Ֆուտբոլային սկաուտ․ Ֆրանսիայի առաջնության գլխավոր բացահայտումները

Ֆրանսիայի առաջնությունը ժամանակից շուտ ավարտվեց, դրա մասին մենք արդեն խոսել ենք բազմիցս, այդ թվում՝ «Ֆուտբոլը՝ թվերով» շարքում։ Այժմ կարող ենք ամփոփել առաջնությունը ոչ միայն թվերով, այլ նաև հիշել այս մրցաշրջանի գլխավոր հերոսներին՝ նոր հերոսներին, ովքեր իրենց մասին լսեցնել տվեցին ամբողջ աշխարհին հենց այս մրցաշրջանում։

Քրիստիան Մաուասսա

🇫🇷 Ֆրանսիա
21 տարեկան
«Ռեն»

Քրիստիանը ունիվերսալ ֆուտբոլիստ է, նա հաջողությամբ հանդես է գալիս պաշտպանության ձախ եզրում, սակայն հաջողությամբ կարող է փակել ամբողջ եզրը՝ հանդես գալով նաև ձախ եզրային հարձակվողի դիրքում։ Նման բազմաֆունկցիոնալ ֆուտբոլիստները միշտ էլ բարձր են գնահատվում, և բոլորովին անակնկալ չի լինի, եթե ամռանը ֆրանսիացին դառնա մի շարք թոփ ակումբների տրանսֆերային թիրախ։ Ցածրահասակ, սակայն արագավազ ու ֆուտբոլային համառություն դրսևորող այս ֆուտբոլիստը բավականին մեծ դեր է խաղում «Ռենում» և անկասկած իր մեծ ներդրումն ունի ֆրանսիական ակումբի ներկայիս հաջողություններում։

Պրեդրագ Ռայկովիչ

🇷🇸 Սերբիա
24 տարեկան
«Ռեյմս»

«Ռեյմսը» այս մրցաշրջանում բավականի հաջող է հանդես գալիս, իսկ պաշտպանությունում՝ լավագույններից մեկն է Եվրոպայում։ Ընդ որում, Ֆրանսիայի վեցակի չեմպիոնը (60 տարի առաջ) ավելի քիչ գնդակ է բաց թողել, քան փարիզյան գրանդը՝ ՊՍԺ-ն․ դա պարզապես ողջունելի է։ Իսկ ո՞վ է այդ հաջողության գլխավոր կերտողներից մեկը․ այո՛-այո՛, մեր այսօրվա հերոսը։ Անձամբ, իմ սուբյեկտիվ կարծիքով, Ռայկովիչը Լիգա 1-ի լավագույն դարպասապահն էր այս մրցաշրջանում և լավագույններից մեկը՝ թոփ-5 լիգաներում։ Կար ժամանակ, երբ երիտասարդ դարպասապահը «Ցրվենա Զվեզդայի» կազմում հանդիսանում էր սերբական ֆուտբոլի ամենահեռանկարային ֆուտբոլիստներից մեկը, սակայն երկար սպասված առաջարկները թոփ-5 լիգաներից այդպես էլ չեկան։ Ֆուտբոլիստը տեղափոխվեց իսրայելական «Մակկաբի», որտեղ 4 մրցաշրջան անցկացնելուց հետո վերջապես ստացավ շանսը՝ թոփ լիգայում իրեն դրսևորելու։ Համեստ «Ռեյմսի» կազմում առաջին իսկ մրցաշրջանում նա ապացուցեց իր բարձր կարգը, և սա միայն սկիզբն է․․․

Հաբիբ Դիալլո

🇸🇳 Սենեգալ
24 տարեկան
«Մեց»

Սենեգալցի ֆուտբոլիստը «Մեցի» սան է, իսկ նախորդ մրցաշրջանում նա օգնեց իր թիմին դուրս գալ Լիգա 1՝ դառնալով ավելի քան երկու տասնյակ գոլերի հեղինակ։ Այս մրցաշրջանում նրա խփած 12 գնդակները մեծ դեր խաղացին, որպեսզի ֆրանսիական այս համեստ ակումբը չհայտնվի Լիգա 1-ի «նկուղում» (15-րդ տեղ)։ Դիալլոն, եթե շարունակի այսպիսի անհատական առաջընթացը մյուս մրցաշրջանում ևս, կարող է ակնկալել, որ հայտնվի որևէ բարձրակարգ ակումբի կազմում։ Չնայած նրանով արդեն իսկ հետաքրքրվում են ԱՊԼ-ի մի շարք ակումբներ, մասնավորապես՝ «Արսենալը»։ Դե ինչ, սպասենք տրանսֆերային պատուհանի բացմանը։

Վիկտոր Օսիմեն

🇳🇬 Նիգերիա
21 տարեկան
«Լիլ»

Երբ «Լիլը» 12 մլն եվրո վճարեց բելգիական «Սպորտինգին» նիգերիացի ֆուտբոլիստի տրանսֆերի դիմաց, շատերը զարմացել էին՝ ո՞վ է այս երիտասարդը, որ «դոգերը» նման գումար են վճարում նրա համար։ Նա Վիկտոր Օսիմենն է, Լիգա 1-ի այս տարվա գլխավոր բացահայտումներից մեկը, «Լիլի» հարձակման առաջատարը և լիգայի գլխավոր ռմբարկուներից մեկը։ Ֆիզիկական հիանալի տվյալներ, արագություն, գոլային հոտառություն․ Օսիմենը կարճ ժամանակահատվածում դարձավ թոփ ակումբների համար առաջիկա տրանսֆերային պատուհանի գլխավոր լոտերից մեկը։ ArmSport-ի կանխատեսմամբ՝ շուտով նիգերիացուն կտեսնենք ԱՊԼ-ի ակումբներից մեկում։

Էդուարդո Կամավինգա

🇫🇷 Ֆրանսիա
17 տարեկան
«Ռեն»

Մեր վերջին հերոսը այսպիսի վաղ տարիքում արդեն իսկ իր թիմի ամենահայտնի ֆուտբոլիստն է, այն էլ ոչ շարքային ինչ-որ թիմի, որը մասնակցում է առաջնությանը զուտ օլիմպիական կարգախոսով՝ «կարևորը մասնակցությունն է», այլ «Ռենի», որը հաջորդ մրցաշրջանում մասնակցելու է Չեմպիոնների լիգայի խաղարկությանը (իհարկե, դեռ պետք է լինելու հաղթահարել փլեյ-օֆֆ փուլը)։ Եվ մեկ րոպե․ ֆուտբոլիստը նույնիսկ հանդես չի գալիս հարձակման գծում, այլ կենտրոնական կիսապաշտպան է։ Մեկ հաջող հանդիպումը ՊՍԺ-ի դեմ Էդուարդոյին դարձրեց Լիգա 1-ի, հավանաբար, գլխավոր բացահայտումը, որից հետո բոլորը սկսեցին խոսել երիտասարդ ֆուտբոլիստի մասին, իսկ ինքը՝ Կամավինգան, խաղից խաղ ապացուցում է, որ ֆրանսիական առաջնությունում հասունանում է ֆուտբոլային ապագա աստղ։ «Մանչեսթեր Յունայթեդն» ու «Ռեալ Մադրիդը» արդեն իսկ լրջորեն հետաքրքրվում են նրա ծառայություններով և շատ շուտով հավանական է՝ մենք նրան տեսնենք որևէ գրանդ ակումբի կազմում։

Մի փոքր «Ռենի» մասին․ ֆրանսիական ակումբը բավականին հավակնոտ և հեռանկարային նախագիծ է, ակումբի սեփականատերը ամենահարուստ մարդկանցից մեկն է Ֆրանսիայում։ Սակայն ակումբի ղեկավարությունը չի ցանկանում մեծ գումարներով, հնչեղ տրանսֆերներով ապահովել թիմի առաջխաղացումը, այլ շեշտը դնում է սեփական կադրերի և այլ թիմերից գնված երիտասարդ, հեռանկարային ֆուտբոլիստների վրա։ Իսկ թիմի երիտասարդ գլխավոր մարզիչ Ժուլիեն Ստեֆանը մեծ հաջողությամբ կարողանում է աշխատել երիտասարդ ֆուտբոլիստների հետ՝ կարճ ժամանակահատվածում ձևավորելով բավականին մարտունակ թիմ։ Թիմի սելեկցիոն ճիշտ աշխատանքը, ռեսուրսների արդյունավետ օգտագործումը, վարած գրագետ քաղաքականությունն արդեն իսկ տալիս են իրենց արդյունքները․ Կամավինգան, ով սեփական ակադեմիայի սան է, «Նանսիից» 9 մլն եվրոյով ձեռք բերված Մաուասսան, ում տրանսֆերային արժեքը ներկա դրությամբ 2-3 անգամ ավել է գնահատվում, այդ ամենի վառ ապացույցն է։ Դե ինչ, սա միայն սկիզբն է․․․

Վար Բաբայան

Շարքի նախորդ մասերը

Հաշվենկատ Վերոնան և հավակնոտ Բոլոնյան՝ ցատկահարթակ ֆուտբոլային էլիտա

Քեյ-ֆուտբոլի (K-Football) ակնկալիքով

Երիտասարդ աղվեսների ոդիսականը շարունակվում է

Ֆուտբոլային սկաուտ․ Ռեալ Սոսեյդադ, Սևիլյա

Ֆուտբոլային սկաուտ․ Ատալանտա, Լացիո

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)

Էրեդիվիզիի ամենահեռանկարային ֆուտբոլիստները (Մաս 1)