Պարետատան որոշումից հետո, այն է՝ մարզումները կարելի է իրականացնել որոշ սահմանափակումներով և կարգավորումներով, ոլորտում քննարկումները չեն դադարում։ Մարզումները թույլատրելիության սահմաններում կազմակերպելու համար անհրաժեշտ գործնական կարգավորումներ չկան։ Խոշոր մարզադրպրոցները փակ են, մարզաշխարհի շատ ներկայացուցիչներ լիարժեք մարզումների չեն կարողանում վերադառնալ, իսկ կոնտակտային մարզաձևերի համար իրավիճակը շատ ավելի բարդ է, քանզի կարգավորումները պահանջում են պահպանել 1.5 մետր հեռավորություն:
«Այսպես չի կարելի երկար շարունակել»,- ստեղծված իրավիճակի մասին ArmSport.am-ի հետ զրույցում նշում է Ձյուդոյի ֆեդերացիայի գլխավոր քարտուղար, Օլիմպավանի տնօրեն Թաթուլ Հովհաննիսյանը․
«Երբ երկրում հայտարարվեց կարանտին, առաջին իսկ օրվանից ձյուդոյի հավաքականի անդամները մարզվել են անհատական: Մենք՝ հավաքականի գլխավոր մարզչի, երիտասարդական և պատանեկան հավաքականների ավագ մարզիչների, ինչպես նաև ֆեդերացիայի նախագահի գլխավորությամբ քննարկեցինք մեր անելիքները: Մարզիկներին առաջադրանք տրվեց հիմնականում ֆիզիկական պատրաստվածության և դիմացկունության համար: Հիմա էլ բացօթյա մարզումներ անցկացնում ենք քիչ խմբերով, բայց այսպես երկար չի կարելի շարունակել: Ձյուդոիստը պետք է տատամիի վրա մարզվի, որպեսզի զգա տատամին, զոննան, մրցակցին: Դա շատ լուրջ խնդիր է»:
Օրեր առաջ կորոնավիրուսի տարածման հետևանքով մարզաշխարհում ստեղծված իրավիճակի վերաբերյալ ՀՀ ԱԺ պատգամավոր, Օլիմպիական խաղերի արծաթե մեդալակիր, ըմբշամարտի աշխարհի ու Եվրոպայի չեմպիոն Արսեն Ջուլֆալակյանի նախաձեռնած աշխատանքային քննարկման ժամանակ Թաթուլ Հովհաննիսյանն, իր դժգոհությունն արտահայտելով կոնտակտային մարզաձևերում ստեղծված իրավիճակից, առաջարկել է մարզիկներին մեկուսացնել Օլիմպավանում․
«Ազգային հավաքականների մարզիչների, ֆեդերացիաների ներկայացուցիչների ու ՄՊՄԴ-ների ղեկավարների հետ քննարկման ընթացքում ես հանդես եկա առաջարկով, որ հավաքական թիմերին, ինչպես նաև մեր հեռանկարային մարզիկներին, պետության աջակցությամբ մեկուսացնենք Օլիմպավանում: Եթե պետք լիներ դուրս գալ, նաև դրսում կանցկացնենք մարզումներ, վազք և այլն: Դա շատ կարևոր է, քանի որ գալիք տարին օլիմպիական է, և պետք է պահել մարզավիճակը»:
Դիտարկմանը, թե այս իրավիճակը ազդում է աշխարհի բոլոր մարզիկների վրա, Հովհաննիսյանը պատասխանում է.
«Ամեն ինչ պետք չէ հալած յուղի պես ընդունեք: Ուրիշ երկրներն ինչ որ ցույց են տալիս, ոչ ոք չի կարող հաստատել, որ հենց այդպես էլ անում են: Դա իմ անձնական կարծիքն է: Ես, որպես ֆեդերացիայի քարտուղար, իմ առաջարկությունն արեցի: Գուցե վերևներում ավելի լավ են տեսնում ու ավելի լավ են պատկերացնում ելքը ստեղծված իրավիճակից, քանի որ իրենք են պատասխանատուները: Իմ առաջարկը միայն մեր մարզիկների լավի համար է: Նույն խնդիրն է նաև բռնցքամարտում, ըմբշամարտում և մյուս մարզաձևերում: Ով՝ ինչպես կարողանում է, փորձում է լրացնել այս բացերը»:
Ֆեդերացիայի գլխավոր քարտուղարը կարծում է, որ սպորտում ստեղծված իրավիճակի շուրջ քննարկումները նախարարության հետ շարունակական կլինեն, բայց դրանց արդյունավետության մեջ վստահ չէ Թաթուլ Հովհաննսիյանը՝ մեջբերելով վերջերս տեղի ունեցած մի իրավիճակից դրվագ.
«Ինձ թվում է քննարկումները շարունակական են լինելու, բայց չգիտեմ դրանք որքանով արդյունավետ կլինեն: Բերեմ ձեզ մի օրինակ. մենք նամակ ենք գրել Սպորտի նախարարությանը, որով խնդրել ենք, որ մեր մարզիկներից 4-ը՝ Աշխարհի կամ Եվրոպայի առաջնությանը մասնակցելու դեպքում, հավակնում են նորմատիվ լրացնելուն, որպեսզի ծառայեն մարզական վաշտում: Խնդրել էինք, որ նրանց բանակ տանեն հաջորդ զորակոչին, որպեսզի կարողանան մասնակցել հետաձգված Աշխարհի ու Եվրոպայի առաջնություններին: Նախարարության սպորտի բաժնի պատասխանատուները պատասխանել էին, որ նրանց նորմատիվները չեն համապատասխանում, այդ պատճառով հիմա են զորակոչում բանակ: Դրա մասին մենք էլ գիտենք, որ չեն համապատասխանում: Որ համապատասխանեին, էլ ինչի համար էինք դիմում նրանց: Երևի նամակը չէին էլ կարդացել, չեն տեսել, թե ինչի մասին էր խոսքը»:
Ձյուդոյի միջազգային բոլոր ստուգատեսները հետաձգված են։ Թաթուլ Հովհաննիսյանից տեղեկանում ենք, որ Աշխարհի ու Եվրոպայի առաջնությունների անցկացման ժամկետները պարզ կդառնան մոտ ժամանակներս: Նախնական ծրագրով՝ սեպտեմբերին պետք է կայանա Եվրոպայի առաջնությունը: Հուլիսին արդեն վերջնական պարզ կլինեն մրցումների անցկացման ժամկետները, սակայն աշխարհում ստեղծված իրավիճակում բացառված չէ, որ ամեն ինչ կարող է փոփոխվել:
Երվանդ ՀԱԿՈԲՅԱՆ
