Ֆուտբոլային այս բարդ մրցաշրջանի ամենահամոզիչ հաղթանակը երեկ կայացավ առանց հաղթողի մասնակցության։ Անգլիական «Մանչեսթեր Սիթին» հյուրընկալվելիս 1:2 հաշվով պարտվեց «Չելսիին», որը զրկեց նրան ոչ միայն գործնական, այլեւ տեսական շանսերից՝ Անգլիայի առաջնության «ոսկե» մրցավազքում «Լիվերպուլին» հասնելու:
«Չելսիի» հաղթանակը ցնծություն պարգևեց երկրպագուներին ոչ միայն Լոնդոնում։ Մոտ 300 կմ դեպի հյուսիս՝ Լիվերպուլ քաղաքում, է՛լ ավելի ուժեղ ցնծություն էր․․․ տեղի համանուն թիմն առաջին անգամ հռչակվեց ԱՊԼ-ի չեմպիոն։ Այո, հենց ԱՊԼ-ի չեմպիոն, քանի որ Անգլիայի առաջնության անվանափոխությունից հետո սա առաջին չեմպիոնությունն էր մերսիսայդցիների համար, իսկ մինչ այդ նրանք արդեն իսկ դարձել էին Անգլիայի չեմպիոն 18 անգամ։ Սա 19-րդն էր՝ բաղաձալի, շատ սպասելի չեմպիոնությունը։
Համացանցում հայտնվել է «Լիվերպուլի» ֆուտբոլիստների արձագանքը «Չելսիի» կիսապաշտպան Վիլիանի գոլին Անգլիայի Պրեմիեր լիգայի 31-րդ տուրի «Մանչեսթեր Սիթիի» հետ խաղում։
Celebrations are go! 💪
— Football on BT Sport (@btsportfootball) June 25, 2020
The Liverpool squad go wild as Willian scores the penalty that secures their first league title in three decades. pic.twitter.com/FujgSX3ZhR
Մոտ երկու տարի առաջ «Բիթլզի» քաղաքը ներկայացնող ակումբը ևս առաջատարն էր ԱՊԼ մրցաշարային աղյուսակում։ Մի քանի միավորով առաջ լինելով մոտակա մրցակցից՝ Գվարդիոլայի «Սիթիից», մերսիսայդցիները ձեռքից բաց թողեցին չեմպիոնությունը՝ առաջնության վերջնամասում մեկ միավորով զիջելով «քաղաքաբնակներին»։ Սակայն այս անգամ լրիվ այլ պատմություն էր․․․
Յուրգեն Կլոպի թիմն այս մրցաշրջանի արդեն առաջին հատվածից հետո ուներ միավորների հսկայական առավելություն հիմնական հետապնդողների նկատմամբ։ Այս անգամ ոչ մեկ չէր կասկածում, որ չեմպիոն կդառնան հենց մերսիսայդցիները, չէին կասկածում, որովհետև Կլոպի սաները պարզապես ֆանտաստիկ մրցաշրջան էին անցկացնում։ Ճակատագրի հեգնանքով, «Լիվերպուլին» չեմպիոնություն պարգևեց «Չելսիի» հաղթանակը, շատ սիմվոլիկ կլիներ, որ նրանք այդ տիտղոսը նվաճեին «Սիթիի» հետ առաջիկա տուրում կայանալիք խաղում, բայց, կարծում եմ, թե՛ խաղացողների, թե՛ երկրպագուների համար դա արդեն այդքան էլ կարևոր չէ։
Անգլիայի ամենատիտղոսակիր ակումբը
«Լիվերպուլը», որը 19-րդ անգամ Անգլիայի չեմպիոն դարձավ, տիտղոսների քանակով երկրի ակումբների շարքում դուրս եկավ մաքուր առաջին հորիզոնական: Չեմպիոնական տիտղոսներից բացի, մերսիսայդցիներն իրենց ակտիվում ունեն Անգլիայի 7 գավաթ, 8 լիգայի գավաթ և 9 գավաթ եվրոպական մրցումներում (ընդհանուր՝ 43):
Յուրգեն Կլոպի գլխավորությամբ կարմիրներն արդեն հաղթել են 4 տարբեր մրցաշարերում․ Չեմպիոնների Լիգա, ՈւԵՖԱ-ի սուպերգավաթ, Աշխարհի ակումբային առաջնություն, իսկ այժմ նաև ԱՊԼ-ի չեմպիոնի տիտղոսը։
Հաջողության բաղադրատոմսը
Կլոպ, Կլոպ, Կլոպ․․․ Անընդհատ շեշտում ենք՝ Կլոպ․․․ Բայց չենք կարող չշեշտել հենց գերմանացի մասնագետի մեծ ներդրումը մերսիսայդցիների ներկայիս հաջողություններում։ Միանշանակ, ներկա պահին գերմանացի մասնագետը լավագույններից մեկն է աշխարհում։ Յուրգենի աշխատելաոճի մասին բազմաթիվ լեգենդներ են պտտվում, սակայն, առանձնացնենք երկու ուժեղ կողմերը․
✅ Կլոպը շատ լավ է աշխատում երիտասարդ կադրերի հետ
✅ Նա հիանալի մոտիվատոր է, հոգեբան
Երբ Մանեն, Սալահը, Ֆիրմինոն կամ Վան Դեյկը տեղափոխվեցին «Լիվերպուլ», նրանք այդ պահին համաշխարհային մեծության աստղեր չէին։ Իսկ ներկայումս նրանց կարելի է համարել առաջին մեծության աստղեր։ Կլոպի գլխավորությամբ աշխատում են բոլորը, գրեթե բոլորը մի դիրքի խաղացող չեն, այլ ունիվերսալ են։ Օրինակ, Ֆիրմինոն․ երբ նայում եք «Լիվերպուլի» խաղը մակերեսորեն, ապա բրազիլացին չի երևում, թվում է, թե նա խաղից դուրս է, սակայն, բավական է հետևել միայն նրան, նրա գործողություններին, ապա կտեսնեք, թե ինչ ահռելի աշխատանք է կատարում նա դաշտում։ Ունիվերսալություն․․․ դա է հաղթաթղթերից մեկը ներկայիս «Լիվերպուլի» համար։
Ինչ վերաբերվում է պաշտպանության եզրերին՝ Ալքսանդր-Առնոլդ և Էնդրյու Ռոբերտսոն․ երկու գերարդյունավետ եզրայիններ, թերևս լավագույնները իրենց դիրքերում ԱՊԼ-ում։ Տարվա կտրվածքով մեկ տասնյակից ավել գոլային փոխանցումներ յուրաքանչուրի հաշվին։ Իսկ հիշո՞ւմ եք Առնոլդի գոլային փոխանցումը «Բարսելոնայի» դեմ խաղում․․․ Ֆուտբոլային ինտելեկտ, սառնասրտություն, հուսալիություն․ այդ ամենն էր պակասում մերսիսայդցիների պաշտպանությունում վերջին տարիներին։
Կարելի՞ է այս կազմը համարել փորձառու․ այո՛։ Սակայն, եթե ուշադիր նայենք հիմնական կազմին, բացի Միլներից՝ վետերաններ թիմում, կարելի է ասել, չկան։ Ֆուտբոլիստների մեծամասնության համար դեռ նոր է սկսվում կարիերայի պիկը, իսկ ոմանք էլ, դեռ նվազագույնը մեկ տասնամյակ կուրախացնեն մեզ իրենց խաղով։
Ֆուտբոլիստների մոտ ձևավորվել է հաղթողի հոգեբանություն, նրանք ներկայումս ավելի վստահ են իրենց ուժերին, քան, օրինակ, երկու տարի առաջ էր։ Իսկ դա շատ կարևոր է, հավատացեք։ Նաև շատ կարևոր է այն, որ թիմում կոնֆլիկտային իրավիճակները գրեթե բացակայում են, Կլոպը կարողացել է հավաքել մի կոլեկտիվ, որն ընտանիքի պես է․․․
Կլոպի և Հենդերսոնի արձանգանքը
«Լիվերպուլի» գլխավոր մարզիչ Յուրգեն Կլոպը առաջին գերմանացի մարզիչն է, ով հաղթել է Անգլիայի Պրեմիեր լիգան։
«Դուք ավելի լավ կիմանաք, քան ես։ 30 տարի առաջ․․․30 տարի առաջ․․․Ես 23 տարեկան էի, այնպես որ, եթե անկեղծ, այնքան էլ չէի մտածում «Լիվերպուլի» հետ տիտղոս նվաճելու մասին։ Դրա համար հմտություն չունեի։ 30 տարի հետո ես այստեղ եմ ու շնորհիվ անհավանական մարզիչների, որ ես ունեմ, ունենք սա։ Անհավանական է։ Սա բոլորի համար է։ Սա Մայքի, Թոմի ու Ջոնի՝ Ամերիկայում գտնվող մեր սեփականատերերի համար է։ Չենք կարողանում կապ հաստատել իրար հետ, 20 բաց թողած զանգ ունեմ, հավանաբար, նրանք ևս զանգել են։ Սա բոլորի համար է։ Նրանք այնքան ուժ են դրել սրա մեջ, ու ես մի տղա եմ, ում բախտը բերեց։ Ես այս պահին զբաղեցնում եմ այս աթոռն ու․․․դառնում այս պատմության մի մասը․ գերազանց է ու անհավանական»,-ասել է «Լիվերպուլի» գլխավոր մարզիչ Յուրգեն Կլոպը ակումբի կայքի հետ զրույցում։ Իսկ Sky Sports-ի հետ հարցազրույցի ժամանակ գերմանացի մասնագետը չկարողացավ զսպել իր հուզմունքը․․․
‘It’s for our supporters, it’s for you out there.’ ❤🏆
— Sky Sports News (@SkySportsNews) June 25, 2020
Jurgen Klopp joins Sky Sports live after Liverpool were crowned Premier League champions! 🔴🔥
Watch our special reaction show live on Sky Sports News now: https://t.co/B16sdyjs7x pic.twitter.com/L1bHCvie4f
Իսկ հետո սոցանցերում տեսանյութ է տեղադրվել, թե ինչպես է գերմանացի 53-ամյա մարզիչը պարում չեմպիոնական երեկույթում:
Jurgen Klopp absolutely going for it last night…
— Footy Accumulators (@FootyAccums) June 26, 2020
This is the best/worst thing ever! 😂😂😂
📹 @regan_lowey pic.twitter.com/H6fPKyqZIq
«Լիվերպուլի» ավագ, կիսապաշտպան Ջորդան Հենդերսոնը ևս կիսվել է չեմպիոնությունը նվաճելու զգացումներով։
«Հիանալի է։ Մինչև վերջին պահը չէի ուզում խոսել չեմպիոնությունից։ Շատ ուրախ եմ բոլոր տղաների համար։ Հպարտանում եմ նրանով, ինչին հասանք։ «Չելսիի» ու «Մանչեսթեր Սիթիի» խաղը նայելը լրիվ այլ փորձ էր։ Իսկ հետո բոլորի հետ ուրախանալ եզրափակիչ սուլիչից հետո։ Երբեք չենք մոռանա այս պահը։ Մի ակնթարթ նույնիսկ բառերն էի մոռացել։ Երբեք այդ պահի մասին չես մտածում, ուղղակի կենտրոնանում ես յուրաքանչյուր խաղի վրա։ Իսկ երբ այն գալիս է․․․նույնիսկ չեմ կարող նկարագրել։ ՉԼ եզրափակչից հետո ասել էի, որ կարող էինք առանց մարզչի հաղթել։ Ու դա անարգանք չէր նախկին մարզիչների նկատմամբ։ Ուղղակի երբ Կլոպն առաջին անգամ հանդերձարան մտավ, փոխեց ամեն ինչ, ու մենք հետևեցինք նրան։ Հուսով եմ՝ կպահպանենք հաղթելու ցանկությունը»,- Հենդերսոնի խոսքերն է փոխանցում Sky Sports-ը։
«Մանչեսթեր Սիթիի» գլխավոր մարզիչ Խոսեպ Գվարդիոլան մեկնաբանել է «Լիվերպուլի» չեմպիոնությունը:
«Շնորհավորում ենք Լիվերպուլին, նրա մարզչին, երկրպագուներին և խաղացողներին: Նրանք արժանի են դրան: Երկու մրցաշրջան առաջ մենք 25 միավորով առաջ էինք «Լիվերպուլից»: Մեկ տարի անց նրանք մեզ հասան: Հիմա հերթը մերն է նրանց հասնելու: Բայց ամեն տարի չես կարող հաղթել», – Գվարդիոլայի խոսքերն է մեջբերում «Սիթիի» մամուլի ծառայությունը:
Լիվերպուլը կրկին կարմիր է․․․
«Լիվերպուլի» երկրպագուները ակումբային մարզադաշտի մոտակայքում տոնել են իրենց սիրելի թիմի չեմպիոնությունը: Երկրպագուները հավաքվել էին «Էնֆիլդի» մոտակայքում և սկսել բուռն տոնել հաղթանակը Անգլիայի առաջնությունում՝ բարձրաձայն երգելով և ճայթրուկներ վառելով:
«Նույնիսկ համաճարակը նրանց չի խանգարում», – The Associated Press-ի լրագրող Ռոբ Հարիսը թվիթերյան իր էջում գրել է ՝ տեղադրելով «Լիվերպուլի» երկրպագուների տեսանյութեր, որոնք տոնակատարության ընթացքում չեն պահպանում սոցիալական հեռավորության կանոնները՝ չնայած կորոնավիրուսի համաճարակի:
After all the agony, how Liverpool became champions again https://t.co/ovVQZvYdLi pic.twitter.com/9kEJDN01gL
— Rob Harris (@RobHarris) June 25, 2020
Նշենք, որ նախօրեին քաղաքային իշխանությունները հորդորել էին ակումբի երկրպագուներին չանցկացնել մասսայական միջոցառումներ։ Մեծասահասակներ, երեխաներ․․․ բոլորը երգում էին ու վառում ճայթրուկներ, իսկ ոմանք էլ պաշարել էին ակումբի մարզադաշտի դարպասները․․․
Դե ինչ, մերսիսայդցիները արդեն իսկ չեմպիոն են, և թիմի երկրպագուներին մնում է առաջիկա տուրերում վայելել իրենց սիրելի թիմի խաղը՝ ակնկալելով նոր ռեկորդների գրանցում այդ խաղերում․․․You’ll Never Walk Alone․․․
Վար Բաբայան
