Պորտուգալիայի ազգային հավաքականի նորանշանակ գլխավոր մարզիչ Ժորժե Ժեսուսն ազգային թիմի ղեկին իր առաջին մամուլի ասուլիսի ժամանակ անդրադարձել է 41-ամյա հարձակվող Կրիշտիանու Ռոնալդուին հավաքական հրավիրելու հարցին։ Պորտուգալացի մասնագետը հասկացրել է, որ լեգենդար ֆուտբոլիստի համար դռները բաց են։

«Ես դեռ չեմ զրուցել Կրիշտիանուի հետ։ Նա երբեք խնդիր չի լինի ո՛չ հավաքականի, ո՛չ էլ ինձ համար։ Յուրաքանչյուրն իրավունք ունի յուրովի վերաբերվել նրան որպես ֆուտբոլիստի և նրա շուրջ ստեղծված խոսակցություններին։

Երբ որևէ որոշում կայացնելու անհրաժեշտություն լինի, ես կխոսեմ նրա հետ, բայց ոչ միայն նրա․ ես անհատական զրույցներ կունենամ բոլորի հետ։ Նա պորտուգալական ֆուտբոլի, հավաքականի և ամբողջ Պորտուգալիայի խորհրդանիշն է, ինչը հավերժ կմնա պատմության մեջ։

Ինձ համար մեծ հաճույք է եղել աշխատել նրա հետ։ Ռոնալդուի հետ չափազանց հեշտ է աշխատել, եթե նա հասկանում է՝ որտեղ են անցնում սահմանները։ Գիտեմ, որ նա ցանկանում է շարունակել ելույթները «Ալ-Նասրում»։ Քանի դեռ նա խաղում է և համապատասխանում է հավաքական հրավիրվելու չափանիշներին, ես կհրավիրեմ նրան՝ այն դերով ու պայմաններով, որոնք լավագույնը կհամարեմ թիմի համար»,- հայտարարել է Ժեսուսը։

Աշխարհի 2026 թվականի առաջնությունում Պորտուգալիայի հավաքականը 1/8 եզրափակիչում նվազագույն՝ 0-1 հաշվով զիջեց Իսպանիայի ընտրանուն և դուրս մնաց հետագա պայքարից։ Այդ հանդիպումը Կրիշտիանու Ռոնալդուի կարիերայում վերջինն էր աշխարհի առաջնություններում՝ որպես ֆուտբոլիստ։ Լեգենդար հարձակվողն իր կարիերայի ընթացքում մասնակցել է ռեկորդային 6 Մունդիալի՝ դառնալով 11 գոլի հեղինակ։

Պորտուգալիայի ազգային հավաքականը պաշտոնապես հայտարարել է թիմի նոր գլխավոր մարզչի անունը։ Ազգային ընտրանին կգլխավորի Ժորժե Ժեսուսը, որը երկրի ֆուտբոլի ֆեդերացիայի հետ կնքել է աշխատանքային պայմանագիր՝ նախատեսված մինչև 2030 թվականը։

Ժեսուսի նախորդ աշխատավայրը Սաուդյան Արաբիան ներկայացնող «Ալ-Նասր» ակումբն էր, որի կազմում հանդես է գալիս Պորտուգալիայի հավաքականի ավագ Կրիշտիանու Ռոնալդուն։

Ազգային թիմի գլխավոր մարզչի պաշտոնում Ժեսուսը փոխարինել է Ռոբերտո Մարտինեսին։ Վերջինս լքել էր պաշտոնն այն բանից հետո, երբ աշխարհի 2026 թվականի առաջնության 1/8 եզրափակիչում պորտուգալացիները 0-1 հաշվով պարտություն կրեցին Իսպանիայի ընտրանուց և դուրս մնացին հետագա պայքարից։

Հիշեցնենք, որ ավելի վաղ 41-ամյա Ռոնալդուն հայտարարել էր, որ ավարտված Մունդիալը վերջինն էր իր կարիերայում։ Միևնույն ժամանակ, այս պահի դրությամբ դեռևս չկա հստակ և պաշտոնական տեղեկատվություն այն մասին, թե արդյոք Պորտուգալիայի հավաքականի ավագը կշարունակի հանդես գալ ազգային թիմում այլ մրցաշարերում։

Անվանի մարզական ինսայդեր Ֆաբրիցիո Ռոմանոն հայտնում է, որ փորձառու մասնագետ Ժորժե Ժեզուսը կդառնա Պորտուգալիայի ազգային հավաքականի նոր գլխավոր մարզիչը։

Այս պաշտոնում նա կփոխարինի Ռոբերտո Մարտինեսին, որը ազգային թիմը ղեկավարում էր վերջին երեք տարիներին։

​Ըստ աղբյուրի տեղեկությունների՝ Ժեզուսի հետ կստորագրվի աշխատանքային պայմանագիր, որը նախատեսված կլինի մինչև 2030 թվականի աշխարհի առաջնության ավարտը։ Սպասվում է, որ մոտ ժամանակներս նշանակման մասին կհայտարարվի պաշտոնապես։

​71-ամյա Ժորժե Ժեզուշն իր մարզչական կարիերան սկսել է դեռևս 1989 թվականին։ Տարիների ընթացքում նա հասցրել է աշխատել այնպիսի հայտնի ակումբների հետ, ինչպիսիք են «Բենֆիկան», Լիսաբոնի «Սպորտինգը», «Ֆեներբահչեն» և «Ալ-Հիլալը», իսկ ավարտված մրցաշրջանում նա Սաուդյան Արաբիայի չեմպիոնի տիտղոսն է նվաճել «Ալ-Նասրի» ղեկին։

Հիշեցնենք, որ Ռոբերտո Մարտինեսի գլխավորությամբ Պորտուգալիայի հավաքականը չկարողացավ հաղթել իր խմբում ԱԱ-2026-ի շրջանակներում, իսկ 1/8 եզրափակիչում զիջեց Իսպանիայի ընտրանուն ու վաղաժամ լքեց մրցաշարը։

Ֆրանսիայի հավաքականի նախկին հարձակվող Թիերի Անրին իր զորակցությունն է հայտնել պորտուգալացի աստղ Կրիշտիանու Ռոնալդուին այն բանից հետո, երբ Պորտուգալիայի ընտրանին ԱԱ-2026-ի 1/8 եզրափակիչում նվազագույն հաշվով զիջեց Իսպանիային (0:1) և լքեց պայքարը։

Ֆրանսիացի լեգենդար ֆուտբոլիստի համոզմամբ՝ Աշխարհի առաջնության չեմպիոնական տիտղոսի բացակայությունը բնավ չի նսեմացնում Ռոնալդուի հսկայական ավանդն ու նշանակությունը համաշխարհային ֆուտբոլում:

«Այն հանգամանքը, որ շատ ականավոր ֆուտբոլիստներ չեն նվաճել Աշխարհի գավաթը, չի արժեզրկում նրանց ներդրումը։ Ռոնալդուի թողած ժառանգությունը կասկածից վեր է։ Ես նրան ամենայն բարիք եմ մաղթում և ցանկանում եմ, որ հասնի կարիերայում 1000 գոլի սահմանագծին։

Իր ապրելակերպով, խաղի հանդեպ ունեցած վերաբերմունքով ու մտածելակերպով նա ոգեշնչել է մի քանի սերունդների, հատկապես՝ երեխաներին։ Նայեք նրա ֆիզիկական մարզավիճակին․ դա շատերի համար ուղղակի օրինակ է։ Այնպես որ, բարեկամս, հաջողություն եմ մաղթում քեզ այն ամենում, ինչով կորոշես զբաղվել հետագայում»,- Անրիի խոսքերն է մեջբերում Fox Sports-ը։

Հիշեցնենք, որ ավելի վաղ Կրիշտիանու Ռոնալդուն պաշտոնապես հայտարարել էր, որ այլևս չի պլանավորում մասնակցել Աշխարհի առաջնություններին: Մունդիալի ոսկե գավաթը միակ խոշոր և կարևորագույն տիտղոսն է, որը բացակայում է պորտուգալացու հարուստ մարզական հավաքածուից:

Պորտուգալիայի ֆուտբոլի ֆեդերացիան պաշտոնական կայքում հայտարարել է ազգային հավաքականի գլխավոր մարզիչ Ռոբերտո Մարտինեսի հետ համագործակցությունը դադարեցնելու մասին:

Իսպանացի մասնագետի պայմանագիրն ավարտվել է այսօր՝ հուլիսի 8-ին, և կողմերը որոշել են այն չերկարաձգել։

«Ֆեդերացիան շնորհակալություն է հայտնում Ռոբերտո Մարտինեսին և նրա մարզչական շտաբին վերջին երեքուկես տարիների ընթացքում ցուցաբերած պրոֆեսիոնալիզմի և նվիրվածության համար, ինչը նշանավորվեց 2025 թվականի Ազգերի լիգայում տարած հաղթանակով։ Շնորհակալ ենք նաև այն նվիրումի համար, որով նա ընդունեց այս նախագիծը, և այն հարգանքի համար, որը նա մշտապես դրսևորել է մեր երկրի և պորտուգալական ֆուտբոլի նկատմամբ»,- ասված է FPF-ի հայտարարության մեջ։

Նշվում է, որ ֆեդերացիայի նախագահն արդեն սկսել է նոր գլխավոր մարզչի փնտրտուքները:

Հիշեցնենք, որ Մարտինեսը Պորտուգալիայի հավաքականը գլխավորել էր 2023 թվականի հունվարին։ Նրա գլխավորությամբ թիմը նվաճեց Ազգերի լիգայի գավաթը (2025թ.) և հասավ 2026 թվականի աշխարհի առաջնության փլեյ-օֆֆ, որտեղ, սակայն, 1/8 եզրափակիչում պարտվեց Իսպանիայի ընտրանուն:

Ռոբերտո Մարտինեսի հրաժարականից հետո Պորտուգալիայի ազգային հավաքականը շուտով նոր գլխավոր մարզիչ կունենա։

Ինչպես արդեն տեղեկացրել էինք, ԱԱ-2026-ի 1/8 եզրափակիչում Իսպանիայից կրած նվազագույն՝ 0-1 հաշվով պարտությունից և պայքարը լքելուց հետո Մարտինեսը հայտարարեց պաշտոնից հեռանալու մասին։

Պորտուգալական հեղինակավոր A Bola պարբերականի հաղորդմամբ՝ Մարտինեսին այդ պաշտոնում կփոխարինի Ժորժե Ժեզուսը։ Ըստ աղբյուրի՝ Պորտուգալիայի ֆուտբոլի ֆեդերացիայի նախագահի ընտրությունը կանգ է առել հենց 71-ամյա մասնագետի վրա։ Սպասվում է, որ մոտ ապագայում Ժեզուսը պաշտոնապես կստորագրի պայմանագիրն ու կանցնի աշխատանքի։

Ներկա պահին փորձառու մասնագետն ազատ գործակալի կարգավիճակում է. նախորդ մրցաշրջանի ավարտից հետո նա հեռացել է սաուդյան «Ալ-Նասրից»։

Հատկանշական է, որ հաջորդ՝ 2030 թվականի աշխարհի առաջնությունը Պորտուգալիայի համար կլինի տնային։ Մունդիալւ համատեղ կհյուրընկալեն Պորտուգալիան, Իսպանիան և Մարոկկոն, թեև մրցաշարի 100-ամյակի կապակցությամբ մեկնարկային հանդիպումները խորհրդանշական կերպով կանցկացվեն Հարավային Ամերիկայում՝ Ուրուգվայում, Արգենտինայում և Պարագվայում։

Պորտուգալիայի հավաքականի աստղային հարձակվող Կրիշտիանու Ռոնալդուն այդպես էլ չնվաճեց աշխարհի չեմպիոնի տիտղոսը։ Ինչպես ավելի վաղ հայտարարել էր 41-ամյա ֆուտբոլիստը, այս Մունդիալը վերջինն էր իր կարիերայում։

Պորտուգալիայի ընտրանին լքեց պայքարն արդեն 1/8 եզրափակիչում՝ նվազագույն (0-1) հաշվով զիջելով Իսպանիային։

Մրցաշարից դուրս մնալուց հետո Ռոնալդուն հանդես է եկել բավականին ուշագրավ մեկնաբանությամբ՝ հասկացնելով, որ չի անհանգստանում աշխարհի առաջնության գավաթն այդպես էլ չնվաճելու փաստից։

«Ես երեք տիտղոս եմ նվաճել Պորտուգալիայի ազգային հավաքականի կազմում։ Մինչև Կրիշտիանուն Պորտուգալիան ոչինչ չէր հաղթել։ Ամենակարևոր տիտղոսը, որ նվաճել եմ հավաքականի հետ, Եվրո-2016-ն է։ Ինձ համար Եվրոպայի առաջնությունում հաղթելն ունի ճիշտ նույն արժեքը, ինչ աշխարհի առաջնությունում հաղթելը», — Ռոնալդուի խոսքերը մեջբերում է The Touchline պարբերականը։

Կրիշտիանու Ռոնալդուն իր կարիերայի ընթացքում հասցրել է մասնակցել աշխարհի վեց առաջնության՝ դառնալով համաշխարհային ֆուտբոլի պատմության եզակի ռեկորդակիրներից մեկը։ Թեև աշխարհի գավաթն այդպես էլ անհասանելի մնաց պորտուգալացու համար, նա շարունակում է մնալ Պորտուգալիայի հավաքականի պատմության լավագույն ռմբարկուն և երկրի գլխավոր ֆուտբոլային նվաճումների (այդ թվում՝ Ազգերի լիգայի և Եվրոպայի առաջնության) կերտողը։

Ակնկալվում, որ այս մրցաշարով ավարտվում է ոչ միայն հավաքականի մարզչի, այլև Ռոնալդուի միջազգային կարիերայի դարաշրջանը։

Իսպանիայի ազգային հավաքականը 16 տարվա դադարից հետո նվաճեց աշխարհի 2026 թվականի առաջնության քառորդ եզրափակիչի ուղեգիր՝ 1-0 հաշվով ծանրագույն պայքարում առավելության հասնելով Պորտուգալիայի ընտրանու նկատմամբ։

​Հանդիպման միակ և հաղթական գնդակը երկրորդ խաղակեսին ավելացված ժամանակում հեղինակել է Միկել Մերինոն։ Խաղից հետո Իսպանիայի հավաքականի գլխավոր մարզիչ Լուիս դե լա Ֆուենտեն մեկնաբանել է հանդիպումը՝ ընդգծելով, որ հաջողության գլխավոր գրավականը ժամանակին և ճիշտ կատարված փոխարինումներն էին։

​«Փոխարինման դուրս եկող ֆուտբոլիստների դերը չափազանց կարևոր է։ Մերինոյին ասացի, որ մենք պետք է խաղանք այնպես, ինչպես միշտ։ Նրա հիմնական գործառույթը կիսապաշտպանությանն ու հարձակման գծին աջակցելն է։ Նրան խաղադաշտ դուրս բերելով՝ մենք նպատակ ունեինք թիմին հաղորդել անհրաժեշտ ռիթմ և էներգիա։ Փոխարինման մտած խաղացողների ներդրումն ուղղակի վարպետության դաս էր։ Սա մեր գլխավոր առավելությունն է. մենք հայտացուցակում ունենք շատ բարձր մակարդակի 26 ֆուտբոլիստ»,- իսպանացի մասնագետի խոսքերն է մեջբերում ՖԻՖԱ-ի պաշտոնական կայքը։

Աշխարհի առաջնության 1/4 եզրափակիչում Իսպանիայի ընտրանին կմրցի ԱՄՆ-ի կամ Բելգիայի ազգային հավաքականի հետ։

Պորտուգալիայի ազգային հավաքականի հարձակվող Կրիշտիանու Ռոնալդուն աշխարհի 2026 թվականի առաջնությունից դուրս մնալուց հետո հաստատել է, որ սա իր կարիերայի վերջին Մունդիալն էր։

Միևնույն ժամանակ, 41-ամյա ֆուտբոլիստը դեռ հստակ չգիտի՝ արդյոք հիմա կավարտի՞ իր ելույթներն ազգային թիմի կազմում։

​Լրագրողների հետ զրույցում աստղային ֆուտբոլիստը կիսվել է իր հույզերով և ապագա ծրագրերով.

​«Այո, սա իմ վերջին աշխարհի առաջնությունն էր։ Տխուր եմ, որ այսպես եմ հեռանում մրցաշարից, բայց ես ներդրել եմ ողջ ուժերս և արել եմ առավելագույնը։ Սա ֆուտբոլ է. երբեմն հաղթում ես, երբեմն՝ պարտվում։ Այժմ ես ժամանակ կունենամ մտածելու և ընտանիքիս կողքին լինելու համար։ Պետք է խուսափել իմպուլսիվ արարքներից։ Կյանքը շարունակվում է»։

​Անդրադառնալով միջազգային կարիերայի հնարավոր ավարտին՝ Ռոնալդուն նշել է, որ չի շտապում վերջնական վճիռ կայացնել.

​«Դեռ չգիտեմ՝ արդյոք հենց հիմա կհեռանա՞մ Պորտուգալիայի հավաքականից։ Կտեսնենք։ Առայժմ չեմ ցանկանում որոշում կայացնել, պետք է դա քննարկեմ ընտանիքիս հետ։ Չեմ ցանկանում հանրության ուշադրությունը շեղել անձնական հարցերով»,- Ռոնալդուի խոսքերը մեջբերում է The Touchline պարբերականը։

Հիշեցնենք, որ ԱԱ-2026-ի 1/8 եզրափակիչում Պորտուգալիայի ընտրանին նվազագույն՝ 0-1 հաշվով պարտվեց Իսպանիայի ազգային հավաքականին և լքեց պայքարը։

Ֆուտբոլի 2026 թվականի աշխարհի առաջնության 1/8 եզրափակիչում Իսպանիայից կրած պարտությունից (0-1) և պայքարը լքելուց հետո Պորտուգալիայի ազգային հավաքականի գլխավոր մարզիչ Ռոբերտո Մարտինեսը հայտարարել է պաշտոնից հեռանալու մասին։

Մրցաշարում անբավարար արդյունք գրանցելուց հետո կայացած մամուլի ասուլիսի ժամանակ իսպանացի մասնագետը հաստատել է իր հեռանալու փաստը՝ նշելով, որ թիմի համար ավարտվում է մի ամբողջ ժամանակաշրջան.

«Սա ցիկլի ավարտ է։ Այժմ կարևոր է, որ թիմը նոր մարզիչ ունենա։ Ֆեդերացիայի նախագահն իրավունք ունի ընտրելու նոր ղեկավար։ Ես շնորհակալ եմ այն ողջ աջակցության համար, որն ինձ ցուցաբերվել է»,- լրագրողների հետ զրույցում ասել է Մարտինեսը։

Նշենք, որ աշխարհի առաջնությունից հետո Ռոբերտո Մարտինեսի հնարավոր հեռացման վերաբերյալ լուրերը մամուլում շրջանառվում էին դեռևս բավականին վաղուց։

Նախքան հեռանալու մասին հայտարարելը՝ արդեն նախկին գլխավոր մարզիչն անդրադարձել է նաև իսպանացիների դեմ բուն հանդիպմանը՝ ընդգծելով, որ իրենք արժանի չէին նման ելքի, իսկ երկրպագուները պետք է գնահատեն ֆուտբոլիստների ջանքերը.

«Պորտուգալացի ժողովուրդը կարող է հպարտանալ այս թիմով և այս ֆուտբոլիստներով։ Մենք շատ ենք ցավում արդյունքի համար։ Մենք հարվածեցինք դարպասաձողին և, կարծում եմ, արժանի էինք խաղը լրացուցիչ ժամանակ տեղափոխելուն։ Տղաները լավ էին պաշտպանվում՝ խաղալով աշխարհի առաջնության ֆավորիտներից մեկի դեմ։ Հնարավոր է՝ մեզ պարզապես բախտը չժպտաց։ Այսօր հաջողությունը մեր կողմից չէր, թեև խաղը միանգամայն հավասար էր»,- Մարտինեսի խոսքերը մեջբերում է ՖԻՖԱ-ի պաշտոնական կայքը։

Ռոբերտո Մարտինեսը Պորտուգալիայի ազգային հավաքականի ղեկը ստանձնել էր 2023 թվականի հունվարին՝ այդ պաշտոնում փոխարինելով Ֆեռնանդու Սանտուշին։ Նրա գլխավորությամբ հավաքականը 2025 թվականին նվաճեց Ազգերի լիգան։