Երևանում մեկնարկել է թենիսի Հայաստանի առաջնությունը: Հայաստանի առաջնությունում ներկայացուցիչներ կան ընդամենը 2 քաղաքից՝ Երևանից և Գյումրիից: Առաջնությունն անցկացվում է տարբեր տարիքային խմբերում՝ մինչև 10, մինչև 12, մինչև 14, մինչև 16, մինչև 18 և մեծահասակներ: Մեծահասակների մրցաշարում մասնակցում է 13 տղա և 14 աղջիկ: Ընդհանուր առմամբ Հայաստանի առաջնությանը մասնակցում է շուրջ 70 թենիսիստ
Հայաստանի հավաքականի գլխավոր մարզիչ Վահե Ավետիսյանի խոսքով նախկինում Հայաստանի առաջնություններին մասնակցում էր նաև Վանաձորը, սակայն 2015-ից հետո Հայաստանի 3-րդ քաղաքը ներկայացուցիչ չունի:
«Այսօր մրցումային երկրորդ օրն է և հիմա մրցախաղերի ելքերը կանխատեսելի են: Քառորդ եզրափակչից կսկսվի ուժեղագույնների պայքարը: Տղամարդկանց մրցաշարում այս տարի նույնպես մասնակցում է Հայաստանի առաջին ռակետ Միքայել Ավետիսյանը, նախորդ առաջնության չեմպիոն Աշոտ Գևորգյանը, հավաքականի անդամներ Արթուր Սողոյանը, Աշոտ Գևորգյանը: Աղջիկների մրցաշարին այս տարի չի մասնակցում Հայաստանի առաջին ռակետ, Հայաստանի բազմակի չեմպիոն Անի Ամիրաղյանը, ով արդեն բնակվում է Մոսկվայում: Ուժեղագույններից բացակայում է նաև Եվա Ավետիսյանը: Մնացած ուժեղագույնները՝ Գաբրիելա Հակոբյանը, Իռեն Մուրադյանը, Միլենա Գևորգյանը, Արևիկ Թումանյանը մասնակցում են այս տարվա առաջնությանը»,- առաջնության մասին պատմում է հավաքականի գլխավոր մարզիչը:
Հայաստանում պրոֆեսիոնալ թենիսով զբաղվում է շուրջ 200 հոգի՝ տարբեր տարիքային խմբերում: Թենիսով զբաղվում են միայն Երևանում, Գյումրիում և Վանաձորում:
«Մյուս քաղաքներում ընդհանրապես կորտեր գոյություն չունեն, ուստի առանց դրա անհնար է մարզաձևի մասսայականացումը: Ամեն տարի նկատում ենք թենիսով զբաղվողների աճ: Մենք էլ ամեն ամիս մեկ օր թենիսի սիրահարներին հրավիրում ենք անվճար մարզվելու և թենիս խաղալու: Հետաքրքրությունն, իսկակապես, շատ մեծ է, իսկ մարզաձևը մասսայականացնելու և զարգացնելու համար հարկավոր են հովանավորներ: Թենիսն աշխարհում ամենամեծ ներդրում պահանջող մարզաձևն է: Երեխային որևէ մարզաձևի տալուց ծնողն ընդհանրապես գումար չի վճարում կամ այդքան գումար չի վճարում, ինչքան թենիսում: Այստեղ ամեն ինչ գումար է: Մարզաձևի զարգացման համար ահռելի գումարներ են անհրաժեշտ: Մենք ունենք տաղանդավոր երեխաներ, ովքեր մանկապատանեկան տարիքում հաղթել են այնպիսի թենիսիստների, ովքեր հիմա աշխարհահռչակ մարզիկներ են դարձել: Հիմա հարց է առաջանում, ինչո՞ւ մեր երեխաները՝ մինչև 16 տարեկան, կարողանում են լավ արդյունքներ գրանցել, իսկ հետո՝ ոչ: Պատճառն այն է, որ չենք կարողանում մասնակցել շատ միջազգային մրցաշարերի՝ դրանք ահռելի ծախսեր են: Տարեկան պետք է առնվազն 70 հազար դոլար մեկ մարզիկի համար, որպեսզի կարողանա գոնե 14 մրցաշարի մասնակցել տարվա ընթացքում: Ամեն ինչ կախված է գումարներից: Տաղանդավոր երեխաներ ունենք, բայց առանց մեծ մրցաշարերի փորձի, ոչինչ չի ստացվի»,-ասում է Ավետիսյանը:
Անկախ Հայաստանի պատմության ընթացքում լավագույն արդյունքը գրանցել է Սարգիս Սարգսյանը, ով 38-րդն է եղել աշխարհում (2004 թվականին): Նա Հայաստանը ներկայացնող միակ թենիսիստն է եղել, ով մասնակցել է Օլիմպիական խաղերի :
Ընդհանուր առմամբ, Սարգսյանը մասնակցել է 3 Օլիմպիական խաղերի (1996, 2000, 2004): Սարգիսից հետո լավագույն արդյունքն ունեցել է Տիգրան Մարտիրոսյանը, ում լավագույն ցուցանիշը եղել է 340-րդը:
«Աշխարհում ռեյտինգ ունեցող 30 միլիոն թենիսիստ կա, և սա, իհարկե, լավ ցուցանիշ է: Հիմա հավաքականի մակարդակով մենք 220 երկրի շարքում զբաղեցնում ենք 100-րդ հորիզոնականը: Լավագույն արդյունքը եղել է 70-րդ տեղը: Հայաստանի հավաքականի լավագույն արդյունքը Դեվիսի գավաթում (աշխարհի թիմային առաջնություն ) եղել է 2014 թվականին, երբ հաջողվել է անցնել երկու ենթախումբ»-ասում է Ավետիսյանը:
Հայաստանի թենիսի ֆեդերացիան պետական աջակցություն է ստանում տարեկան 5 միլոն դրամ, այս գումարը նախատեսված է Հայաստանի առաջնությունների անցկացման համար:
«Զարգացած երկրներում թենիսին հատկացված տարեկան բյուջեն գերազանցում է 1 միլիարդը, մեր դեպքում՝ 70 հազար դոլարից ոչ ավելի է: Դա ասում եմ պետական միջոցների և ֆեդերացիայի տրամադրած գումարները միասին: Վերջինը ծախսվում է միջազգային մրցաշարերի մասնակցության համար: Այդ բոլոր գումարները հոգում է ֆեդերացիան: Կան մրցաշարեր, որոնց պարտադիր մասնակցում ենք, օրինակ՝ Դեյվիսի գավաթը (տղամադրկանց աշխարհի թիմային առաջնություն) , FedCup (կանանց աշխարհի թիմային առաջնությունը)»,-նշում է մարզիչը:
Հավաքականի գլխավոր մարզիչը նաև տեղեկացնում է, որ հոկտեմբերին Երևանում կկայանա ITF-ի մինչև 18 տարեկանների ռեյտինգային մրցաշար, որին այս պահի դրությամբ մասնակցելու հայտ է ներկայացրել 16 երկիր:
«Երևանում միջազգային մրցաշար անցկացնելու լավն այն է, որ մեր երեխաները գումար չեն ծախսում ճանապարհի վրա և միջազգային մրցումների մեծ փորձ են ձեռք բերում»,-եզրափակում է Ավետիսյանը:
Երվանդ ՀԱԿՈԲՅԱՆ
