Armsport-ը նախորդ անգամ անդրադարձել էր Արգենտինայի առաջնությունում հանդես եկող տաղանդավոր ֆուտբոլիստներին, ովքեր արդեն իսկ պատրաստ են տեղափոխվել եվրոպական թոփ առաջնություններ։
Այս անգամ ևս մենք մեր հայացքը կհառենք օվկիանոսից այն կողմ, սակայն ոչ թե Հարավային Ամերիկա, այլ՝ Հյուսիսային։ MLS-ում հանդես են գալիս ոչ միայն կարիերայի մայրամուտին մոտ գտնվող անվանի վետերաններ, այլև տաղանդավոր ֆուտբոլիստներ, ովքեր կա՛մ ունեն մեծ պոտենցիալ, կա՛մ էլ ներկա պահին գտնվում են իրենց կարիերայի գագաթնակետին։
Ռաուլ Ռուիդիաս
🇵🇪 Պերու
«Սիեթլ»
29 տարեկան
29-ամյա պերուացի հարձակվողը վերջերս «Սիեթլի» հետ դարձավ MLS-ի չեմպիոն։ 28 գոլ 42 խաղում․ տպավորիչ է, համաձա՞յն եք։ Ռաուլը աչքի է ընկնում կայուն խաղով, բավականին արդյունավետ է եղել բոլոր առաջնություններում, որտեղ խաղացել է` Պերու, Մեքսիկա, ԱՄՆ․․․ Միգուցե ժամանակն է ուժերը փորձել նաև Եվրոպայո՞ւմ․․․
Քրիստիան Պավոն
🇦🇷 Արգենտինա
«ԼԱ Գելաքսի»
23 տարեկան
Անցած մրցաշրջանում «Բոկա Խունիորսի» ֆուտբոլիստը «Լոս Անջելես Գելաքսիում» անցկացրեց վարձավճարով, իսկ նոյեմբերին հայտնի դարձավ, որ արգենտինացին հաջորդ մրցաշրջանը ևս կանցկացնի Հրեշտակների քաղաքում: Արգենտինացին բավականին մեծ պոտենցիալ ունեցող ֆուտբոլիստ է, հավաքականի թեկնածու։ Նույնիսկ Իբրահիմովիչն է կարծում, որ Պավոնը չափազանց լավն է MLS- ի համար։
Կարլոս Վելա
🇲🇽 Մեքսիկա
«Լոս Անջելես»
30 տարեկան
MLS-ի լավագույն ռմբարկու, լավագույն ֆուտբոլիստ․․․ Մենք բավականաչափ ծանոթ ենք Կարլոս Վելային. մեքսիկացին Հին աշխարհում իր կարիերան սկսեց «Արսենալում», բայց կարիերայի մեծ մասն անցկացրեց Իսպանիայում, որտեղ, մի շարք գործուղումների ավարտից հետո, հաստատվեց «Ռեալ Սոսյեդադում»` այնտեղ խաղալով 6 տարի: Վելան բարձր մակարդակի ֆուտբոլիստ է, և Եվրոպայում ոչ ոք չի մոռացել նրա մասին: Ըստ իր հայրենակից Ջոնաթան Դոս Սանթոսի, Վելան առաջարկ ունի «Բարսելոնայից»: Հասկանալի է, որ կատալոնացիներին Կարլոսը անհրաժեշտ է որպես փոխարինող խաղացող, բայց համաձայնեք`այդպիսի մեծ ակումբը ոչ բոլորին կհրավիրի իր թիմ՝ թեկուզև որպես ռոտացիայի ֆուտբոլիստ:
Ժոսեֆ Մարտինես
🇻🇪 Վենեսուելա
«Ատլանտա»
26 տարեկան
Մարտինեսը արդեն փորձել է իր ուժերը Հին աշխարհում։ Շվեյցարիայի առաջնությունում նա վատ հանդես չէր գալիս, այնուհետև գործուղվեց Թուրին՝ «Տորինոյի» կազմում 2,5 տարվա ընթացքում 13 գոլ խփելով: Իհարկե, Ժոզեֆը կշարունակեր առաջընթաց ունենալ Եվրոպայում, բայց «Տորինոն» 4,5 միլիոն եվրոյի դիմաց ընդունեց «Ատլանտա Յունայթեդի» առաջարկը, և այդ գումարի դիմաց ամերիկյան ակումբը ստացավ անթերի դիպուկահարի: Մարտինեսը վերջին երեք տարվա MLS- ի ամենահաջողակ ֆուտբոլիստն է, ով 100 խաղում դարձել է 88 գոլի հեղինակ և կատարել է 10 գոլային փոխանցում: Ինչ որ տեղ հիշեցնում է Գաբիգոլին, այդպես չէ՞: Միգուցե նա արդեն պատրաստ է վերադառանալ Եվրոպա, նրա ծառայություններով արդեն իսկ հետաքրքված են անգլիական մի քանի ակումբներ։
Գոնսալո «Պիտի» Մարտինես
🇦🇷 Արգենտինա
«Ատլանտա»
26 տարեկան
Հարավային Ամերիկայի 2018 թ․ լավագույն ֆուտբոլիստը «Ռիվեր Փլեյթից» կարող էր միանգամից տեղափոխվել Եվրոպա, սակայն Պիտին տարօրինակ որոշում կայացրեց՝ տեղափոխվելով Ատլանտա։ Այստեղ նա ևս ցույց տվեց իր բարձր կարգը, և միգուցե, մենք նրան շուտով կտեսնենք ՊՍԺ-ում, որտեղ խաղալը ֆուտբոլիստի երազանքն է։
Հեբեր
🇧🇷 Բրազիլիա
«Նյու Յորք Սիթի»
28 տարեկան
«Ալաշկերտի» կազմում Հեբերը բացեց դռները դեպի Եվրոպա՝ դառնալով Հայաստանի Բարձրագույն խմբի լավագույն ռմբարկուն։ Այնուհետև նա փայլեց Խորվաթիայում՝ դառնալով «Ռիեկայի» առաջատարը և առաջնության ռմբարկուներից մեկը։ Կարծես թե ճանապարհը դեպի Բունդեսլիգա կամ Ա Սերիա արդեն բաց էր, սակայն բրազիլացին, ինպես մեր նախորդ հերոսը, անակնկալ որոշում կայացրեց՝ տեղափոխվել «Սիթի»․․․ ո՛չ, ոչ Մանչեսթեր, այլ Նյու Յորք։ Այստեղ նա ևս ցույց տվեց իր բարձր կարգը․ 23 հանդիպում, 15 գոլ։ Տպավորիչ է։ Բայց Հեբերը դեռևս վետերան չէ, և մենք նրան դեռ կարող ենք տեսնել Հին աշխարհի թոփ առաջնություններից մեկում․․․
Դիեգո Ռոսի
🇺🇾Ուրուգվայ
«Լոս Անջելես»
21 տարեկան
Դիեգո Մարտին Ռոսի Մարաշլյան․․․ Հայազգի ֆուտբոլիստը, ըստ շատ մասնագետների, համարվում է գլխավոր «հրեշտակը» Լոս Անջելեսում։ «Լոս Անջելես» տեղափոխվելով իր հայրենի «Պենյարոլից»՝ Դիեգոն խփել է 36 գոլ և կատարել 16 գոլային փոխանցում 76 խաղում: Տպավորիչ վիճակագրությունը գրավեց եվրոպական թիմերին դեռ ամռանը. Ռոսիով հետաքրքրված էր «Կրասնոդարը», իսկ «Ֆիորենտինան» ուրուգվայցու համար առաջարկեց 15 միլիոն եվրո: Կարծում ենք, որ վաղ թե ուշ մենք կտեսնենք Դիեգոյին Եվրոպայում, ինչու և ոչ՝ անմիջապես ուժեղ առաջնությունում, օրինակ՝ Իսպանիայում կամ Իտալիայում։
Վար Բաբայան
Շարքի նախորդ մասերը
