Արդեն հայտնել ենք, որ Հայաստանի ֆուտբոլի ֆեդերացիայում մեկնարկել է ՀՖՖ 20-րդ տարեկան ժողովը, որը մեկնարկեց լարված մթնոլորտում:
Ժողովի ընթացքում «Լոկոմոտիվ», «Տորպեդո» և «Արագած» ֆուտբոլային ակումբներին ՀՖՖ անդամակցությունից զրկելու մասին խոսեց նաև «Լոռի ՖԱ» սեփականատեր, նախորդ տարի կայացած ՀՖՖ նախագահի ընտրություններում թեկնածությունը դրած Թովմաս Գրիգորյանը:
«Հարգելի ֆուտբոլային ընտանիքի անդամներ: Այսօր «Մարիո» խաղի նման հայտնվեցինք այս դահլիճում՝ արգելքներ հաղթահարելով, նույնը շարունակվում է այժմ: Պայմանավորված խաղերի հետ կապված դուրս են գալիս այն մարդիկ, ովքեր չեն աջակցել Մելիքբեկյանին:
Ես մասնավոր զրույցներում թե հանդիպումների ժամանակ ասել եմ իմ մտահոգությունը: Ես ասել եմ, որ կա 5-6 կազմակերպություն, Մելիքբեկյանն ասել է մինչև սեպտեմբեր քննությունը կավարտվի և բոլորին կներակայացնեք: Այժմ ես կոչ եմ անում, որ չհանենք այս երեք կազմակերպությունների անդամակցությունը, քանի որ ընտրովի մթնոլորտ է նրանց համար: Ամեն ինչ ընտրովի է կատարվում: Մենք մեր ֆուտբոլը զարգացնելու և պահելու համար պետք է մոտենանք այդ հարցերին ոչ թե ընտրովի, այլ ի շահ: Կոչ եմ անում բոլորին, որ չքվեարկեն, ու այդ երեք կազմակերոպւթյուններն էլ մնան, և եթե ապացուցվի, նոր այդ ակումբների անդամակցությունը հեռացվի: Այնպես որ, խնդրում եմ չգնանք ընտրովի և Մելիքբեկյանին հաճո ճանապարհով, որը ֆուտբոլի կործանումն է»,-ասաց Թովմաս Գրիգորյանը:
ՀՖՖ նախագահը տեղից արձագանքեց՝ նշելով, որ իր ձեռքին կա «Սևան» ՖԱ-ի պայմանավորված խաղերի մի ամբողջ փաթեթ: Եթե այդպես է՝ ինչու ինքը չի հանում «Սևան» ՖԱ-ին ՀՖՖ անդամակցությունից: Մելիքբեկյանը նշեց, որ ինքը չունի այդպիսի իրավասություն, քանի որ դրանք դեռ ապացուցված չեն:
«Մեր հայտնի ընտրություններն այնպես ստացվեցին, որ 7 կազմակերպություններ, որոնք ինձ էին աջակցում, հանեցիք բոլորին, որոնցից ձայն չունեիք: Նորից այստեղ 3 կազմակերպություն չկա: Ձեր մոտ բոլորը ի շահ ձեզ է և պատահականություններով: Ո՞նց է ստացվում, որ ձեզ ով ձայն չի տալու՝ դրանք են դառնում ղումարբազ, իսկ ով ձեզ է ձայն տալիս՝ ուրեմն դեռ քննությունը շարունակվում է»,-ասաց Գրիգորյանը:
