Հայաստանի ազգային հավաքականն ավարտեց ելույթը ԵՎՐՈ-2020-ի ընտրական փուլում: Ավարտեց անփառունակ խաղով:
Ընդհանրապես, ընտրական փուլը կարելի է բաժանել 4 ենթամասի:
Մեկնարկային 2 խաղում հավաքականի նախկին գլխավոր մարզիչ Արմեն Գյուլբուդաղյանցը փորձարկումներ արեց: Առաջին 2 խաղում մերոնք պարտվեցին Բոսնիային ու Ֆինլանդիային: Հետագայում հավաքականի մարզիչը սկսեց դավանել ավելի հարձակվողական ֆուտբոլ, և արդյունքը տեսանելի դարձավ. 2 խաղ, 2 հաղթանակ: Մեր տղաները տանը հաղթեցին Լիխտենշտեյնին և արտագնա հաղթանակ տարան հույների նկատմամբ:
Նույն որակյալ ֆուտբոլը խաղացինք սեպտեմբերյան 2 խաղում: Ճիշտ է, պարտվեցինք Իտալիային, բայց ոչնչով չէինք զիջում մրցակցին: Հրաշալի հաղթանակ տոնեցինք Բոսնիայի նկատմամբ, և կրկին արթնացավ հույսը: Հույս՝ պայքարելու Եվրոպայի առաջնության եզրափակիչ փուլի ուղեգրի համար: Արմեն Գյուլբուդաղյանցի դավանած ֆուտբոլն , իրոք, արժանի էր գովասանքի:
Եկավ հոկտեմբերը և բոլորը մեծ լարվածությամբ սպասում էին Լիխտենշտեյնի ու Ֆինլանդիայի դեմ արտագնա խաղերին, քանի որ այդ 2 խաղում հաղթանակը մեզ անհավանական մոտ կտաներ Եվրոյի ուղեգրին: Սակայն ստացվեց այն, ինչ ստացվեց: Այդ 2 խաղում մերոնք վաստակեցին միայն 1 միավոր ու գործնականում զրկեցին հայ ազգին մի մեծ հույսից:
Ֆինլանդիայի դեմ խաղից հետո հրաժարական տվեց Արմեն Գյուլբուդաղյանցը: ՀՖՖ-ի նախագահ Արթուր Վանեցյանն ինչքան էլ համոզեց մարզչին մնալ, այնուամենայնիվ, Գյուլբուդաղյանցը գնաց: Հեռացավ մի պահի, երբ ամեն ինչ կորած էր: Գյուլբուդաղյանցն իր հեռանալով հավաքականի հաջորդ մարզչին տվեց երկխաղյա փորձաշրջանի հնարավորություն:
Ընտրական փուլի ավարտից 2 տուր առաջ հավաքականը մնաց առանց գլխավոր մարզչի: Սկսվեցին շրջանառվել տարբեր մարզիչների անուններ: Հավաքականի գլխավոր մարզչի ղեկը սկսեց կապվել Ալեքսանդր Գրիգորյանի հետ և մինչ բոլորը սպասում էին նրա՝ մարզչական պաշտոնին նշանակվելու լուրին, ՀՖՖ-ն հայտարարեց Աբրահամ Խաշմանյանի հետ պայմանագիր կնքելու մասին:
Հավաքականի ղեկը վստահվեց Խաշմանյանին: Մարդ, ում անունը վերջին տարիներին միշտ շրջանառվում էր, երբ ազգային թիմը մնում էր առանց մարզչի: Խաշմանյանի նշանակումը ֆուտբոլային լայն զանգվածի մոտ դրական արձագանք գտավ, բայց մարզիչը եկավ հավաքական ծանր իրավիճակում: Տարբեր պատճառներով Խաշմանյանը չէր կարող օգտագործել առաջատար 5-6 ֆուտբոլիստի:
Առաջին խաղը հույների դեմ էր: Հավաքականը խաղաց նոր սխեմայով և պարտվեց 0-1 հաշվով՝ առջևի գծում թողնելով անատամ թիմի տպավորություն: Խաշմանյանը չկարողացավ իր թիմից ստանալ այն, ինչ ցանկանում էր:
Նորանշանակ մարզչի գլխավորությամբ հավաքականը հյուր գնաց Իտալիա:
Չնայած նախորդ խաղում ձախողմանը, Խաշմանյանը հավատարիմ մնաց 3 կենտրոնական պաշտպանով խաղալու սխեմային: Խաղացինք ու պարտվեցին 1-9 հաշվով: Հայաստանի ազգային հավաքականը կրեց իր պատմության ամենախոշոր հաշվով պարտությունը:
Խաղի մասին.
Արամ Հայրապետյանը հերթական անփառունակ խաղն անցկացրեց: Դարպասապահը շատ հաճախ սխալ էր դուրս գալիս դարպասից և մի քանի անգամ այդ պատճառով ստիպված եղավ գնդակը հանել սեփական դարպասից:
Ինչպես հավաքականի ավագ Հովհաննես Համբարձումյանը նշեց, մերոնք դեռ պատրաստ չեն 3 կենտրոնական պաշտպանով խաղալուն: Իշխանյան-Չալըշըր-Հարոյան եռյակը ահռելի քանակությամբ սխալներ թույլ տվեց: Իտալացիների գրոհները հիմնականում անցնում էին կենտրոնով: Հենակետայիններ Արտակ Գրիգորյանն ու Արտակ Եդիգարյանը չէին հասցնում օգնել պաշտպաններին: Առջևի գծում քիչ թե շատ ակտիվություն էր դրսևորում Էդգար Բաբայանը: Գոլն էլ Բաբայանը խփեց անհատական վարպետության շնորհիվ:
Մեր հավաքականը երբեք այսքան անօգնական տեսք չէր ունեցել: Չկար մեկը, ով մեր ֆուտբոլիստների «դուխները տեղը կպահեր». Նույնիսկ գլխավոր մարզիչն էր ֆիասկոյի ենթարկվել:
Դժվար է վերլուծել մի խաղ, որտեղ պարտվել ես 1-9 հաշվով: Դժվար է նաև ասել Խաշմանյանը կմնա՞ հավաքականի ղեկին, թե ոչ:
Մարզիչը հետխաղյա ասուլիսին նշեց, որ եթե ՀՖՖ-ն ցանկանա, նա կշարուանկի աշխատել հավաքականում, հակառակ դեպքում պատրաստ է հեռանալ:
Առջևում տևական ժամանակ դադար է: Պետք է այդ ժամանակահատվածն օպտիմալ օգտագործել: Եթե Խաշմանյանը մնալու է, ապա պետք է հասկանանք, թե որքանով է իրատեսական նրա դավանած ֆուտբոլի միջոցով արդյունք ստանալը կամ ունե՞նք համապատասխան ռեսուրս՝ երեք կենտրոնական պաշտպանով խաղալու համար:
Եթե Խաշմանյանը հեռանալու է, ինչը կարծում եմ այս պահին սխալ որոշում է, ապա շատ դժվար է լինելու արժանի մասնագետ գտնելը:
Արմեն Գարամյան
