծաթը

Օլիմպիական խաղերի արծաթե մեդալակիր Գոռ Մինասյանը 2019 թվականին նվաճեց աշխարհի փոխչեմպիոնի կոչումը՝ զիջելով միայն Վրաստանի ներկայացուցիչ, անպարտելի Լաշա Տալախաձեին:

Գոռ Մինասյանը պոկում վարժությունում ցույց տալով 212 կգ արդյունք՝ արժանացավ փոքր արծաթի, հրում վարժությունում գլխավերևում պահեց 248 կիլոգրամը (կրկին 2-րդ ցուցանիշ) և երկամարտի 460 կգ արդյունքում դարձավ աշխարհի առաջնության արծաթե մեդալակիր:

Ի դեպ, ԱԱ-ի արծաթե մեդալը Մինասյանը նվաճեց՝ վերականգնվելով ոտնաթաթի վնասվածքից, որի պատճառով գարնանը Բաթումիում կայացած Եվրոպայի առաջնությունում բավարարվել էր փոքր բրոնզե մեդալով՝  պոկում վարժությունում բարձրացնելով 200 կգ: Նա երկամարտում 5-րդն էր՝ 422 կգ:

Մինասյանը ԵԱ-ից հետո նշեց, որ իր խոսքը դեռ կասի աշխարհի առաջնությունում: Գոռն արեց առավելագույնը:

Գոռ Մինասյանը տարին ավարտեց Քաթարի Աշխարհի Գավաթում փայլուն ելույթով: Տոկիո-2020-ի Օլիմպիական խաղերի համար վարկանիշային Qatar International Cup-ում Մինասյանը +109 կգ քաշային կարգում ոսկե մեդալ նվաճեց:

Ռուբեն Ալեքսանյանն ու առաջին մեդալը մեծահասակների առաջնությունում

Գերծանր քաշային ծանրորդ Ռուբեն Ալեքսանյանի համար անցնող տարին բավականին հաջող և մեդալներով լի ստացվեց, որոնցից ամենանշանավորը, թերևս, մեծահասակների առաջնությունում Ալեքսանյանի նվաճած առաջին մեդալն էր. Ռուբենն աշխարհի 2019 թվականի առաջնությունում արժանացավ բրոնզե մեդալի` զիջելով միայն Գոռ Մինասյանին և Լաշա Տալախաձեին:

Իսկ մինչ այդ՝ Եվրոպայի 2019 թվականի առաջնությունում, տևական դադարից հետո Ալեքսանյանը  +109 կգ քաշային կարգում նվաճեց երկամարտի բրոնզե մեդալը՝ հավաքելով 440 կգ՝ 195+145։  Հրում վարժությունում Ալեքսանյանը նվաճեց նաև փոքր արծաթե մեդալ։

Ռուբեն Ալեքսանյանը ևս տարին ավարտեց Qatar International Cup-ում իր ելույթով: Տոկիո-2020-ի Օլիմպիական խաղերի համար վարկանիշային այս մրցաշարում Ալեքսանյանն արծաթե մեդալակիր դարձավ:

Արթուր Ալեքսանյանի Տոկիո-2020-ի ուղեգիրն՝ անգամ վնասվածքով

Աշխարհի եռակի, Եվրոպայի քառակի ու Օլիմպիական խաղերի չեմպիոն, ըմբիշ Արթուր Ալեքսանյանի համար տարին հակասական ստացվեց:

Ալեքսանյանը Եվրոպական խաղերում նվաճեց չեմպիոնի տիտղոսը, ինչից հետո՝ լավ տրամադրությամբ և լավ մարզավիճակում, մասնակցեց Նուր-Սուլթանում կայացած աշխարհի առաջնությանը: Այստեղ, սակայն, մեր ըմբիշը կողի ցավալի վնասվածք ստացավ , ու, հասնելով մինչև եզրափակիչ, հրաժարվեց գոտեմարտել ոսկու համար: Մեր ըմբիշն արժանացավ արծաթե մեդալի ու Տոլիո-2020-ի ուղեգիր նվաճեց:

Ալեքսանյանն այս տարի նաև դարձավ ՅՈՒՆԻՍԵՖ-ի բարի կամքի դեսպան:

Կարապետ Չալյանի ստացված տարին և օլիմպիական բաղձալի ուղեգիրը

Հունահռոմեական ոճի ըմբիշ, 77 կգ քաշային կարգում հանդես եկող Կարապետ Չալյանը 2019 թվականին հաղթեց մրցակցությունն Արսեն Ջուլֆալակյանի հետ ու հնարավորություն ստացավ հանդես գալու նախ Եվրոպական խաղերում, ապա նաև աշխարհի առաջնությունում:

Մինսկում կայացած Եվրոպական խաղերում գյումրեցի ըմբիշը հասավ մինչև եզրափակիչ, որտեղ գոտեմարտեց աշխարհի չեմպիոն, Ռուսաստանի ներկայացուցիչ Ալեքսանդր Չեխիրկինի հետ: Գերլարված պայքարում, վիճելի մրցավարության հետևանքով հայ ըմբիշը պարտվեց 6։7 հաշվով՝ դառնալով արծաթե մեդալակիր։

ԱԱ-ում արդեն Չալյանը կարող էր բրոնզե մեդալակիր դառնալ, սակայն 6:9 հաշվով պարտվեց իրանցի Մոհամադալի Գեռաեին:

Հայ ըմբիշը բավականին հաջող էր մեկնարկել Նուր-Սուլթանում կայացած ԱԱ-ում. երեք անընդմեջ հաղթանակներից հետո հայ ըմբիշը հասել էր կիսաեզրափակիչ, որտեղ շվեդ Ալեքս Բյուբերգ Կասիդիսին զիջել էր վրիպման պատճառով:

Չնայած բրոնզե մեդալի համար պայքարում կրած պարտությանը, Չալյանն այս քաշային կարգում կարողացավ օլիմպիական ուղեգիր ապահովել Հայաստանի հավաքականի համար:

Արթուր Ավետիսյան. սպորտային մարմնամարզության հուսալի ապագան

Սպորտային մարմնամարզության Հայաստանի հավաքականի անդամ, 22-ամյա Արթուր Ավետիսյանի համար 2019 թվականը շաը հաջող ստացվեց: Մեր երիտասարդ մարզիկը, որն արդարացիորեն համարվում է իր ավագ սերնդի արժանի փոխարինողը, գերազանցեց բոլորի սպասելիքներն ու ապացուցեց՝ հայկական մարմնամարզության ապագան գտնվում է հուսալի ձեռքերում:

Արթուր Ավետիսյանը նախ իտալական Նեապոլ քաղաքում անցկացված 30-րդ ամառային Ուսանողական խաղերում նվաճեց չեմպիոնի կոչումը, այնուհետև չինական Ուհանում կայացած Համաշխարհային բանակային խաղերում արժանացավ բրոնզե մեդալի, իսկ տարեվերջին Գերմանիայի Կոտբուս քաղաքում տեղի ունեցած աշխարհի գավաթի խաղարկությունում գրավեց պատվավոր երրորդ տեղը:

Արթուր Դավթյանի տպավորիչ տարին և Տոկիո-2020-ի անհատական ուղեգիրը

Մարմնամարզիկ Արթուր Դավթյանն աննախադեպ արդյունքներ գրանցեց 2019 թվականին: Նա նախ հռչակվեց Եվրոպական խաղերի չեմպիոն՝ ոսկե մեդալ նվաճելով հենացատկ վարժությունում։

Իսկ հոկտեմբերին Շտուտգարտում  կայացած մարմնամարզության աշխարհի առաջնությունում Հայաստանի հավաքականի անդամը կարողացավ 2020 թվականի ամառային օլիմպիական խաղերի անհատական ուղեգիր նվաճել բազմամարտում: Այսպիսով, Արթուր Դավթյանը կմասնակցի իր երրորդ օլիմպիական խաղերին:

Մեդալային տարին հայ մարզիկը եզրափակեց Վորոնինի գավաթի 26-րդ խաղարկության բազմամարտի մրցաշարում՝ դառնալով ոսկե մեդալակիր:

Հենրիխ Մխիթարյան. հայկական ֆուտբոլի դեսպանն արդեն Իտալիայում

Ֆուտբոլի Հայաստանի հավաքականի առաջատար Հենրիխ Մխիթարյանի համար ևս տարին հակասական էր: Մեր ընտրանու առաջատարը «Արսենալի» հետ հասավ մինչև Եվրոպա լիգայի եզրափակիչ, սակայն քաղաքական դրդապատճառներով չկարողացավ մասնակցել Բաքվում կայացած եզրափակչին: Արդյունքում «Արսենալը», հետևաբար նաև Մխիթարյանը, ԵԱ-ի արծաթե մեդալներին արժանացավ:

Շաբաթներ շարունակ Մխիթարյանի՝ Բաքվում կարևոր հանդիպման մասնակցել չկարողանալը քննարկվեց և քննադատվեց միջազգային հանրության և առաջատար ԶԼՄ-ների կողմից: Հարց բարձրացվեց անգամ եզրափակիչը Բաքվից տեղափոխելու տարբերակը:

2019-ի ընթացքում հայ ֆուտբոլիստն իր առաջատարի որակները դրսևորեց նաև Հայաստանի ազգային հավաքականում և աչքի ընկավ տպավորիչ խաղով: Մխիթարյանն իր խաղով արժանացավ իտալական «Ռոմայի» ուշադրությանը, որը սեպտեմբերի սկզբին հայտարարեց հայ ֆուտբոլիստին վարձակալելու մասին:

«Ռոմայում» հաջող ելույթներն ընդհատվեցին ցավալի վնասվածքի պատճառով, ինչի արդյունքում Մխիթարյանը 2 ամիս բաց թողեց: Վերադարձն Ա Սերիա նա նշեց գոլով ու խոստովանեց, որ շատ էր կարոտել ֆուտբոլը:

Հովհաննես Բաչկով. Եվրոպայի կրկնակի չեմպիոնությունն ու ԱԱ-ի վիճելի բրոնզը

Հովհաննես Բաչկովը բռնցքամարտի սիրահարներին մշտապես ուրախացնում է իր մեդալներով. 2019-ը ևս բացառություն չէր: Գյումրեցի մարզիկը, որը Եվրոպական երկրորդ խաղերում Հայաստանի պատվիրակության դրոշակակիրն էր, չեմպիոն հռչակվեց:

3 հաղթանակներից հետո Բաչկովը դուրս եկավ եզրափակիչ, որտեղ 3:2 հաշվով առավելության հաավ Ֆրանսիայի ներկայացուցիչ Սոֆիան Ումիանի նկատմամբ:

Եվրոպական խաղերի ծրագրում ընդգրկված բռնցքամարտը նաև Եվրոպայի առաջնություն է, այնպես որ՝ Հովհաննես Բաչկովը դարձավ նաև Եվրոպայի չեմպիոն։

Սեպտեմբերին Բաչկովը Եկատերինբուրգում մասնակցեց աշխարհի առաջնությանն ու Հայաստանի հավաքականի միակ մեդալը նվաճեց:

Եվրոպայի կրկնակի չեմպիոնը քառորդ եզրափակչում հաղթեց Դոմինիկյան Հանրապետությունը ներկայացնող Դե Լոս Սանթոսին,իսկ եզրափակչի ուղեգիրը վիճարկեց ամերիկացի Դևիս Քեյշոունի հետ,սակայն պարտվեց 1:4 հաշվով` բավարարվելով բրոնզե մեդալով:

Բաչկովի մենամարտը մի շարք կասկածների տեղիք տվեց, արդյունքում մարզիչները բողոքարկեցին դրա արդյունքը, բայց պարզվեց, որ մրցավարական անձնակազմը հրաժարվել էր անգամ վերանայել Բաչկովի կիսաեզրափակիչ մենամարտը:

ՀԳ. ArmSport-ը լավագույնի իր տասնյակը կազմել է երկար քննարկումների արդյունքում: Մենք արժևորում և գնահատում ենք նաև մեր մյուս մարզիկների ավանդն ու տարվա ընթացքում գրանցած նվաճումները, և 2020-ին՝ Օլիմպիական կարևոր տարում, շարունակելու ենք հետևել հայկական սպորտային կյանքին ու լավագույնս լուսաբանել այն: