ՀՖՖ-ն այսօր՝ հուլիսի 30-ին, հայտարարեց, որ «Վան» ՖԱ-ն այսուհետ հանդես կգա Հայաստանի Բարձրագույն խմբի առաջնությունում:
ԲԽ-ում հանդես գալու թույլտվություն ստանալու, ապագա ծրագրերի և թիմում մարզչական փոփոխության վերաբերյալ ArmSport-ը զրուցել է «Վանի» գլխավոր մարզիչ Կարեն Բարսեղյանի հետ:
-Պարո՛ն Բարսեղյան, այսօր որոշում է կայացվել այն մասին, որ «Վանը» մյուս մրցաշրջանից հանդես կգա Բարձրագույն խմբի առաջնությունում: Ինչպիսի՞ն են ձեր տպավորությունները:
-Կարծում եմ՝ մեր անցած ճանապարհը թույլ տվեց, որ մեզ արժանի զգանք այս ամենին, ու այդ առումով՝ շատ ուրախ ու երջանիկ ենք, քանի որ ԲԽ-ի ուղեգիր ենք նվաճել: Հենց այդ խնդիրն էր մեր առջև դրված: Հուսով եմ՝ սա միայն սկիզբն է այն ամենի, այն ծրագրերի, որը մենք նախատեսել ենք ու փորձելու ենք իրականացնել:
-Արդեն մոտ 2 շաբաթից կմեկնարկի նոր առաջնությունը: Ինչպե՞ս եք պատրաստվելու դրան:
-Այսօր ուզում ենք այդ աժիոտաժից մի քիչ հանգստանալ, բայց վաղը մեր պաշտոնական էջի միջոցով, անպայման, հայտարարություններ կանենք, ու դրանով ամեն ինչ ասված կլինի, Ձեզ համար ամեն ինչ պարզ կլինի:
-Իսկ թիմը մինչ այդ հավաք կանցկացնի՞:
-Մենք մեր բազայում հավաք ենք անցկացնում: Առաջնության ավարտից մոտ մեկ շաբաթ հետո վերսկսել ենք մարզումները: Ունեցել ենք երկու մինի-հավաք: Անցկացրել ենք ընկերական խաղեր՝ «Գանձասար-Կապանի», «Ուրարտուի» ու «Ալաշկերտի» հետ: Օգոստոսի 1-ին մեր մրցակիցը կլինի «Վեստ Արմենիան», ամսի 6-ին կմրցենք «Փյունիկի» հետ, ու կարծում եմ, այդքանով մեր նախապատրաստական փուլը կավարտվի և կսկսենք պատրաստվել առաջնության մեկնարկային խաղին:
-Բարձրագույն խմբում մրցակցությունը, նաև որակի առումով, տարբերվում է Առաջին խմբի առաջնությունից. ըստ Ձեզ՝ Ձեր թիմը որքանո՞վ է պատրաստ ԲԽ-ում խաղալուն:
– Մենք շատ լավ հասկանում ենք, որ տարբերությունը բավականին մեծ է ու մեզ լուրջ մրցաշրջան է սպասվում, կայունության մրցաշրջան է սպասվում: Բայց նաև գիտակցում ենք, որ, երևի թե, բացառությամբ «Լոռիի», ԲԽ-ի մյուս բոլոր թիմերի հետ խաղացել ենք: Իհարկե, դրանք ընկերական բնույթ են կրել, բայց մենք բավականին լավ տեսք ենք ունեցել: Իսկ հիմա փորձելու ենք թիմն ուժեղացնել, փորձելու ենք թիմում փոփոխություններ անել:
Առաջին հերթին, նշեմ, որ մենք ոչ մեկից չենք վախենում: Մենք ունենք մեր տեսլականը, որով էլ շարժվելու ենք առաջ: Ժամանակը ցույց կտա՝ ուր կհասնենք, ինչի կլինի: Մենք ոչ մի ամպագոռգոռ բաների մասին չենք խոսում, խոսում ենք կայունության, հաստատվելու ու ԲԽ-ին նոր բան հաղորդելու մասին: Բայց կարող եմ բոլորին վստահեցնել, որ մեզ հետ ոչ մեկի համար հեշտ չի լինելու:
-Այս ընթացքում նաև խոսակցություններ կային, որ «Վանի» մարզչական շտաբում փոփոխություններ են սպասվում: Մասնավորապես, մեզ հայտնի էր դարձել, որ թիմը գլխավորելու է Սևադա Արզումանյանը: Այդպիսի խոսակցություններ իսկապե՞ս եղել են ակումբում:
– Այդ մասին եկեք վաղը խոսենք: Ես ինքս վաղը հանդես կգամ պաշտոնական հայտարարությամբ ու այդ ամենի մասին կխոսեմ:
Ստելլա Բաբլոյան
