Չեմպիոնական ինտրիգն Իսպանիայում, կարծես, ավարտվեց՝ նույնիսկ ամենաանհավանական սցենարներով ֆիլմերի սիրահարների համար։ Լա Լիգայի ավարտին մնում է 7 տուր, երբ առաջատարներ «Ռեալն» ու «Բարսան» պետք է իրենց ուժերը չափեին նորացված «Սանտիագո» Բերնաբեու ստադիոնում։ Երկու թիմերն էլ հանդիպմանը մոտեցել էին գերհոգնած կարգավիճակում. «Ռեալը» 4 օր առաջ ծանրագույն պայքարում պարտության էր մատնել «Մանչեսթեր Սիթիին», իսկ «Բարսելոնան» տնային խաղում խոշոր հաշվով պարտություն էր կրել ՊՍԺ-ից։ Հոգեբանական առավելությունը խաղից առաջ միանշանակ «Ռեալի» կողմն էր, սակայն ֆիզիկապես «Բլաուգրանան» անհամեմատ ավելի լավ վիճակում էր։
Նման խաղերում նախօրոք ֆավորիտին նշելն անհնար ու անշնորհակալ զբաղմունք է, քանի որ «Կլասիկոն» երբեք չի ճանաչում տրամաբանություն, նախախաղային հարցեր։ Այստեղ ցանկացած պահի կարող է տեղի ունենալ ցանկացած իրադարձություն, ցանկացած աննշան քամին կարող է փոխել հանդիպման ելքը 180 աստիճանով։
Կազմերը
Դիտելով երկու թիմերի մեկնարկային կազմերը՝ կարելի էր մտածել, որ «Բարսելոնան» ունի որոշակի առավելություն։ Համենայն դեպս, թղթի վրա տանտերերի պաշտպանության գիծն առնվազն մտահոգիչ էր։ Խաղադաշտ դուրս եկած պաշտպաններից միայն Անտոնիո Ռուդիգերն էր «ԴՆԹ»-ով պաշտպան։ Կենտրոնական գոտում նրա հետ դաշտ դուրս եկած Օրելյեն Չուամենին հենակետային կիսապաշտպան է։ Եզրերի պատասխանատուները հարկադրաբար են կապվել այդ դիրքերի հետ։ Էդուարդո Կամավինգան ստեղծագործ կիսապաշտպան է, բայց Կառլո Անչելոտտիի թեթև ձեռքով վերածվել է ձախ պաշտպանի։ Աջ լատերալի դիրքում էլ դաշտ էր դուրս եկել Լուկաս Վասկեսը։ Վերջինս «Ռեալի» «տրանսֆորմերն է»։ 4 տարի առաջ Զինեդին Զիդանը գնաց հնարքի ու Դանի Կարվախալի փոխարեն Լուկասին դրեց աջ պաշտպանի դիրքում։ Այդ էքսպերիմենտը դուր եկավ երկու կողմերին էլ, ու ամեն անգամ, երբ Կարվախալը ստանում էր վնասվածք, Լուկասը հայտնվում էր փրկողի դերում։
«Բարսայի» վիճակն էլ առանձնապես փայլուն չէր. Չավին վաղուց է մի կերպ «յոլլա գնում» առանց նոմինալ աջ պաշտպանի։ Ժյուլ Կունդեն իր կարիերայում, իհարկե, խաղացել է այդ դիրքում, սակայն գրեթե միշտ հարկադրաբար։ Տեղափոխվելով Կատալոնիա՝ ֆրանսիացի պաշտպանն ավելի հաճախ է փակում խնդրահարույց դիրքը՝ լինելով չգրոհող կամ քիչ գրոհող եզրային պաշտպան։ Կենտրոնական պաշտպան Անդրես Քրիստենսենը Չավիի որոշմամբ խաղում է հենակետայինի դիրքում։ Չէինք ասի, որ չի արդարացնում, բայց հենց այդ դիրքում զրկված լինելով Գավիից ու Պեդրիից՝ Չավին ստիպված ազատել է նրան կենտրոնական պաշտպանի պարտականություններից։
Խաղի սկիզբն ու մրցավարական սկանդալը
Խաղի սկզբում հերթական անգամ համոզվեցինք, որ Չավին գերազանց է կարողանում տրամադրել իր տղաներին։ Դրա վառ ապացույցը վաղաժամ գոլն էր։ Հանդիպման մեկնարկում հյուրերը ճնշում էին մրցակցին ու հասան անկյունայինի։ Դրոշակի մոտից Ռաֆինիայի ուղարկած գնդակն իջավ ուղիղ Քրիստենսենի գլխին։ Զարմանալի է, բայց այս դրվագում լուրջ ձախողվեց Անդրեյ Լունինը՝ մարդ, որն իր 8 սեյվով «Սիթիի» հետ հաղթանակի մարմնացումն էր։ Փոխանցման պահին Լունինը սխալ հաշվարկեց գնդակի հետագիծը, թիմակիցները, ինչպես հարկն է, չօգնեցին, և գոլը ծնվեց։
Գոլից հետո խաղը բացվեց․ «Ռեալը» գնաց առաջ՝ բացելով որոշակի միջանցքներ մրցակցի համար։ Ինչպես վերևում նշել էինք, երկու թիմերի ամենախոցելի դիրքը եզրային պաշտպանների դիրքն էր։ Հենց այդտեղից եկան գոլին հաջորդող երկու վտանգավոր պահերը։ Նախ Վինիսիուսը նպաստավոր դիրքից բարձր հարվածեց, այնուհետև Լամին Յամալը հեշտությամբ ձեռնունայն թողեց Կամավինգային ու սուր անկյունից հարվածեց, բայց «պապը երկու անգամ փլավ չի ուտում»՝ Լունինը տեղում էր։
17-րդ րոպեին գրանցվեց առաջին կեսի առաջին վիճահարույց դրվագը։ Լուկաս Վասկեսը մանկան պես շրջանցեց Ժոաո Կանսելուին ու հայտնվեց խիստ վտանգավոր դիրքում։ Իր առաջին կլասիկոն անցկացնող Կուբարսին հասավ փոխօգնության, բայց ունքն ուղղելու տեղը աչքն էլ հետը հանեց՝ գցելով մրցակցին սեփական տուգանայինում։ Կրկնապատկերում երևում է, որ Վասկեսը առանձնապես մեծ ցանկություն չուներ ոտքերը բարձրացնելու, Կուբարսին էլ դա չհասկացավ։ Այո, միանշանակ Լուկասը գնում էր այդ կոնտակտին։ Մրցավարը հիմք չէր ունենա նշանակելու 11-մետրանոց, եթե Կուբարսին չաներ ակցենտավորված շարժում մրցակցի ոտքերի ուղղությամբ։ Գնդակին մոտեցած Վինին նշակետից չվրիպեց՝ խփելով իր 7-րդ գոլը Կլասիկոներում։
28-րդ րոպեին գրանցվեց դրվագ, որը ոտքի հանեց ամբողջ Իսպանիայի ֆուտբոլային հասարակությունը։ Հերթական վտանգավոր անկյունայինի խաղարկումից հետո գնդակը հայտնվեց դարպասային գծի վրա (չասենք՝ դարպասում)։ «Բարսելոնայի» ֆուտբոլիստները աղաղակում էին, որ գնդակը հատել է դարպասային գիծը։ Առաջին կրկնապատկերը ցույց տվեց, որ գնդակն ամբողջությամբ դարպասում չի հայտնվել։ Քաղաքակիրթ ու ֆուտբոլային, նույնսիկ ոչ ֆուտբոլային երկրներում գոլը ֆիքսող համակարգը կարձանագրեր՝ կար գոլ, թե՞ ոչ։ Բայց պարզվում է՝ Իսպանիան ֆուտբոլային քաղաքակիրթ երկիր չէ ու չունի 3 մլն եվրո այդ տեխնիկան ներդնելու համար։ Նախկին մրցավար Իտուրալդե Գոնսալեսը (այո, այո, ա՜յն Իտուրալդեն) դժգոհ է նման թվացյալ պարզ տեխնոլոգիայի բացակայությունից։
«Չեմ կարծում, որ գնդակը հայտնվել է դարպասում, այն պետք է ամբողջությամբ անցներ գիծը: Սա երրորդ «ուրվական» գոլն է այս առաջնությունում։ Ընդամենը 3 միլիոն եվրո, և մենք ստիպված չենք լինի սպասել որոշման: Եվ առանց տեխնոլոգիայի, պետք է մեր «մատից հոտ քաշենք»: Այսօրվա տեսախցիկները չեն ապահովում անհրաժեշտ պատկերը»,- ասել է նախկին մրցավարը։
Մրցավարի՝ առաջին կեսի ավելացված 2-րդ րոպեին գրանցվեց դրվագ, որը ևս էականորեն ազդեց խաղի ելքի վրա։ Դաշտի կենտրոնական հատվածում գնդակի համար պայքարում Ֆեդերիկո Վալվերդեն գնաց կոնտակտային պայքարի Ֆրենկի դե Յոնգի հետ, եղավ, առաջին հայացքից, թեթև հարված։ Հոլանդացի ֆուտբոլիստն ընկավ խոտածածկին ու այլևս չկարողացավ ոտքի կանգնել։ Մոտ 4 րոպե բժիշկները փորձում էին նրան ոտքի հանել, բայց նա թողեց խաղադաշտը միայն պադգարակների օգնությամբ։ Դե Յոնգը նոր էր ապաքինվել վնասվածքից և շատ կարևոր դեր ուներ այս մոբիլ «Բարսելոնայում»։ Պեդրիի ու Գավիի բացակայությամբ դե Յոնգը տալիս էր խորություն ամբողջ միջին գծի երկայնքով՝ փակելով բոլոր հնարավոր դիրքերը։ Նրա փոխարեն դաշտ դուրս եկած Պեդրոն, իհարկե, վատը չէ, բայց դեռևս 100 տոկոսով պատրաստ չէ։
Ընդմիջումից հետո դիտարժան պայքարը շարունակվեց ու այն տեղափոխվեց արդեն մարզչական հարթակ։ Խաղին նոր շուք հաղորդելու համար անհրաժեշտ էր թարմություն։ Շախմատային պարտիայի առաջին քայլն արեց Չավին՝ նախ փոխարինման մտավ Ֆերմին Լոպեսը, այնուհետև դաշտից դուրս եկան Լևանդովսկին ու Ռաֆինյան՝ իրենց տեղը զիջելով Ֆերրան Տորեսին ու Ժոաո Ֆելիքսին։ Մինչև 69-րդ րոպեն օդում կախված էր լարվածությունը ու պարզ էր, որ այդքանով ոչինչ չի ավարտվի։ Հենց այդ րոպեին նորից գոլ ծնվեց ու նորից՝ եզրից։ Յամալը ստացավ գնդակը, «Ռեալի» ձախ պաշտպան Կամավինգան լա՜վ ուշացավ ու թույլ տվեց մրցակցին գրագետ կասեցնել գնդակն ու շքեղ փոխանցում կատարել տուգանային հրապարակ։ Ֆերան Տորեսը թեպետ չդիպավ գնդակին, բայց շեղեց Լունինին։ «Ռեալի» դարպասապահը հետ մղեց գնդակը, բայց ուղիղ Լոպեսի ոտքին։ «Բարսայի» երիտասարդ կիսապաշտպանին մնում էր չվրիպել։
Ընդամենը 4 րոպե անց «Ռեալը» պատասխանեց։ Վինին ձախ եզրով քարշ տվեց գնդակն ու այն ուղարկեց տուգանային։ Թվաց՝ գնդակին ոչ ոք չի հասնի կամ կդառնա մրցակցի պաշտպանների բաժին։ Բայց թիկունքից հայտնված Լուկաս Վասկեսը երկրորդ անգամ այս խաղում անակնկալի բերեց Ժոաո Կանսելուին ու գնդակն ուղարկեց դարպասը։ Թեպետ հանդիպման ավարտին դեռ 20 րոպե ժամանակ կար, բայց արդեն պարզ էր, որ խաղի գլխավոր հակահերոսներից մեկը Կանսելուն էր, որը դարձավ «Բարսայի» բաց թողած երկու գոլի մեղավորը։ Սա հերթական անգամ վկայում է նրա պաշտպանողական թույլ որակների մասին։
Շախմատային պարտիայի հաջորդ քայլը կատարեց Անչելոտտին՝ թարմություն մտցնելով խաղադաշտում։ Նախ դաշտ դուրս եկավ Էդեր Միլիտաոն, որը եկավ պաշտպանության կենտրոն ու խառնեց «Բարսայի» խաղաքարտերը։ Բրազիլացի ֆուտբոլիստն առաջին հայացքից ձևավորեց կենտրոնականների եռյակ, սակայն Չուամենին մի փոքր բարձրացավ վերև՝ հենակետային գոտի։ Թիկունքում լայն շարվածքը թույլ տվեց Վասկեսին ու փոխարինման մտած Ֆրան Գարսիային ավելի բարձր դիրքավորվել եզրերում։
Սա շախ էր, որը դրեց Պապա Կառլոն։ Մատ հայտարարեց արդեն Ջուդը։ Մրցավարի ավելացված ժամանակում «Սերուցքայինները» անցան օրինակելի հակագրոհի։ Փոխարինման մտած Բրահիմ Դիասը կենտրոնից գտավ նույն Լուկաս Վասկեսին, որը ցածրից սուր փոխանցում կատարեց տուգանայինի կենտրոն։ Խաղաժամանակ ստացած ֆուտբոլիստներից մյուսը՝ Խոսելը, կրնկի շարժումով ապակողմնորոշեց մրցակիցներին ու չդիպավ գնդակին։ Այն հասավ «Բարսայի» պաշտպանության աջ թև, որտեղ այս անգամ սխալվեց Ժյուլ Կունդեն ճիշտ այնպես, ինչպես րոպեներ առաջ Կանսելուն՝ չհասնելով Բելինգհեմի հետևից։ Անգլիացի ֆուտբոլիստը դաժանորեն գնդակահարեց Տեր Շտեգենին՝ հաղթանակ պարգևելով «Ռեալին»։
Մի քանի ուշագրավ թիվ.
- «Բարսան» արդեն «Ռեալին» պարտվում է 4-րդ խաղում անընդմեջ՝ 0-4 Իսպանիայի գավաթում, 1-2՝ Լա Լիգայում և 1-4 Սուպերգավաթում։
- «Ռեալը» տարավ 105-րդ հաղթանակը «Կլասիկոներում»։ Բարսան հաղթել է 100 անգամ, ևս 52 հանդիպում ավարտվել է ոչ-ոքի։
- Մադրիդցիներն անպարտելի են 17 հանդիպում անընդմեջ. նրանք տարել են 12 հաղթանակ, այդ թվում՝ 11 մետրանոց հարվածաշարով Սիթիի դեմ, և 5 ոչ-ոքի:
Այս հաղթանակից հետո «Ռեալը» միավորների թիվը հասցրեց 81-ի, «Բարսան» մնաց 70 միավորով։ Սրանով, կարծես, չեմպիոնական ինտրիգը ննջեց խաղաղությամբ։
Ռոբերտ Գասպարյան