Ֆուտբոլային սկաուտ․ Ռեալ Սոսեյդադ, Սևիլյա

Armsport-ը «Ֆուտբոլային Սկաուտ» շարքում արդեն անդրադարձել է Ա Սերիայի, Բունդեսլիգայի և ԱՊԼ-ի թիմերին։ Այս անգամ մեր հորիզոնում են Լա Լիգայի երկու ակումբների՝ «Ռեալ Սոսեյդադի» և «Սևիլյայի» ամենահեռանկարային ֆուտբոլիստները։

Ալեքսանդր Իսակ

🇸🇪 Շվեդիա
«Ռեալ Սոսեյդադ»
20 տարեկան

«Ռեալ Սոսեյդադի» կազմը այդ մրցաշրջանում ամենաերիտասարդներից մեկն է Լա Լիգայում։ 4 տարի առաջ Դորտմունդի «Բորուսիան» գնեց շվեդ ֆուտբոլիստի տրանսֆերային իրավունքները 8,5 մլն եվրոյով։ Սակայն Իսակը այդպես էլ չկարողացավ գտնել իր տեղը ռուրյան ակումբի հիմնական կազմում և այս մրցաշրջանից առաջ 6,5 մլն եվրոյով տեղափոխվեց Սան Սեբաստիան, չնայած, որ մինչ այդ, վարձավճարով հանդես գալով «Վիլհեմ II»-ի կազմում, 16 խաղում 13 գոլի հեղինակ էր դարձել Էրեդիվիզիում։ Եվ այժմ, երիտասարդ հարձակվողը շարունակում է տխրեցնել հակառակորդների դարպասապահներին արդեն Լա Լիգայում․ 7 խփած գնդակ 27 խաղում, ճիշտ է, շատ չէ, բայց թոփ լիգայում մեկնարկի համար վատ չէ։

Ժուլես Կունդե

🇫🇷 Ֆրանսիա
«Սևիլյա»
21 տարեկան

Ֆրանսիացի պաշտպանը այս մրցաշրջանից առաջ է միացել «Սևիլյային»՝ 25 մլն եվրոյի դիմաց։ Մինչ այդ նա բավականին տպավորիչ մրցաշրջան էր անցկացրել «Բորդոյի» կազմում։ Երիտասարդ պաշտպանը բավականին արագ ադապտացվեց իսպանական ֆուտբոլում և այժմ համարվում է անդալուսական թիմի պաշտպանության հենասյուներից մեկը՝ ցուցադրելով իր տարիքի համար բավականին հասուն և գրագետ ֆուտբոլ։ Եթե Ժուլեսը այդպես շարունակի, շուտով մենք կտեսնենք նրան որևէ գրանդ ակումբի մարզաշապիկով։

Միկել Օյարսաբալ

🇪🇸 Իսպանիա
«Ռեալ Սոսեյդադ»
22 տարեկան

Միկելը արդեն հանդիսանում է Իսպանիայի հավաքականի ֆուտբոլիստ և արդեն հասցրել է նույնիսկ երկու անգամ աչքի ընկնել խփած գնդակներով Եվրո-2020-ի ընտրական փուլում։ Եթե ԵԱ-ն չհետաձգվեր, մեծ հավանականությամբ, մենք կտեսնեինք երիտասարդ ֆուտբոլիստին այդ մրցաշարում, սակայն․․․ Լավ, դեռ ամեն ինչ առջևում է։ Օյարսաբալը արդեն երրորդ մրցաշրջանն անընդմեջ շարունակում է ցուցադրել բավականին արդյունավետ ֆուտբոլ, և, հավանաբար, արդեն իսկ պատրաստ է հանդես գալ որևէ գրանդ ակումբի կազմում։ Խոսակցություններ կան, որ նրա ծառայություններով լրջորեն հետաքրքրված են «Մանչեսթեր Սիթին» և Մադրիդի «Ռեալը»։

Յուսեֆ Էն-Նեսիրի

🇲🇦 Մարոկկո
«Սևիլյա»
22 տարեկան

Ֆուտբոլասերները, ովքեր առանձնապես չէին հետաքրքրվում «Լեգանեսի» ելույթներով, բավականին զարմացան, երբ այս ձմեռ «Սևիլյան» 20 մլն եվրո վճարեց աֆրիկացի ֆուտբոլիստի տրանսֆերի դիմաց։ Սակայն կարճ ժամանակահատվածում, Յուսեֆը ապացուցեց, որ անդալուսական ակումբի սելեկցիոն բաժինը դեռևս կարող է գտնել տաղանդներ այնտեղ, որտեղ շատ ակումբներ պարզապես ուշադրություն չեն դարձնում։ 22-ամյա ֆուտբոլիստը կարողացավ արագ հարմարվել նոր թիմի ֆուտբոլային փիլիսոփայությանը և, ամենայն հավանականությամբ, շուտով մենք ականատես կլինենք ևս մեկ ֆուտբոլային տաղանդի վերելքին եվրոպական ֆուտբոլում։

Մարտին Էդեգոր

🇳🇴 Նորվեգիա
«Ռեալ Սոսեյդադ»
21 տարեկան

Մոտ 6 տարի առաջ պատանի նորվեգացու մասին խոսում էր ամբողջ աշխարհը․ Մադրիդի «Ռեալը» ձեռք բերեց աշխարհի ամենահեռանկարային ֆուտբոլիստներից մեկին, ակնկալելով, որ երկու-երեք տարի հետո իր կազմում կունենա մոլորակի ուժեղագույն ֆուտբոլիստներից մեկին։ Ներկա պահին, սխալ կլինի ասել, որ ակնկալիքները չիրականացան։ Ֆուտբոլիստի տրանսֆերային իրավունքները դեռևս պատկանում են «Արքայական ակումբին», իսկ այս մրցաշրջանը, անկացնելով մեկ այլ «Ռեալի» կազմում, նորվեգացին ցուցադրում է պարզապես հիանալի ֆուտբոլ՝ օգնելով իր թիմին իրական պայար մղել ՉԼ-ի գոտում հայտնվելու համար։

Վար Բաբայան

Շարքի նախորդ մասերը

Ֆուտբոլային սկաուտ․ Ատալանտա, Լացիո

Ֆուտբոլային սկաուտ․ Վուլվերհեմփթոն, Էվերտոն

Ֆուտբոլային սկաուտ․ Վերդեր, Այնտրախտ

Էրեդիվիզիի ամենահեռանկարային ֆուտբոլիստները (Մաս 3)

Էրեդիվիզիի ամենահեռանկարային ֆուտբոլիստները (Մաս 2)

Էրեդիվիզիի ամենահեռանկարային ֆուտբոլիստները (Մաս 1)

Պորտուգալիան՝ ցատկահարթակ դեպի մեծ ֆուտբոլ

Բելգիան շարունակում է մնալ ապագա աստղերի դարբնոց (Մաս 2)

Բելգիան շարունակում է մնալ ապագա աստղերի դարբնոց (Մաս 1)

Սամուրայների նոր սերունդը Եվրոպայում