Կայուն և պարբերական. Ինչ մարզավիճակով են ֆուտբոլիստները միացել Հայաստանի հավաքականին

Հայաստանի հավաքականը սկսել է նախապատրաստությունը Եվրո-2020-ի որակավորման փուլի վերջին 2 տուրերի հանդիպումներին:

ArmSport.am-ը փորձել է հասկանալ, թե ինչ մարզավիճակով են ֆուտբոլիստները մոտենում հանդիպումներին։

Արամ Հայրապետյան. «Ուրարտուի» վերջին 4 հանդիպումներից 2-ում դարպասը պաշտպանել է Հայրապետյանը. Գավաթային խաղում 120 րոպե դարպասն անառիկ է պահել, իսկ առաջնության 13-րդ տուրում 2 գոլ է ընդունել «Գանձասար-Կապանից» (4:2):

Արսեն Բեգլարյան. Բելառուսական «Դնեպրի» վերջին հանդիպումներում Արսենը մնացել է պահեստայինների նստարանին:

Գևորգ Կասպարով. Կասպարովը «Գանձասար-Կապանի» հիմնական դարպասապահն է: Վերջին տուրում փորձառու դարպասապահը 4 գոլ է ընդունել «Ուրարտուից»:

Տարոն Ոսկանյան. «Ալաշկերտի» պաշտպանը իր թիմի վերջին 3 հանդիպումներից մեկին է մասնակցել:

Հայկ Իշխանյան. «Ալաշկերտի» մյուս կենտրոնական պաշտպանը կայուն խաղաժամանակ է ստանում. «գավաթային հանգստից» հետո նա մասնակցել է առաջնության վերջին 2 հանդիպումներին:

Արման Հովհաննիսյան. Արմանը վերջին 3 հանդիպումներից մեկի վերջնամասում է փոխարինվել. այդ խաղերից մեկում էլ պաշտպանը գոլի հեղինակ է դարձել:

Վարազդատ Հարոյան. «Ուրալի» հայ պաշտպանը ՌՊԼ-ի վերջին 4 հանդիպումներում խաղացել է առանց փոխարինման. նաև մեկ գոլի հեղինակ է դարձել:

 

 

Հովհաննես Համբարձումյան. Կիպրական «Էնոսիս Պարալիմնիի» վերջին 3 հանդիպումներից մեկը Հովհաննեսն անցկացրել է առանց փոխարինման. մյուսում խաղացել է 70 րոպե, իսկ հավաքականին միանալուց առաջ կայացած խաղում անցկացրել է մեկ խաղակես:

Կամո Հովհաննիսյան. Ղազախական «Ժետիսուին» հրաժեշտ տված Հովհաննիսյանը թիմում վերջին 3 հանդիպումներից մեկում խաղացել է առանց փոխարինման, մեկ խաղի մասնակցել է 10 րոպե, իսկ մյուսին էլ մնացել է պահեստայինների թվում:

Անդրե Չալըշըր. Շվեդական «Գյոտեբորգի» հայ պաշտպանը վերջին 3 հանդիպումներից 2-ն անցկացրել է առանց փոխարինման, մեկ խաղի չի մասնակցել:

Արմեն Մանուչարյան. «Փյունիկի» պաշտպանը վերջին 2 հանդիպումներին մասնակցել է առանց փոխարինման. ի դեպ, գավաթային խաղում 120 րոպե:

Արթուր Դանիելյան. «Արարատ-Արմենիայի» պաշտպանը Բարձրագույն խմբի առաջնությունում վերջին 3 հանդիպումներից մեկին է մասնակցել (ամբողջ խաղ):

Պետրոս Ավետիսյան. Ավետիսյանը, չնայած հիմնական կազմի ֆուտբոլիստ է, վերջին 3 հանդիպումներից 2-ին է մասնակցել՝ յուրաքանչյուրում խաղալով մոտ 60-70 րոպե:

Արտակ Եդիգարյան. Եդիգարյան կրտսերը կայուն կերպով խաղում է «Փյունիկում»։ Առաջնության վերջին 3 հանդիպումներից 2-ին մասնակցել է ամբողջությամբ, մեկին՝ մեկ խաղակես: Գավաթի խաղարկության «Ուրարտուի» դեմ ծանրագույն հանդիպմանը խաղադաշտում է գտնվել 96 րոպե:

Ռումյան Հովսեփյան. Բուլղարական «Արդայի» վերջին 3 հանդիպումներից մեկին Ռումյանն ամբողջական մասնակցություն է ունեցել, մեկ հանդիպմանը մնացել է պահեստայինների նստարանին, իսկ մյուսում՝ խաղացել մոտ մեկ ժամ:

Գևորգ Ղազարյան. Կիպրական ԱԷԼ-ի կազմում Գևորգը կայուն խաղաժամանակ էր ստանում. Վերջին 3 հանդիպումներում մեկ ամբողջական խաղ, մեկ անգամ մեկ ժամ և 30 րոպե: Երեկ, սակայն, հայտնի դարձավ, որ մեր կիսապաշտպանը չի օգնի ընտրանուն առաջիկա երկու հանդիպումներում։ Հավաքականի նախնական մարզումներից հետո պարզվել է, որ Գևորգ Ղազարյանը ծնկի հետ կապված խնդիրներ ունի և բաց կթողնի առաջիկա հանդիպումները:

Էդգար Բաբայան. Դանիական «Հոբրոյում» վերջին 3 հանդիպումներում Բաբայանը խաղացել է առանց փոխարինման. հավաքականին միանալուց առաջ վերջին խաղում հստակ է իրացրել 11-մետրանոցը՝ իր թիմին փրկելով պարտությունից:

Արտյոմ Սիմոնյան. «Փյունիկի» վերջին 3 հանդիպումներից ոչ մեկում Արտյոմը հիմնական կազմում չի եղել, բայց այդ խաղերից երկուսում փոխարինման է մտել:

Տիգրան Բարսեղյան. Կայսարի վերջին 3 հանդիպումներից 2-ում Բարսեղյանը խաղացել է առանց փոխարինման, իսկ հավաքականին միանալուց առաջ «Օկժետպեսի» դեմ խաղում ֆանտաստիկ գոլի հեղինակ է դարձել: Բարսեղյանը նաև ընդգրկվել է Ղազախստանի ավարտված առաջնության 3 լավագույն ֆուտբոլիստների թվում՝ ըստ ՂՖՖ-ի:

Գեղամ Հարությունյան. Վնասվածքից ապաքինված Հարությունյանը կայուն կերպով խաղում է «Գանձասար-Կապանում». գավաթային խաղում փոխարինվել է խաղավերջում՝ մինչ այդ դառնալով գոլի հեղինակ, իսկ առաջնության վերջին 2 հանդիպումներում խաղացել է առանց փոխարինման՝ խփելով 1 գոլ:

Արթուր Սարկիսով. ՖԱԼ-ի ստորոտում գտնվող «Ենիսեյի» վերջին 3 հանդիպումներից Սարկիսովը մասնակցել է մեկին՝ 70 րոպե անցկացնելով խաղադաշտում՝ Անդրեյ Տալալաևի գլխավորած «Խիմկիի» դեմ խաղում:

Ալեքսանդր Կարապետյան. «Սոչիի» հայ հրետանին վերջին 3 հանդիպումներից ընդամենը մեկին է մասնակցել՝ այն էլ խաղադաշտում անցկացնելով 20 րոպե:

Արման Առաքելյան